ភ្នំពេញ៖ គ្រប់គ្រឹះស្ថានសិក្សាសាធារណៈ ​ពីមតេយ្យសិក្សា ​ដល់ថ្នាក់វិទ្យាល័យ​បានចាប់ផ្ដើម​បវេសនា​កាល​ឆ្នាំសិក្សាថ្មី ​នៅថ្ងៃទី២ ខែមករា ឆ្នាំ២០២៣នេះ។

ក្រសួងអប់រំ យុវជន និងកីឡា បានបើកបវេសនកាលឆ្នាំសិក្សាថ្មី ២០២២-២០២៣ សម្រាប់គ្រឹះស្ថាន សិក្សាសាធារណៈទាំងអស់នៅថ្ងៃទី ២ខែមករា ឆ្នាំ២០២៣នេះ។

ការបើកបវេសនកាលនៅតាមសាលារៀននីមួយៗ ​ធ្វើឡើងក្រោមរូបភាព ​ដោយមានវត្តមាន អាជ្ញាធរ​មូលដ្ឋាន គណៈគ្រប់គ្រងសាលា ​គ្រូបង្រៀន សិស្ស​ ក៏ដូចជាអាណាព្យាបាលមួយចំនួន​។

សម្រាប់សិស្សនៅវិទ្យាល័យបាក់ទូក ​ដែលបានទៅសាលាក្នុងថ្ងៃដំបូងនេះ តាមការសង្កេត​គឺនៅតែ​បន្តរក្សា​វិធាន​ការការពារ។

សិស្សនៅបន្តពាក់ម៉ាសការពារ បានល្អប្រសើរ ទោះសព្វថ្ងៃបញ្ហាកូវីដ-១៩ នៅកម្ពុជា ពុំមានការឆ្លងច្រើន​យ៉ាងណាក្ដី។ ថ្ងៃដំបូងនៃការបើកបវេសនកាលឆ្នាំសិក្សាថ្មីនេះ ​ពួកគាត់ជាសិស្ស បានបង្ហាញក្ដីរីករាយ ​ដោយភ្ជាប់ជាមួយការប្ដេជ្ញាខិតខំរៀនសូត្រ និងគោរពវិន័យសាលា ដើម្បីក្លាយជាសិស្សល្អ។

ក្នុងឱកាសបើកបវេសនកាលនេះ លោក តូច កន្តាល់ នាយកវិទ្យាល័យបាក់ទូក បានណែនាំដល់​សិស្ស​នូវចំណុចមួយចំនួនផងដែរ។ ចំណុចសំខាន់ទី ១ គឺណែនាំឱ្យសិស្សគ្រប់រូបត្រូវតែបប្រឹងប្រែង​រៀនសូត្រ មិនថាកម្រិតថ្នាក់នោះទេ។ ​ចំណុចសំខាន់មួយទៀត ​គឺណែនាំឱ្យសិស្សត្រូវគោរព បទបញ្ជាផ្ទៃក្នុងសាលា ​ប្រតិបត្តិវិន័យឱ្យបានខ្ជាប់ខ្ជួន។

ការគ្រប់គ្រងស្ថានការណ៍បានល្អប្រសើរនេះ គឺទទួលបានពីកិច្ច​ប្រឹងប្រែង​របស់រាជរដ្ឋាភិបាល ក្នុង​ការបំពេញការងារជាច្រើន។ ​ជាពិសេសគឺយុទ្ធនាការចាក់វ៉ាក់សាំង ​សម្រាប់ប្រជាពលរដ្ឋគ្រប់រូប ដោយ​មិនគិតថ្លៃ ចាប់តាំងពីដូសទី ១ ​ឈានដល់ការប្រកាសឱ្យចាក់ដូសជំរុញទី ៦ ដែលប្រមុខ​រាជរដ្ឋាភិបាល​កម្ពុជា ទើបប្រកាសអនុញ្ញាតនាពេលថ្មីៗនេះ។

ការគ្រប់ស្ថានការណ៍កូវីដ-១៩ ​មិនឱ្យមានការផ្ទុះរីករាលដាលខ្លាំងនេះ គឺបានអនុញ្ញាតឱ្យសាលា​រៀន​បើកដំណើរបានទាំងស្រុងរយៈពេលពេញមួយឆ្នាំរួចមកហើយ ​សម្រាប់ឆ្នាំសិក្សា ២០២០-២០២១៕អត្ថបទ៖ គឹមហុក