ភ្នំពេញ៖ សាកលវិទ្យាល័យ ខេមតិច កាលពីកន្លងទៅនេះ បានរៀបចំកម្មវិធីទស្សនកិច្ចសិក្សា និងពិធីចុះហត្ថលេខាលើអនុស្សរណៈយោគយល់ក្រោមអធិបតីភាពរបស់ ឯកឧត្តមបណ្ឌិតសាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា។

 តាមសាកលវិទ្យាល័យ ខេមតិច នៅថ្ងៃទី១ ខែមករា ឆ្នាំ២០២៣នេះ បានឲ្យដឹងថា ពិធីចុះហត្ថលេខានេះ ធ្វើឡើង រវាងសាកលវិទ្យាល័យខេមតិច និងសាលារៀនជំនាន់ថ្មី រួមមានវិទ្យាល័យព្រះស៊ីសុវត្ថិ-សាលារៀនជំនាន់ថ្មី, វិទ្យាល័យព្រែកលាប-សាលារៀនជំនាន់ថ្មី, វិទ្យាល័យសម្តេច អគ្គមហា ធម្មពោធិសាល ជាស៊ីម ព្រែកអញ្ចាញ-សាលារៀនជំនាន់ថ្មី ក្នុងគោលបំណងបង្កើតឲ្យមានទំនាក់ទំនងល្អជាមួយគ្នា ក្នុងការផ្តល់ប្រឹក្សាពីមុខជំនាញនៅឧត្តមសិក្សាជូនដល់សិស្សានុសិស្សនៅវិទ្យាល័យ កិច្ចសហប្រតិបត្តិការ ការផ្សព្វផ្សាយព័ត៌មានពីការសិក្សារផ្សេងៗរួមបញ្ចូលអាហារូបករណ៍ដោយផ្តល់ជូនអាហារូបករណ៍ដល់សិស្សពូកែមកពីវិទ្យាល័យទាំងបីផងដែរ ការចែករំលែកចំណេះដឹងដូចជាមន្ទីរពិសោធន៍ AI សម្រាប់ការអប់រំ មនុស្សយន្ត និងបន្ទប់ Maker Space បណ្ណាល័យ កីឡា ការលើកកម្ពស់បច្ចេកវិទ្យា និងវិទ្យាសាស្ត្រ ពិព័រណ៍និងសិក្ខាសាលាពីការប្រឹក្សានិងអាជីពនាពេលអនាគត ការពង្រឹងសមត្ថភាពគ្រូបង្រៀន និងបុគ្គលិក។

 លោកបណ្ឌិត ឃៀង សុធី សាកលវិទ្យាធិការ នៃសាកលវិទ្យាល័យខេមតិច បានមានប្រសាសន៍ថា សម្រាប់ចក្ខុវិស័យ គឺចង់ប្រែក្លាយជាសាកលវិទ្យាល័យឈានមុខគេក្នុងវិស័យបច្ចេកវិទ្យា និងវិទ្យាសាស្ត្រ ដើម្បីរួមចំណែកដល់ការអភិវឌ្ឍន៍ប្រកបដោយចីរភាពនៅកម្ពុជា។

 ជាមួយគ្នានេះ ឯកឧត្តមបណ្ឌិត សាន វឌ្ឍនា បានបញ្ជាក់ថា សិស្សានុសិស្ស គួរជ្រើសរើសមុខជំនាញដែលខ្លួនស្រលាញ់ពេញចិត្ត មិនគួររៀនសាកលវិទ្យាល័យពីរក្នុងពេលតែមួយ ព្រោះវាជាផលពិបាកដែលអ្នកសិក្សាមិនអាចគ្រប់គ្រងពេលវេលាសម្រាប់ការសិក្សានិងការយកចិត្តទុកដាក់ផ្តោតលើជំនាញមួយជាក់លាក់។ ឯកឧត្តមបានបន្តថា បន្ថែមពីនេះ សិស្ស និសិ្សត គួររៀនភាសាអោយបាន ២ទៅ៣ភាសា ពិសេសផ្តោតជាសំខាន់លើភាសាអង់គ្លេស និងកុំព្យូរទ័យផងដែរ។ នៅក្នុងឱកាសនោះ ឯកឧត្តម សម្តែងការគាំទ្រ ក្នុងការធ្វើជាសក្ខីភាពក្នុងពិធីចុះហត្ថលេខាលើអនុស្សរណៈយោគយល់នេះ ដើម្បីជំរុញនិងលើកទឹកចិត្តដល់ការបង្កើតភាពជាដៃគូ រវាងសាកលវិទ្យាល័យនិងសាលារៀនជំនាន់ថ្មីខាងផ្នែកបច្ចេកទេស។ 

 សូមជម្រាបថា ក្នុងកម្មវិធីនេះ ក៏មានបញ្ចូលទស្សនកិច្ចសិក្សា និងការតាំងពិព័រណ៍ប្រឹក្សាជំនាញដើម្បីលើកកម្ពស់ការយល់ដឹង និងបទពិសោធន៍ដ៏សំខាន់ដល់មាតាបិតា និងអាណាព្យាបាលសិស្ស ជាពិសេសប្អូនៗដែលទើបបានប្រឡងបញ្ចប់ថ្នាក់ទី១២ និងកំពុងត្រៀមខ្លួនចូលរៀននៅថ្នាក់ឧត្តមសិក្សាបានមកទស្សនាស្វែងយល់អំពីសម្ភាររូបវ័ន្តសិក្សា និងកម្មវិធីសិក្សារបស់សាកលវិទ្យាល័យ ខេមតិច ព្រមទាំងទទួលការប្រឹក្សាយោបល់ជាមួយអ្នកជំនាញ និងសាស្ត្រាចារ្យ និងនិស្សិតដែលកំពុងសិក្សានៅសាកលវិទ្យាល័យខេមតិចផ្ទាល់ លើការជ្រើសរើសមុខជំនាញសិក្សាដែលស្របនឹងឧបនិស្ស័យ ទេពកោសល្យ និងតម្រូវការទីផ្សារការងារ។ លើសពីការទស្សនា និងការប្រឹក្សាយោបល់ កម្មវិធីនេះក៏មានការរៀបចំសកម្មភាពកំសាន្តសប្បាយផ្សេងៗ៕