កំពង់ឆ្នាំង៖ នាយប់ថ្ងៃទី៣១ ខែធ្នូ ឆ្នាំ២០២២ នៅសួនសម្តេចចៅហ្វាវាំង គង់ សំអុល, សួនវិមាន​ឯករាជ្យ និងសួនបាញ់ទឹកមុខសាលាខេត្តកំពង់ឆ្នាំង មានប្រជាពលរដ្ឋរាប់ម៉ឺននាក់ បាន​នាំ​ក្រុម​គ្រួសារ បងប្អូន កូនចៅ មិត្តភ័ក្រ មកអង្គុយលេង ញាំអាហារជុំគ្នា និងរាំលេង​កំសាន្ត​តាម​តន្ត្រី​ដែល​ប្រគុំ​កំដរដោយក្រុមតន្ត្រីសាលាខេត្តកំពង់ឆ្នាំងផងដែរ។ លើសពីនោះទៀត គេសង្កេត​ឃើញ​បង​ប្អូន​ប្រជាពលរដ្ឋបានយកកន្ទេល កៅអី និងអង្រឹងយោល​កូនតូចៗ​មក​ទុក​គេង​ចាំ​ឆ្លង​ឆ្នាំ​សកល​នៅ​ទីសួន​ដ៏​មនោរម្យនោះទៀតផង ក្នុងទឹកចិត្តសប្បាយរីករាយក្រៃលែង ក្រោម​ម្លប់​សុខសន្តិភាពពេញបរិបូណ៌នៅក្នុងផ្ទៃប្រទេសទាំងមូល។

ជួបជាមួយប្រជាពលរដ្ឋជាច្រើននាក់ដែលមកឆ្លងឆ្នាំនៅទីសួននោះ ពួក​គាត់​បាន​បង្ហាញ​ពី​អារម្មណ៍​ពិតថា ដោយសារកត្តាសុខសន្តិភាពដែលមានសម្តេចតេជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រកម្ពុជា ខិតខំថែរក្សាជូនប្រជាពលរដ្ឋ ការឆ្លងឆ្នាំ ឆ្នាំនេះ គឺសប្បាយ​អធឹក​អធម​ជាង​ឆ្នាំកន្លងទៅ និងមានបងប្អូនពីទីជិតឆ្ងាយយ៉ាងច្រើនកុះករ ដោយពួក​គាត់​បង្ហា​ញនូ​វ​ស្នាម​ញញឹម​ក្រោម​ដំបូលសុខសន្តិភាព។

ប្រជាពលរដ្ឋដែលបានមកលេងនៅសួនសម្តេចចៅហ្វាវាំង, សួនវិមានឯករាជ្យ និង​សួន​បាញ់​ទឹកមុខ​សាលាខេត្តក្នុងយប់នេះ គឺមានការជួបជុំគ្នាញាំអារហារ និងរាំលេង​តាម​ចង្វាក់​ភ្លេង​​ដែល​ប្រគុំ​ដោយ​ក្រុមតន្ត្រីសាលាខេត្តកំពង់ឆ្នាំង និងដើរកំសាន្តជាក្រុមៗ អ្នកខ្លះមានការ​ថត​ជួប​ជុំគ្នា​យ៉ាង​សប្បាយ។ នៅតាមដងផ្លូវ មានរថយន្ត និងម៉ូតូគ្រប់ប្រភេទណែនណាន់តាន់តាប់ រហូត​ដល់​ស្ទះ​ចរាចរណ៍ដោយអន្លើៗផងដែរ ប៉ុន្តែកងកម្លាំង​សមត្ថកិច្ច​ចរាចរណ៍​បាន​ជួយ​សំរួល​ដល់​ការ​ធ្វើ​ដំណើរ​របស់បងប្អូន និងកម្លាំងនគរបាលសន្តិសុខនៃស្នងការដ្ឋាននគរបាលខេត្ត ព្រមទាំង​កង​រាជ​អាវុធ​ហត្ថ​ខេត្ត បានដាក់ពង្រាយ និងដើរល្បាតជាប់ជាប្រចាំ ដើម្បីរក្សា​សន្តិសុខ​សណ្តាប់​ធ្នាប់​ជូន​ប្រជាពលរ​ដ្ឋ​ក្នុងយ​ប់ឆ្លងឆ្នាំ២០២២-២០២៣ឆ្នាំនេះ ៕ ហុង វាស្នា