រុស្ស៊ី៖ រុស្ស៊ីកាលពីថ្ងៃចន្ទបានទទួលស្គាល់ថា ទាហានដ៏ច្រើនរបស់ខ្លួនបានស្លាប់នៅក្នុងការវាយប្រហារមួយ ក្នុងចំណោមការវាយប្រហារដ៏ខ្លាំងក្លាជាច្រើនក្នុងសង្គ្រាមអ៊ុយក្រែន ដែលនាំឲ្យមានការទាមទារពីក្រុមអ្នកសរសេរប្លុកជាតិនិយមរុស្ស៊ីឲ្យដាក់ទោសក្រុមមេបញ្ជាការកងទ័ព ដែលឲ្យទាហានស្នាក់នៅកន្លែងស្តុកគ្រាប់រំសេវ។
ក្រសួងការពារជាតិរុស្ស៊ីបាននិយាយថា ទាហាន ៦៣នាក់បានស្លាប់នៅក្នុងការផ្ទុះដ៏ធំមួយ ដែលបានបំផ្លាញបន្ទាយបណ្ដោះអាសន្ននៅក្នុងអតីតមជ្ឈមណ្ឌលវិជ្ជាជីវៈក្នុងទីក្រុង Makiivka ជាទីក្រុងភ្លោះនៃតំបន់ Donetsk ក្នុងភាគខាងកើតប្រទេសអ៊ុយក្រែនដែលត្រូវបានគ្រប់គ្រងដោយរុស្ស៊ី។ ក្រសួងដដែលនិយាយថា កន្លែងស្នាក់នៅនេះត្រូវបានវាយប្រហារដោយគ្រាប់រ៉ូកែតចំនួន ៤គ្រាប់ពីជើងទម្រប្រព័ន្ធបាញ់គ្រាប់រ៉ូកែត HIMARS ផលិតដោយសហរដ្ឋអាមេរិក ដោយអះអាងថា រ៉ូកែតចំនួន ២គ្រាប់ត្រូវបានបាញ់ទម្លាក់។ ចំណែកទីក្រុង Kyiv និយាយថា ចំនួនអ្នកស្លាប់សរុបរបស់ទាហានរុស្ស៊ីមានរហូតដល់រាប់រយនាក់ ទោះបីជាក្រុមមន្ត្រីគាំទ្ររុស្ស៊ីបានហៅថា ជាការវាយប្រហារដ៏ធ្ងន់ធ្ងរក៏ដោយ។
ក្រុមអ្នកសរសេរប្លុករុស្ស៊ីបាននិយាយថា ការបំផ្លិចបំផ្លាញដ៏ធំនេះដោយសារតែការស្នាក់នៅក្នុងបន្ទាយអគារតែមួយជាមួយឃ្លាំងស្តុកគ្រាប់រំសេវ ទោះបីក្រុមមេបញ្ជាការទាំងនោះដឹងថា វាជាគោលដៅនៃគ្រាប់រ៉ូកែតរបស់អ៊ុយក្រែនក៏ដោយ។ ដោយឡែកខាងភាគីអ៊ុយក្រែនវិញបាននិយាយកាលពីថ្ងៃចន្ទថា ខ្លួនបានបាញ់ទម្លាក់យានដ្រូនរុស្ស៊ីទាំងអស់ ៣៩គ្រឿងដែលបានបាញ់នៅក្នុងយប់ទី៣ នៃការវាយប្រហារលើគោលដៅជនស៊ីវិល និងហេដ្ឋារចនាសម្ព័ន្ធថាមពលក្នុងរដ្ឋធានី Kyiv និងទីក្រុងនានាផ្សេងទៀត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
