​ចិន៖ ការ​តាំង​បង្ហាញ​ភ្លើង​ដ៏​ស្រស់​ត្រកាល​កំពុង​បំភ្លឺ​ផ្ទៃមេឃ ​នាពេល​រាត្រី​នៅក្នុង​ទីក្រុង Nanjing នៃ​ខេត្ត Jiangsu នៅ​ភាគ​ខាងកើត និង​ទីក្រុង Guiyang នៃ​ខេត្ត Guizhou ក្នុង​ភាគ​និរតីដើម្បី​ប្រារព្ធ​ពិធី​ឆ្នាំ​ថ្មី និង​ស្វាគមន៍​ពិធីបុណ្យ​ចូលឆ្នាំ​ចិន​នា​ពេល​ខាងមុខ​។

​ពិធីបុណ្យ​និទាឃៈ​រដូវ ឬ​ចូល​ឆ្នាំថ្មី​តាម​ចន្ទគតិ​របស់​ចិន គឺជា​ពិធីបុណ្យ​ដ៏​ធំ​បំផុត​តាម​ប្រពៃណី​របស់​ចិន​ នៅ​ពេល​ដែល​មនុស្ស​ទូទាំង​ប្រទេស​វិលត្រឡប់​ទៅកាន់​ស្រុក​កំណើត ​ដើម្បី​ជួបជុំ​ក្រុម​គ្រួសារ​។ ពិធីបុណ្យ​និទាឃៈ​រដូវ​ដែល​នឹង​ចូល​មកដល់​នា​ពេល​ខាង​មុខ ឆ្នាំថោះ​នឹង​ចូល​មកដល់​នៅ​ថ្ងៃ​ទី​២២ ខែ​មករា ​ឆ្នាំ​២០២៣​។ ​នៅ​ក្នុង​ទីក្រុង Nanjing ពិធីបុណ្យ​ចង្កៀង​គោម Qinhuai Lantern Festival លើក​ទី​៣៧ របស់​ចិន បាន​បើក​កាលពី​ថ្ងៃ​សៅរ៍​នៅ​ថ្ងៃ​ឆ្លង​ឆ្នាំ​ថ្មី​ដើម្បី​ប្រារព្ធ​ពិធីបុណ្យ​នេះ។ កន្លែង​កម្សាន្ត​ជាង​ ៣០ អំពូល​ភ្លើង ​LED និង​ចង្កៀង​គោម​ជាច្រើន​ត្រូវ​បាន​បង្កើត​ចេញ​ជា​រូបភាព​ផ្សេងៗ​គ្នានៃ​គំនូរជីវចល​ទន្សាយ និង​រឿង​គំនូរជីវចល​បែប​វិទ្យាសាស្ត្រ​សត្វ​ទន្សាយ ដើម្បី​ធ្វើ​ឲ្យ​ឆ្នាំ​ថ្មី​កាន់តែ​រីក​រាយ​។

​ដើម្បី​ទាក់ទាញ​ភ្ញៀវ​ទេសចរ ក្រុម​អាជ្ញាធរ​ក្នុង​ទីក្រុង Guiyang បាន​តុបតែង​អំពូល​ភ្លើង​ចម្រុះ​ពណ៌​នៅ​ក្នុង​ទីតាំង​មួយ​ដែល​គេ​ហៅថា Moly Town នៅ​ក្នុង​តំបន់ Penglai អំឡុង​ការ​ឈប់​សម្រាក​ឆ្នាំ​ថ្មី​ដែល​មាន​រយៈពេល ​៣​ថ្ងៃ​ចាប់ផ្ដើម​ពី​ថ្ងៃ​សៅរ៍។ ​លោក Liu Qian ​ប្រធាន​ក្រុមហ៊ុន​ផ្ដល់​សេវា​ធ្វើដំណើរ​អន្តរជាតិ​ទេសចរណ៍ ​និង​ការ​វិនិយោគ Co., LTD របស់​ខេត្ត Guizhou បាន​និយាយ​ថា យើង​បាន​រៀប​ចំ​ព្រឹត្តិការណ៍​នេះ​ឡើង​ ដើម្បី​ប្រារព្ធ​ពិធីបុណ្យ​តាំង​ចង្កៀង​គោម​ឆ្នាំ​២០២៣ នៅ Moly Town ក្នុង​តំបន់ Penglai ដើម្បី​លា​ឆ្នាំ​ចាស់​២០២២ និង​ទទួល​ឆ្នាំ​ថ្មី ក្នុង​ការ​ស្ដារ​ទំនុក​ចិត្ត​ឡើងវិញ​ក្នុង​ឧស្សាហកម្ម​ទេសចរណ៍ និង​វប្បធម៌ ក្រោយ​ការ​បន្ធូរបន្ថយ​វិធានការ​ទប់ស្កាត់​ការ​ឆ្លង​រាលដាល​វីរុស COVID-19​។ យើង​សង្ឃឹមថា ​ប្រជាពលរដ្ឋ​នឹង​ចូលរួម​ក្នុង​សកម្មភាព​វប្បធម៌​របស់​យើង​៕ អត្ថបទ៖ សុខមាន