ភ្នំពេញ៖ បណ្ណាល័យជាតិ កំពុងរៀបចំរក្សាទុកនូវឯកសារសំខាន់ៗផ្សេងៗ ​ក្នុងប្រព័ន្ធបច្ចេកវិទ្យា ដើម្បីធ្វើឱ្យមានភាពងាយស្រួលដល់ការសិក្សាស្រាវជ្រាវ ​ខណៈឯកសារនៅក្នុងបណ្ណាល័យមួយនេះ កំពុងមានអ្នក ​ចាប់អារម្មណ៍អានច្រើន ​ពីមួយឆ្នាំទៅមួយឆ្នាំ ​ទាំងជនជាតិខ្មែរ ​និងបរទេស ។

ក្នុងកិច្ចសម្ភាសន៍ជាមួយBTV នៅថ្ងៃទី៣ ខែមករា នេះ លោកស្រី ខ្លូត វិបុលឡា ប្រធានបណ្ណា ល័យជាតិ និងជាអនុប្រធាននាយកដ្ឋានសៀវភៅ និងការអាន នៃក្រសួងវប្បធម៌ និងវិចិត្រសិល្បៈ បានឱ្យដឹងថា បច្ចុប្បន្ន បណ្ណាល័យជាតិ មានតម្កល់ទុកនូវក្រាំង សាស្ដ្រាស្លឹករឹត ឯកសារ និងសៀវភៅចាស់ថ្មី ជាង ១២ម៉ឺនក្បាល ដែលជាច្បាប់ និងរដ្ឋបាលសម្រាប់ប្រទេសកម្ពុជា និងឥណ្ឌូចិន ក៏ដូចជាសៀវភៅអំពីសិល្បៈ សាសនា ការធ្វើដំណើរ និងប្រវត្តិសាស្ត្រកម្ពុជាផងដែរ ។

លោកស្រី បានបញ្ជាក់ថា ដើម្បីថែរក្សាឯកសារទាំងអស់នេះឲ្យកាន់តែគង់វង្ស ​បណ្ណាល័យជាតិ បាន​រៀបចំរក្សាទុកឯកសារសំខាន់ៗ​ មានដូចជាសៀវភៅ កាសែត ទស្សនាវដ្ដី សាស្ត្រាស្លឹករឹត និងរូបភាព ចំណាស់ៗក្នុងប្រព័ន្ធបច្ចេកវិទ្យា ដែលនឹងកាន់តែផ្ដល់នូវភាពងាយស្រួលដល់អ្នកអាន ស្រាវជ្រាវ ព្រោះឯក សារនោះ ​មានទាំងខ្មែរ និងភាសារបារាំង ជាដើម ។

ព្រះរតនៈវិសុទ្ធិវង្ស គាន សារ៉ាត់ ព្រះរាជាគណៈកិត្តិយស ​និងជាព្រះគ្រូសូត្រវត្តព្រះពុទ្ធ ឃោសា ចារ្យ (វត្តចិនដំដែក) ​មានថេរៈដីកាគាំទ្រចំពោះសកម្មភាពបំផុសការអាន ​ដែលមានប្រយោជន៍ និងជួយ ​បង្កើតពុទ្ធិដល់អ្នកអាន ក៏ដូចជាលើកស្ទួយវិស័យអប់រំនៅកម្ពុជា តាមរយៈការបង្កើត​បណ្ណាល័យ ការតាំង ពិព័រណ៍ ឬកម្មវិធីផ្សេងៗរបស់រាជរដ្ឋាភិបាល និងដៃគូនានា ។

លោកស្រី ខ្លូត វិបុលឡា បានបញ្ជាក់ថា កំណើនអ្នកចូលអាន ​ឬសិក្សាស្រាវជ្រាវ ក្នុងបណ្ណាល័យ ជាតិ មានការកើនឡើងពីមួយឆ្នាំទៅមួយឆ្នាំ ​ជាពិសេសនិស្សិត ដែលធ្វើសារណាបញ្ចប់ការសិក្សា ដែល កាលពីឆ្នាំ២០២២ ​មានអ្នកចូលអានប្រមាណជាង១ម៉ឺននាក់ ​ខណៈបណ្ណាល័យជាតិ ក៏បាន​រៀបចំតាំង ពិព័រណ៍សៀវភៅ ចំនួន៩លើកមកហើយ ​ដើម្បីលើកស្ទួយដល់ការអានសៀវភៅ និង​លើកទឹកចិត្តដល់អ្នក និពន្ធ និងស្រាវជ្រាវ ៕ អត្ថបទ៖ បាន សុខរិទ្ធិ