ភ្នំពេញ៖ ពលរដ្ឋរស់នៅរាជធានីភ្នំពេញ ​នៅថ្ងៃនេះ បានចាប់ផ្តើមសម្រុកទៅចាក់វ៉ាក់សាំង​បង្ការ​ជំងឺកូវីដ-១៩ ដូសជំរុញទី៦ ដើម្បីបង្កើនអង់ទីគ័រទប់ទល់នឹងការវាយលុកពីជំងឺនេះ ។

ពលរដ្ឋ មកចាក់វ៉ាក់សាំងកូវីដនៅមណ្ឌលសុខភាពស្ទឹងមានជ័យ ​រាជធានីភ្នំពេញ នាថ្ងៃទី២ ខែមក រានេះ បានប្រាប់BTVឱ្យបានដឹងថា​ ការស្ម័គ្រចិត្តចាក់វ៉ាក់សាំងកូវីដ ​ដូសជំរុញទី៦ គឺដើម្បីបង្ការខ្លួន​ពីជំងឺ កូវីដ-១៩ និងមិនចង់ឱ្យជំងឺនេះរីករាលដាលឡើងវិញនោះទេ។

ក្រៅពីនេះ ពួកគេបានសម្ដែង​ការសប្បាយ ចិត្ត និងអរគុណដល់សម្តេចតេជោ ហ៊ុន សែន នាយករដ្ឋមន្រ្តី​កម្ពុជា ​ដែលសម្រេចឱ្យប្រជាពលរដ្ឋទូទាំងប្រទេស ទទួលបានចាក់វ៉ាក់សាំង​ដូសជំរុញជាបន្តបន្ទាប់ ​ដោយឥតគិតថ្លៃ ។

អ្នកគ្រូពេទ្យ ហ៊ាង មករា ប្រធានមណ្ឌលសុខភាពស្ទឹងមានជ័យ ​បានឱ្យដឹងដែរថា បច្ចុប្បន្ននៅ មណ្ឌលសុខភាព ​មានវ៉ាក់សាំងកូវីដ-១៩ ​ពីប្រភេទរួមមាន៖ Pfixzer និង Sinova សម្រាប់ចាក់​ជូនប្រជា ពលរដ្ឋ មានទាំងដូសមូលដ្ឋាន ​និងជំរុញ ​ហើយប្រជាពលរដ្ឋ បន្តមកទទួលការ​ចាក់​វ៉ាក់សាំងកូវីដ ជាហូរហែ។

ក្រៅពីនេះ អ្នកគ្រូពេទ្យ​បានជំរុញដល់ប្រជាពលរដ្ឋ ដែលត្រូវដល់វេនចាក់វ៉ាក់សាំងដូសជំរុញទី៣ ទី៤ ទី៥ ​និងជាពិសេសដូសជំរុញទី៦​ ដែលចាប់ផ្តើមពីថ្ងៃនេះតទៅ សូមរួសរាន់មកទទួលការ​ចាក់វ៉ាក់សាំង ឱ្យគ្រប់ៗគ្នា។

កន្លងទៅថ្មីនេះ​គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩​ ក្នុង​ក្របខណ្ឌ​ទូទាំង​ប្រទេស បាន​ចេញសេចក្តីជូនដំណឹង​ស្តីពីដំណើរការចាក់វ៉ាក់សាំងបង្ការជំងឺកូវីដ-១៩​ ដូសជំរុញទី៤ ដល់​កុមារ អាយុពី៣ឆ្នាំ ដល់ក្រោម៥ឆ្នាំ, ​ចាក់សាំងដូសជំរុញទី៥ ​ដល់កុមារអាយុពី៥ឆ្នាំ ដល់​ក្រោម​១២ឆ្នាំ និង ដូសជំរុញទី៦ ​ដល់មន្រ្តីជួរមុខ ​អាជ្ញាធរ ​និងប្រជាពលរដ្ឋទូទៅ ​តាម​ការ​ស្ម័គ្រចិត្ត។ ការចាក់វ៉ាក់សាំងដូស ​ជំរុញជូនដល់មន្រ្តីរាជការ ​និងកូនចៅមន្រ្តីរាជការស៊ីវិល នៅថ្នាក់ជាតិ នឹង​ចាប់ផ្តើមពីថ្ងៃទី០៩ ​ខែមករានេះតទៅ ។

ដោយឡែកការចាក់វ៉ាក់សាំងដូសជំរុញក្នុងក្របខណ្ឌរាជធានី-ខេត្ត ​នឹងត្រូវផ្សព្វផ្សាយសេចក្តី ជូន​ដំណឹងដោយដែនសមត្ថកិច្ចរបស់ខេត្តរៀងៗខ្លួន ៕អត្ថបទ៖ ទូច សោភ័ណ