ភ្នំពេញ : លោកជំទាវវេជ្ជបណ្ឌិត យក់ សម្បត្ដិ រដ្ឋលេខាធិការប្រចាំការក្រសួងសុខាភិបាល និងឯកឧត្តម ឃួង ស្រេង អភិបាលរាជធានីភ្នំពេញ រួមជាមួយឯកឧត្តម ហុក គឹមចេង អគ្គនាយកបច្ចេកទេសសុខាភិបាល និងឯកឧត្តម សុខ សំអាង អគ្គនាយករដ្ឋបាល និងហិរញ្ញវត្ថុ និងមន្ដ្រីបច្ចេកទេសពាក់ព័ន្ធជាច្រើនរូបទៀត នៃក្រសួងសុខាភិបាល និងរដ្ឋបាលរាជធានីភ្នំពេញ នៅរសៀលថ្ងៃទី២ ខែមករា ឆ្នាំ២០២៣នេះ បានអញ្ជើញចុះពិនិត្យមន្ទីរពេទ្យជាតិ តេជោសន្ដិភាព។លោ

កជំទាវវេជ្ជបណ្ឌិត យក់ សម្បត្ដិ បានលើកឡើងថា មន្ទីរពេទ្យជាតិ តេជោសន្ដិភាព មានទីតាំងស្ថិតនៅក្នុងសង្កាត់គោករការ ខណ្ឌព្រែកព្នៅ រាជធានីភ្នំពេញ សាងសង់លើផ្ទៃដីទំហំជិត ៨ហិចតា ដែលមានគ្រែសរុប ចំនួន ៩,៥៩៣គ្រែ ហើយមានអគារសរុបចំនួន ១១អគារ រួមមាន៖ អគារ A, S, E, H1,H2,H3,H4,H5,H6,H7, T1,T2 ដែលអគារនីមួយៗសុទ្ធតែមានមុខងារសំខាន់ៗជាពិសេស អគារ T1,T2 ជាពិសេសមន្ទីរពេទ្យជាតិ តេជោសន្ដិភាពដ៏ធំមួយនេះ គ្រោងនឹងបញ្ចប់ការសាងសង់រួចរាល់ជាស្ថាពរ និងដាក់ឱ្យដំណើរការជាផ្លូវការ នៅខែមិថុនា ឆ្នាំ២០២៣ខាងមុខនេះ។

លោកជំទាវវេជ្ជបណ្ឌិត យក់ សម្បត្ដិ បានបន្ដថា មន្ទីរពេទ្យជាតិ តេជោសន្ដិភាពនេះ នឹងក្លាយជាមន្ទីរពេទ្យជាតិធំជាងគេនៅក្នុងប្រទេសកម្ពុជា ដែលនឹងផ្ដល់នូវសេវាគ្រប់ផ្នែកទាំងអស់ ជូនបងប្អូនប្រជាពលរដ្ឋក្មេង ចាស់ ប្រុស ស្រីទូទាំងប្រទេស ជាពិសេសអ្នកជំងឺមកពី១៤ខណ្ឌ នៅក្នុងរាជធានីភ្នំពេញ ព្រមទាំងអ្នកជំងឺដែលមកពីខេត្ដកណ្ដាល និងខេត្ដកំពង់ស្ពឺ ដែលជាព្រំប្រទល់ជាប់នឹងរាជធានីភ្នំពេញ។ លើសពីនោះ ក្នុងករណីដែលមានជំងឺឆ្លងលក្ខណៈទ្រង់ទ្រាយធំ គឺមន្ទីរពេទ្យជាតិ តេជោសន្ដិភាពដ៏ធំមួយនេះ អាចមានលទ្ធភាព ក្នុងការទទួលអ្នកជំងឺដោយមិនមានការព្រួយបារម្ដនោះទេ ពិសេសជាមួយនឹងការបំពាក់សម្ភារៈបរិក្ខារវេជ្ជសាស្ត្រទំនើបៗស្របតាមលក្ខណៈស្តង់ដា។

លោកជំទាវរដ្ឋលេខាធិការប្រចាំការក្រសួងសុខាភិបាល បានបញ្ជាក់ថា មន្ទីរពេទ្យជាតិនេះ គឺជាការផ្ដួចផ្ដើមដោយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃកម្ពុជា ហើយនៅក្នុងថ្ងៃខាងមុខនេះ ប្រមុខដឹកនាំកម្ពុជាដ៏ឆ្នើមតែមួយគត់ នឹងមានគម្រោងអញ្ជើញចុះពិនិត្យវឌ្ឍនភាពនៃការសាងសង់អគារមន្ទីរពេទ្យជាតិ តេជោសន្ដិភាពផងដែរ៕ អត្ថបទ រដ្ឋា