ព្រៃវែង៖ នៅព្រឹកថ្ងៃទី០២ ខែមករានេះ ឯកឧត្តម ជា សុមេធី អភិបាលនៃគណៈអភិបាលខេត្តព្រៃវែង អញ្ជើញ​បើកបវេសនកាលឆ្នាំសិក្សា ២០២២-២០២៣ និងចែករង្វាន់ និងលិខិតសរសើរដល់​សិស្សពូកែប្រចាំឆ្នាំសិក្សា ២០២១-២០២២ និងជូនវត្ថុអនុស្សាវរីយ៍ដល់លោកគ្រូ អ្នកគ្រូដែលចូលនិវត្តន៍ នៅវិទ្យាល័យ ហ៊ុន សែន កំពង់លាវ ក្រុងព្រៃវែង ខេត្តព្រៃវែង។

ក្នុងឱកាសនេះ ឯកឧត្តម ជា សុមេធី បានលើកឡើងថា ក្មួយៗសម័យនេះ ពិតជា​មាន​ភ័ព្វសំណាង​ណាស់ ​ដែលបានរស់នៅក្រោមម្លប់សន្តិភាពដែលមានសម្ដេចតេជោ ហ៊ុន សែន បាន​យក​ចិត្តទុកដាក់ខ្ពស់ទៅលើវិស័យអប់រំនេះ​ ដែលបានសាងសង់ អគារសិក្សាខ្ពស់​ មានបន្ទប់រៀនស្អាត ធំទូលាយ​ វិស័យអប់រំល្អ និងមានគុណភាព។

ឯកឧត្តម ក៏បានសំណូមពរដល់ក្មួយៗ ត្រូវខិតខំសិក្សារៀនសូត្រ ស្ដាប់ដំបូន្មានឪពុកម្ដាយ លោកគ្រូ អ្នកគ្រូ ​ដើម្បីក្លាយជាសិស្សល្អ កូនល្អ ពលរដ្ឋល្អនៅក្នុងសង្គម ​ហើយ​ជាទំពាំងស្នងឬស្សីសំរាប់​អនាគត​ប្រទេសជាតិយើង៕