កណ្ដាល៖ មន្ទីរសុខាភិបាលខេត្តកណ្តាល នឹងបើកយុទ្ធនាការចាក់វ៉ាក់សាំងកូវីដ-១៩ ដូសទី៦ នៅថ្ងៃទី៩ មករាខាងមុខ ​ដែលជាការពង្រីកបន្ថែមការចាក់វ៉ាក់សាំងការពារកូវីដ១៩ ​ដូសជំរុញនៅ នៅ​តាមមូលដ្ឋានសុខាភិបាលនានា ​តាមសាលារៀន ​រោងចក្រ និងតាមខ្នងផ្ទះតាម​សហគមន៍​នានា។

វេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាលខេត្តកណ្តាល ​បានថ្លែងឲ្យBTV នៅដឹងនៅ​ថ្ងៃទី៣ ខែមករានេះថា សម្រាប់ការចាក់វ៉ាក់សាំងការពារកូវីដ១៩ ​ដូសទី៦ថ្មីនេះ ក្នុងដំណាក់កាល​ដំបូង គឺមាននៅតាមមូលដ្ឋានសុខាភិបាលនានាដូចជា​នៅតាមមន្ទីរពេទ្យបង្អែក និង​មណ្ឌល​សុខភាព​ប្រមាណ ១០៦កន្លែងនៅទូទាំងខេត្តកណ្តាល ហើយនឹងមានការចុះចាក់​នៅ​តាមមន្ទីរអង្គភាពនានាជុំវិញ​ ប្រសិនបើ ​មន្ទីរអង្គភាពទាំងអស់នោះ ដាក់សំណើរឲ្យក្រុម​ពេទ្យចុះចាក់។

វេជ្ជបណ្ឌិត លី មករា ប្រធានមន្ទីរពេទ្យបង្អែកជ័យជំនះ ​បានថ្លែងថា នៅពេលនេះ ក្រុមពេទ្យ​បាន​ត្រៀមខ្លួនរួចរាល់ហើយ ​បើកដំណើរការចាក់វ៉ាក់សាំងតាមគោលការណ៍ណែនាំថ្នាក់ដឹកនាំ ខណៈបច្ចុប្បន្ន មានពលរដ្ឋមកពីគ្រប់ទិសទី បាននាំគ្នាមកចាក់វ៉ាក់សាំងនៅមន្ទីរពេទ្យជ័យជំនះនេះ​ច្រើនហូរហែរដែរ។

ដំណើរការចាក់វ៉ាក់សាំងនៅមន្ទីរពេទ្យជ័យនោះដែរ ​គឺមានពលរដ្ឋជាច្រើន ក៏បាននាំគ្នាសាកសួរ​ក្រុមពេទ្យ​អំពីការសុំចាក់វ៉ាក់សាំងដូសទី៦នោះដែរ ដើម្បីបង្កើនការពង្រឹងភាពស៊ាំ និងទប់ស្កាត់​ការឆ្លង​កើត​ជំងឺកូវីដ១៩ ​បង្កការរំខានការធ្វើការងារ​ និងការប្រកបរបររកចំណូលនានាទៀត។

តាមរបាយការណ៍មន្ទីរសុខាភិបាលខេត្តកណ្តាល ​គិតមកដល់ថ្ងៃទី៣ ​ខែមករាឆ្នាំ២០២៣នេះ ទូទាំងខេត្ត ​មានពលរដ្ឋទៅចាក់វ៉ាក់សាំងដូសទី២ ​មានចំនួនជាង ​១លាន១៣ម៉ឺននាក់ ស្មើនឹង​១០៨% ចាក់ដូសទី៣ មានចំនួន៩៩ម៉ឺននាក់ស្មើនឹង៩៥% ​ចាក់ដូសទី៤មានប្រមាណ៣៤% ដោយឡែក ​ដូសទី៥មានពលរដ្ឋទៅចាក់បានប្រមាណតែ ៦%ប៉ុណ្ណោះ ៕អត្ថបទ ស៊ុម សុខជា