ឧត្តរមានជ័យ៖ ឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យ​អញ្ជើញបើកបវេសនកាលឆ្នាំសិក្សាថ្មី២០២២-២០២៣ នៅវិទ្យាល័យតេជោសែនសំរោង ខេត្តឧត្តរមានជ័យ និងមានការចូលរួមពីមន្ទីរស្ថាប័នពាក់ព័ន្ធនានា លោកគ្រូអ្នកគ្រូ អាណាព្យាបាលសិស្សានុសិស្សយ៉ាងច្រើនកុះករ នៅព្រឹកថៃ្ងទី២មករាឆ្នាំ២០២៣នេះ។

ក្នុងពិធីនោះឯកឧត្តមប៉ែន កុសល្យ បានកោត​សសើរ​​ចំពោះថ្នាក់ដឹកនាំ​គ្រប់ជាន់ថ្នាក់​មន្ទីរស្ថាប័ន​ពាក់ព័ន្ធ អាជ្ញាធរដែនដី មាតាបិតា អាណាព្យាបាល ​សប្បុរសជន ​គណៈគ្រប់គ្រងគ្រឹះស្ថានសិក្សា លោកគ្រូ អ្នកគ្រូ ទាំងអស់ដែលកន្លងមក បានពុះពារ​រាល់ឧបសគ្គគ្រប់បែបយ៉ាងប្រកបដោយ​ស្មារតី​ទទួលខុសត្រូវខ្ពស់ ​សាមគ្គីភាព ​ភក្តីភាព​និងមុះមុត ក្នុង​ការ​ឧបត្ថម្ភ​គាំទ្រ​និងធានាផ្តល់នូវ​ការរៀន​សូត្រតាមគ្រប់រូបភាពដល់សិស្សានុសិស្ស ក្នុងអំឡុងពេលនៃវិបត្តិជំងឺកូវីដ១៩ អូសបន្លាយអស់រយៈពេលជិត២ឆ្នាំកន្លងមកនេះ ។

ឯកឧត្តមអភិបាលខេត្ត បានជំរុញបន្ថែមអោយលោក គ្រូ អ្នកគ្រូទាំងអស់​ត្រូវ​បន្តដើរតួនាទីជា​បុគ្គល​នាំមុខ​និងជាឪពុកម្តាយទី២ ​ជា​មគ្គុទ្ទេសក៍​ និងជាអ្នកស្រាវជ្រាវ ​ជាទីប្រឹក្សា​ ជាអ្នក​ច្នៃប្រឌិត ត្រូវ​ខិតខំ​ប្រឹងប្រែង​អភិវឌ្ឍន៍​សមត្ថភាពខ្លួនបន្តទៀតជាប្រចាំទាំងផ្នែកចំណេះដឹង ទាំង​វិធីសាស្ត្រ​បង្រៀន​ រួមទាំងការ​ប្រើប្រាស់​បច្ចេកវិទ្យាព័ត៌មាន​ទំនើប​ទាន់សម័យ​ និងភាសាបរទេស ដើម្បី​ចំណេះដឹងថ្មីៗគរុកោសល្យល្អៗ ដើម្បីមកបង្ហាត់បង្រៀនដល់សិស្សឱ្យ​មានចំណេះដឹងទូលំទូលាយ និង​អភិវឌ្ឍន៍ខ្លួនទៅជាពលរដ្ឋដើម្បី​ជាអ្នកបន្តវេនសម្រាប់ថ្ងៃអនាគតផងដែរ។

ជាមួយគ្នានោះ​ឯកឧត្តម ​បាន​អំពាវនាវ​ឲ្យ​សិស្សានុសិស្ស យុវជន យុវនារីទាំងអស់​ត្រូវបន្ត​ខិត​ខំរៀន​សូត្រ​និង​ស្រាវជ្រាវ​ឲ្យបាន​ខ្ជាប់ខ្ជួន​ ​និង​ចូលរួមឲ្យបាន​សស្រាក់សស្រាំ​ដើម្បី​ការ​រីកចម្រើន​នៅ​ក្នុង​គ្រួសារក៏ដូចជាសង្គម ​និងប្រទេសជាតិយើងទាំងមូល​គឺ​សិស្សានុសិស្ស​ត្រូវនៅ​អោយ​ឆ្ងាយ​ពី​គ្រឿងញៀន​ ។

តាមរបាយការណ៍របស់លោក ប៉ិច រតនា ប្រធានមន្ទីរអប់រំយុវជន និងកីឡាខេត្តឧត្តរមានជ័យ បានបញ្ជាក់ថា ​សម្រាប់ឆ្នាំសិក្សាថ្មី២០២២ នេះ​ចំនួនសិស្សដែលជាបេក្ខជន​ចុះឈ្មោះ​ប្រឡង​សញ្ញាបត្រ​មធ្យម​សិក្សា​ទុតិយភូមិ​ (បាក់ឌុប) មានចំនួន១៦៤៧នាក់ ឆ្នាំមុនមានត្រឹមតែ១៤២៨នាក់ តែប៉ុណ្តោះ​កើនឡើងជាង១០០នាក់។ ក្នុងនោះ​សិស្សប្រឡងជាប់ ១០៨២នាក់ ស្រី៦០១នាក់​សិស្សបា​ន​និទ្ទេសA​ ចំនួន៦នាក់ ​និទ្ទេសBចំនួន៤៩នាក់ ស្រី២៩នាក់ និទ្ទេសC ចំនួន២១៥នាក់ ស្រី១០៣នាក់ និទ្ទេសDចំនួន៤៦៣នាក់ ស្រី២៦០នាក់ និង​និទ្ទេសEចំនួន៤៨៨នាក់ ស្រី២៨៦នាក់៕ អត្ថបទ៖ សារិទ្ធ