កំពង់ចាម៖ ឯកឧត្តមបណ្ឌិត ម៉ា ឈឿន អ្នកតំណាងរាស្ត្រមណ្ឌលកំពង់ចាម និងជាប្រធាន ក្រុមការងារថ្នាក់កណ្ដាលចុះជួយស្រុកជើងព្រៃ បានអញ្ជើញសម្ពោធសមិទ្ធផលផ្លូវ ដែលទើបកសាងរួចចំនួន ៣ខ្សែ សម្រាប់​ជាកាដូរចំណងដៃ​មុននិងបិទបញ្ចប់ទំព័រសករាជឆ្នាំចាស់ ២០២២ ផ្លាស់ចូលឆ្នាំថ្មី​ឆ្នាំសកល​២០២៣ ផ្ដល់​ជូន​ដល់​បងប្អូនប្រជា ពលរដ្ឋនៅឃុំផ្ដៅជុំ។

​ឯកឧត្តមបណ្ឌិត ម៉ា ឈឿន មានប្រសាសន៍ថា រាល់សមិទ្ធិផលទាំងឡាយ ដែលកើត​ឡើងជាបន្តបន្ទាប់ នៅ​តាម​មូល​ដ្ឋាន ជាការយកចិត្តទុកដាក់ផ្ទាល់ពីក្រុមការងារ ក៏ដូចជាអាជ្ញា​ធរមូលដ្ឋាន ក្នុង​ការ​ជំរុញ​ដល់​ការ​អភិវឌ្ឍ​សមិទ្ធិ​ផល​ក្នុង​មូល​ដ្ឋានឲ្យបានរីកចម្រើន សំដៅ​បម្រើនូវប្រយោជន៍ជាចាំបាច់ជូនដល់ប្រជាពលរដ្ឋ​។

ឯកឧត្តម បានបន្តថា ទន្ទឹមនឹងសមិទ្ធលហេដ្ឋារចនាសម្ព័ន្ធ នៅតាមមូលដ្ឋាន​ក៏នៅមាន​សមិទ្ធផលធំៗ របស់​សង្គមជាតិ​ជា​ច្រើនទៀត ដែលបាននឹងកំពុងលេចឡើងជាបន្តបន្ទាប់តាម​រយៈការខិតខំប្រឹងប្រែងរបស់រាជរដ្ឋាភិបាល ដឹកនាំ​ដោយ​សម្ដេច​តេជោ ហ៊ុន សែន ជានាយក​រដ្ឋមន្ត្រី ក្នុងនោះ មានសមិទ្ធិផលមួយចំនួន​បានសម្ពោធដាក់ឲ្យ ប្រើ​ប្រាស់​រួច​ហើយ និងមួយ​ចំនួនកំពុងបន្តបើកការដ្ឋានសាងសង់​ជាបន្តបន្ទាប់ទៀតផងដែរ​។

ឯកឧត្តមប្រធានក្រុមការងារ បានបន្ថែមថា គណបក្សប្រជាជនកម្ពុជា នឹងមិនធ្វើឲ្យអ្នក​គាំទ្រខកបំណងឡើយ ដោយ​ខិត​ខំបម្រើសេចក្តីត្រូវការជូនប្រជាពលរដ្ឋ តាមរយៈការបន្ត​កសាង​សមិទ្ធផលផ្សេងៗជាបន្តទៀត ជាមួយ​នឹង​ការ​ប្រកាស​ផ្ដល់ជូនផ្លូវក្រាលគ្រួសក្រហម ចំនួនមួយបន្ថែមទៀត និងពិនិត្យលើសំណើធ្វើផ្លូវលំមួយខ្សែទៀត ដែល​ពល​រដ្ឋ​បាន​លើកជា​សំណើរឡើងផងដែរ​។

ជាមួយគ្នានេះ ឯកឧត្តម ម៉ា ឈឿន បានជំរុញឲ្យក្រុមការងារ ក៏ដូចជាអាជ្ញាធរនៅគ្រប់ មូលដ្ឋាន​ត្រូវ​បន្ត​យក​ចិត្ត​ទុក​ដាក់​បន្ថែមទៀត ក្នុងការដោះស្រាយសេចក្តីត្រូវការចាំបាច់ ជូន​ប្រជាពលរដ្ឋរួមទាំងសេវាតម្រូវការចាំបាច់ និង​សេវា​សំណូមពរផ្សេងៗ ហើយបានស្នើឱ្យថ្នាក់​ដឹកនាំគ្រប់មូលដ្ឋាន ត្រូវបន្តជំរុញលើការអភិវឌ្ឍ​មូលដ្ឋាន និង​ខិតខំ​អនុវត្ត​ឲ្យ​បាន​ល្អនូវ​គោលនយោបាយភូមិឃុំ​មានសុវត្ថិភាព ធ្វើយ៉ាងណានៅតាមមូលដ្ឋាននីមួយៗ មិនត្រូវឲ្យ កើត​មាន​អំពើ​ចោរ​កម្ម​លួចឆក់ ប្លន់គ្រឿងញៀន និងល្បែងស៊ីសងគ្រប់ប្រភេទ ដោយធានាឲ្យ បាននូវ​សុវត្ថិភាព​ល្អ​នៅ​គ្រប់​មូលដ្ឋាន​ជូនប្រជាពលរដ្ឋ​៕ អត្ថបទ៖ សុខ​រិទ្ធ