កណ្ដាល៖ នៅថ្ងៃទី២ ខែមករា ឆ្នាំ២០២៣នេះ បណ្តាសាលារៀននៅទូទាំងខេត្តកណ្តាល បាន​បើកបវេសនកាលឆ្នាំសិក្សាថ្មីឆ្នាំ២០២៣ ទៅតាមកម្មវិធីរបស់ក្រសួងអប់រំយុវជន ​និងកីឡា។ សម្រាប់ការបើកបវេសនកាលថ្មីនេះ​ បណ្តាសិស្សានុសិស្សគ្រប់កម្រិតសិក្សា បានបង្ហាញការប្តេជ្ញា​ចិត្ត​ខំប្រឹងសិក្សារៀនសូត្រឲ្យបានខ្លាំងក្លាជាងបណ្តាឆ្នាំសិក្សាកន្លងមក។

បណ្តា​សិស្សានុសិស្សនៃវិទ្យាល័យ ​ហ៊ុន សែន តាខ្មៅ ​បានថ្លែងប្រាប់BTVថា ​នៅថ្ងៃនេះវិទ្យាល័យ ហ៊ុន សែន តាខ្មៅ ​គឺបានរៀបចំកម្មវិធីបើកបវេសនកាលឆ្នាំសិក្សា២០២៣ ​ក្រោមអធីបតីភាព លោកជំទាវ ហ៊ុន កុសនី អភិបាលរងខេត្តកណ្តាល។

បណ្តាសិស្សានុសិស្ស បានបង្ហាញការបេជ្ញាចិត្តខ្លាំងកា្ល ខិតខំត្រង់តា្រប់ស្តាប់គ្រូពន្យល់ រៀឲ្យពូកែ​ដើម្បី​មុខមាត់អាណាព្យាបាល សាលារៀន ក៏ដូចសង្គមជាតិទាំងមូលផងដែរ។

លោក ទី ណាដា នាយកវិទ្យាល័យ ហ៊ុន សែន តាខ្មៅ ថ្លែងថា ​នៅក្នុងឆ្នាំសិក្សាថ្មីនេះ ក៏ដូចជា​ក្នុងឆ្នាំសិក្សាបន្តបន្ទាប់ទៀតដែរ ​បណ្តាលោកគ្រូ អ្នកគ្រូ​ មានការតាំងចិត្តខ្លាំងក្លាដែរ លើការបង្ហាត់​បង្រៀនសិស្សឲ្យពូកែ តាមរយៈ ពង្រឹងការអនុវត្តវិន័យសាលា ​ការបង្កើតគន្លឹះ យុទ្ធសាស្ត្រថ្មីៗ​សម្រាប់​បង្កើនការបង្រៀន ធ្វើឲ្យសិស្សងាយយល់​ ងាយចាំ និងរៀនពូកែ។

លោកជំទាវ ហ៊ុន កុសនី អភិបាលរងខេត្តកណ្តាល ​ថា នៅក្នុងឆ្នាំសិក្សា២០២២កន្លងមកនេះ ខេត្តកណ្តាល ​មានមោទកភាព ​ដែលមានសិស្សានុសិស្សថ្នាក់ទី១២​ រៀនពូកែ ហើយបានប្រឡង​ជាប់​សញ្ញាបត្រមធ្យមសិក្សាទុតិយភូមិមានចំនួន ៧​ ៥៤៩នាក់​ ស្មើប្រមាណជាង៧៦% ក្នុងនោះ​សិស្សជាប់និទ្ទេសA មានចំនួន១០៤នាក់ ​ដោយនៅក្រុងតាខ្មៅ​ មានសិស្សប្រឡងជាប់និទេ្ទសA មានរហូត៣៤នាក់ច្រើន៕អត្ថបទ ស៊ុម សុខជា