​ភ្នំពេញ៖ ក្នុងយុទ្ធនាការចុះធ្វើអត្តសញ្ញាណបណ្ណសញ្ជាតិខ្មែរ ជូនដល់ប្រជាពលរដ្ឋតាមខ្នងផ្ទះ តាមភូមិ ក្នុងភូមិសាស្ត្រ​រាជធានី​ភ្នំពេញទាំង ១៤ខណ្ឌ ក្នុងនោះ មានចំនួន ១០៥ប៉ុស្តិ៍រដ្ឋបាល បាន​បន្តចុះធ្វើ​អត្តញ្ញាណ​បណ្ណជូនពលរដ្ឋ​ទាំង​យប់​ទាំងថ្ងៃ ដើម្បីផ្តល់ភាពងាយស្រួលដល់ប្រជាពលរដ្ឋ ធ្វើឲ្យប៉ះពាល់ដល់ម៉ោងការងារ ប្រកបរបររកស៊ី ឬ ម៉ោង​សិក្សា​របស់កូនៗពួកគាត់។

​ក្នុងនោះដែរ លោកវរៈសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា លទ្ធផល នៃការចុះធ្វើអត្តសញ្ញាណបណ្ណសញ្ញាតិខ្មែរ ជូនប្រជាពលរដ្ឋ ដល់តាមភូមិ និងតាមខ្នងផ្ទះ រយៈពេល ១ខែ​ពេ​ញ ចាប់ពីថ្ងៃទី០១ ដល់ទី៣១ ខែធ្នូ ឆ្នាំ២០២២ សរុបទាំង ១០៥ប៉ុស្តិ៍រដ្ឋបាល ក្នុងភូមិសាស្រ្តរាជធានីភ្នំពេញ នគរ​បាល​បានថតអត្តសញ្ញាណប័ណ្ណជូនពលរដ្ឋបានចំនួន ២៣១៦៥នាក់។

​គួររំលឹកផងដែរ កាលពីព្រឹកថ្ងៃទី៣០ ខែវិច្ឆិកា ឆ្នាំ២០២២ លោកឧត្តមសេនីយ៍ឯក ស ថេត អគ្គស្នងការរង និង​ជា​ស្ន​ង​ការនគរបាលរាជធានីភ្នំពេញ បានបើកកិច្ចប្រជុំ ស្តីពីការត្រួតពិនិត្យ និងជំរុញបន្ថែមក្នុងការផ្សព្វផ្សាយ ដើម្បី​ព​ន្លឿ​ន​ក្នុងការធ្វើអត្តសញ្ញាណបណ្ណសញ្ជាតិខ្មែរប្រភេទថ្មី ជូនដល់ប្រជាពលរដ្ឋទាំង ២ភេទ ដែលគ្រប់អាយុ ១៥ឆ្នាំ និ​ង​សម្រា​ប់​ប្រជាពលរដ្ឋ ដែលមានអត្តសញ្ញាណបណ្ណហួសសុពលភាព និងសល់សុពលភាពត្រឹម ៩០​ថ្ងៃ​ហួស​សុពល​ភាព។

ក្នុងកិច្ចប្រជុំ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានណែនាំដល់​ការិយា​ល័យ​អត្តសញ្ញាណបណ្ណសញ្ជាតិខ្មែរ និងអធិការដ្ឋាននគរបាលខណ្ឌទាំង ១៤ ព្រមទាំង​ប៉ុស្តិ៍​នគរបាលរដ្ឋ​បាល​ទាំង ១០៥ ត្រូវចាប់ផ្ដើមចុះរៀបចំ និងចុះធ្វើអត្តសញ្ញាណប័ណ្ណសញ្ជាតិខ្មែរ ដល់តាមភូមិ និង​តាម​ខ្នង​ផ្ទះរបស់​ប្រជា​ពល​រដ្ឋ​៕ អត្ថបទ៖ កុម្ភៈ