បាត់ដំបង៖ ខេត្តបាត់ដំបង បានត្រៀមលក្ខណៈរួចរាល់ហើយសម្រាប់ទទួលស្វាគមន៍ភ្ញៀវទេសចរ​គ្រប់​ទិសទី​ក្នុងឱកាសពិធីបុណ្យចូលឆ្នាំថ្មី ឆ្នាំសកល ក្នុងនោះរដ្ឋបាលខេត្តបានតុបតែងលម្អ រៀបចំភ្លើងពណ៌តាមស្ពាន សួនច្បារ អគារ និងទីសាធារណៈនានា ជាពិសេសការដាក់តាំងបង្ហាញ​ពិព័រណ៍​មុខម្ហូបខ្មែររបស់អ្នកខេត្តបាត់ដំបងដែលល្បីល្បាញ។

លោក អ៊ុចអ៊ុ ភីនីស្សារ៉ា ប្រធានមន្ទីរទេសចរណ៍ខេត្តបាត់ដំបង ​បានថ្លែងឲ្យដឹងថា បាត់ដំបង គឺជាខេត្តមួយដែលមានប្រវត្តិសាស្ត្រ វប្បធម៌ ទំនៀមទំលាប់​យ៉ាង​សម្បូរ​បែបតាំងពីដើមរៀងមក ហើយអ្វីដែលជាការកត់សម្គាល់ទៀតសោតនោះ ​គឺភ្ញៀវទេសចរភាគច្រើន ជាពិសេសភ្ញៀវទេសចរ​ក្នុងស្រុកពេលដែលលឺឈ្មោះបាត់ដំបងតែងតែនឹកឃើញដល់​បទចម្រៀង​របស់​អធិរាជសំឡេងមាស ស៊ីន ស៊ីសាមុត ដែលបានរៀបរាប់ពីមុខម្ហូបចំណីអាហារដ៏ឈ្ងុយឆ្ងាញ់​ដែលអ្នកនិពន្ធបានចងក្រង​នូវប្រវត្តិនៃមុខម្ហូបដ៏ពេញនិយមនិងឈ្ងុយឆ្ងាញ់ ដូចជា៖ អាម៉ុកត្រី,ផ្អកត្រីប្រៃ,ណែមត្រី,ក្រូចពោធិ៍សាត់, ដូងខ្ទិះ...ដែលមានឱជារសឆ្ងាញ់ពិសារ ហើយក៏ជាស្នាដៃរបស់អ្នកបាត់ដំបង រហូតពេលខ្លះបានទាក់ទាញដល់ភ្ញៀវទេសចរឱ្យមកលេង ដើម្បីបានភ្លក្ស និងស្គាល់នូវរសជាតិ ​និងមុខម្ហូបខ្លះៗ។

លោកប្រធានមន្ទីរទេសចរណ៍ បានអំពាវនាវដល់ភ្ញៀវទេសចរជាតិ អន្តរជាតិ និងបងប្អូន​ប្រជាពលរដ្ឋ​ទាំងអស់ចូលរួមកម្សាន្តសប្បាយ ​ភ្លក្សម្ហូបអាហារ និងភេសជ្ជៈឆ្ងាញ់ៗពិសេសៗ​ដែល​មាន​លក់ក្នុងទឹកដីខេត្តបាត់ដំបង ទាំងអស់គ្នាចាប់ពីរសៀលថ្ងៃទី៣០ ខែធ្នូ ឆ្នាំ២០២២តទៅ។

ក្រៅពីការរៀបចំកម្មវិធីកម្សាន្តសប្បាយក្នុងក្រុង ខេត្តបាត់ដំបងមានតំបន់ទេសចរណ៍វប្បធម៌ និង​ធម្មជាតិជាច្រើនកន្លែងដែលគួរជាទីកន្លែងសម្រាកលម្ហែកម្សាន្តអារម្មណ៍ក្នុងឱកាសឈប់សម្រាកអបអរសាទរពិធីបុណ្យចូលឆ្នាំថ្មីឆ្នាំសកល។ទីតាំងទេសចរណ៍នានាត្រូវបានតុបតែងលម្អ ត្រៀមបម្រុងសេវាកម្មនានា ​ដើម្បីទទួលស្វាគមន៍ ​និងបម្រើដល់ភ្ញៀវទេសចរ ។

ខេត្តបាត់ដំបងមានវិសាលភាពរមណីយដ្ឋាន​ និងគោលដៅទេសចរណ៍ទូទាំងខេត្តមានចំនួន១១១ ទីតាំងក្នុងនោះ រមណីយដ្ឋានទេសចរណ៍មានចំនួន ២០ទីតាំង​ សហគមន៍និងអេកូទេសចរណ៍មាន ៤ទីតាំង ​គោលដៅទេសចរណ៍មាន ៥៤ទីតាំង ​ទេសចរណ៍សាសនាមាន ​២៩ទីតាំង និងកសិទេសចរណ៍មាន៤ទីតាំង៕