មណ្ឌលគិរី៖ នៅថ្ងៃទី៣១ ធ្នូ​ ២០២២ គេបានសង្កេតឃើញថា ភ្ញៀវទេសចរជាច្រើនបានអញ្ជើញ​មកដល់ខេត្តមណ្ឌលគិរី ​ដើម្បីដើរលេងកម្សាន្ត​ លំហែកាយ ក្នុងឱកាសបុណ្យឆ្លងឆ្នាំសកល២០២៣ ហើយនៅតាមតំបន់ទេសចរណ៍នានា ​គឺមានអ្នកទេសចរទៅទស្សនាជាច្រើន ខណៈដែល​អាជ្ញាធរខេត្ត ក៏បានរៀបចំពិធីអបអរកម្សាន្តនៅចំណុច​ទំនប់ទឹកសែនសុខដុម ក្នុងក្រុងសែនមនោរម្យ​ ។

ភ្ញៀវទេសចរមកកម្សាន្តនៅខេត្តមណ្ឌលគិរី បានលើកឡើងថា ទោះបីជាគាត់បានមកកម្សាន្ត​នៅ​ខេត្តមណ្ឌលគិរីច្រើនលើកមកហើយ ប៉ុន្តែរូបគាត់និងក្រុមគ្រួសារនៅតែជ្រើសយក​ខេត្តមណ្ឌលគិរី​ជាគោលដៅកម្សាន្ត ព្រោះទេសភាពនៅទីនេះស្អាតប្លែកខុសតំបន់ដទៃ ពិសេសគឺ​អាកាសធាតុត្រជាក់តែម្ដង ​ដែលល្អលើសតំបន់ទេសចរណ៍ផ្សេងៗ ។ ទោះជាយ៉ាងនេះក្ដីភ្ញៀវទេសចររូបនោះ ក៏លើកឡើងអំពីចន្លោះខ្វះខាត​តិចតួចក្នុងសេវាកម្ម​ទេសចរណ៍​របស់​ខេត្តមណ្ឌលគិរី ​ក្នុងនោះ នៅតាមតំបន់ទេសចរណ៍មិនទាន់​មានធុងសំរាម​គ្រប់គ្រាន់​ ពិសេសគឺនៅខ្វះខាតបន្ទប់ទឹក​ ទន្ទឹមនេះដែរចំពោះតម្លៃស្នាក់នៅតាមResort គឺមានតម្លៃខ្ពស់ជាងខេត្តផ្សេងៗ ​ប៉ុន្តែចំពោះតម្លៃម្ហូបអាហារអាចទទួលយកបាន ។

គិតត្រឹមរសៀលនៅថ្ងៃទី៣១ធ្នូនេះ​ ចំពោះសន្ទុះចំនួនភ្ញៀវទេសចរចូលកម្សាន្តខេត្តមណ្ឌលគិរី គឺមានច្រើនហើយ​ ប៉ុន្តែមិនច្រើនខ្លាំងដូចឆ្នាំមុននោះទេ​ ខណៈដែល​នៅតាមរមណីយដ្ឋាន ក៏ពុំទាន់​មានភ្ញៀវច្រើនខ្លាំងរហូតធ្វើឲ្យមានការ ​កកស្ទះដូចពេលមុនៗនោះដែរ ។

ប្រធានមន្ទីរទេសចរណ៍ខេត្តមណ្ឌលគិរី លោក សេង សឿន ​បានឲ្យដឹងដែរ ចំពោះចំនួនភ្ញៀវដែល​ចូលមកកម្សាន្តនៅខេត្តមណ្ឌលគិរី ​នៅរសៀលថ្ងៃទី៣១ធ្នូ ពុំទាន់ដឹងស្ថិតិជាក់លាក់នោះទេ ដែល​មន្ត្រីជំនាញកំពុងចុះប្រមូលតាមរមណីយដ្ឋាននានា ។

លោកបន្តថា​ សម្រាប់ថ្ងៃទី៣១នេះ ​នៅចំណុចទំនប់ទឹកសែនសុខដុម និងទំនប់ទឹកសែនមនោរម្យ នឹង​មានការបាញ់កាំជ្រួញអបអរ ​ដាក់​ស្ដង់​ពិព័រណ៍ ថែមទាំងមានការប្រគុំតន្ត្រីជូនប្រជាពលរដ្ឋ និង​អ្នកទេសចរទស្សនាកម្សាន្តផងដែរ ៕ អ៊ិត ភីរុណ