កំពង់ស្ពឺ៖ ឯកឧត្តម ហ៊ុន ម៉ានី ប្រធានគណៈកម្មាការទី ៧ នៃរដ្ឋសភា និងជាអ្នកតំណាងរាស្រ្តខេត្តកំពង់ស្ពឺ បានអះអាងថា ក្រោមម្លប់នៃសន្តិភាព បានផ្ដល់នូវការជួបជុំ ភាតរភាព និងការសប្បាយរីករាយដល់ប្រជាជនខ្មែរ។
ការថ្លែងរបស់ឯកឧត្តម ហ៊ុន ម៉ានី យ៉ាងដូច្នេះក្នុងឱកាសដែលឯកឧត្តម បានអញ្ជើញផ្ដល់បទសម្ភាស នារាត្រីអបអរសាទរព្រឹត្តិការណ៍ឆ្លងឆ្នាំចាស់ផ្លាស់ចូលឆ្នាំថ្មី នៅពហុកីឡដ្ឋានខេត្តកំពង់ស្ពឺ នាថ្ងៃទី៣១ ខែធ្នូ ឆ្នាំ២០២២។
ក្នុងឱកាសជួបជុំដ៏សប្បាយរីករាយនេះ ឯកឧត្តម ហ៊ុន ម៉ានី បានធ្វើការឆ្លុះបញ្ចាំង និងសម្ដែងការថ្លែងអំណរគុណដល់ប្រមុខរាជរដ្ឋាភិបាលកម្ពុជា ដែលបានខិតខំប្រឹងប្រែងក្នុងបេសកកម្មប្រយុទ្ធប្រឆាំងនឹងជំងឺឆ្លងកូវីដ-១៩ រហូតទទួលបានជោគជ័យ ដែលអនុញ្ញាតឱ្យមានដំណើរការជាប្រក្រតីភាពឡើងវិញ លើផ្នែកសង្គម-សេដ្ឋកិច្ច។ ជាពិសេសបានអនុញ្ញាតឱ្យយើងមានលទ្ធភាពគិតគូររៀបចំសកម្មភាពប្រមូលផ្ដុំនានាទូទាំងប្រទេស ជាក់ស្ដែងដូចជាការរៀបចំព្រឹត្តិការណ៍ឆ្លងឆ្នាំនៅកីឡដ្ឋានខេត្តកំពង់ស្ពឺនេះផ្ទាល់។
ឯកឧត្តម បានគូសបញ្ជាក់ថា បើគ្មានសុខសន្តិភាព យើងក៏ពុំមានឱកាសបានជួបជុំបែបនេះដែរ។ នេះជាមោទកភាពមួយ ដែលកម្ពុជាយើង ជាប្រទេសតូចតែមានបេះដូងធំ មានសមត្ថភាពគ្រប់គ្រង និងការពារបូរណភាពទឹកដី ធានាបាននូវសុខមាលភាពរបស់ប្រជាជន ជាពិសេសធានាបាននូវស្ថិរភាពម៉ាក្រូសេដ្ឋកិច្ចជាតិ ឲ្យមានការរីកចម្រើនជាបន្តបន្ទាប់។
ក្នុងព្រឹត្តិកាណ៍ឆ្លងឆ្នាំរយៈពេល០៤ថ្ងៃនេះ មានកម្មវិធីកម្សាន្តសប្បាយៗជាច្រើន ជាពិសេសការរៀបចំឱ្យមានកម្មវិធីប្រដាល់សេរីគុនខ្មែរ ការប្រគុំតន្រ្តីដ៏ធំ អមជាមួយដោយការបាញ់កាំជ្រួចអបអរ ដែលផ្ដល់នូវភាពកម្សាន្តសប្បាយរីករាយជូនដល់បងប្អូនប្រជាពលរដ្ឋក្នុងខេត្តកំពង់ស្ពឺផ្ទាល់ ក៏ដូចជាបងប្អូនមកពីរាជធានី-ខេត្តផ្សេងៗផងដែរ។
ឯកឧត្តម ហ៊ុន ម៉ានី ក៏បានថ្លែងអំណរគុណចំពោះអាជ្ញាធរខេត្ត ស្ថាប័នជាដៃគូសហការ និងសប្បុរសជនទាំងអស់ ដែលបានចូលរួមធ្វើឱ្យព្រឹត្តិការណ៍អបអរឆ្លងចូលឆ្នាំថ្មី ២០២៣ ក្នុងទីតាំងកីឡដ្ឋានខេត្តកំពង់ស្ពឺនេះ ប្រព្រឹត្តទៅប្រកបដោយភាពអធិកអធមតាមការគ្រោងទុក៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
