ភ្នំពេញ៖ ស្របទៅតាមអនុសាសន៍ណែនាំរបស់សម្តេចតេជោ ហ៊ុន សែន នាយករដ្ឋមន្រ្តី នៃ​ព្រះរាជាណាចក្រ​កម្ពុជា ​អាជ្ញាធរមូលដ្ឋានក្នុងរាជធានីភ្នំពេញ ​បន្តទៅទទួលការចាក់វ៉ាក់សាំង​បង្ការជំងឺកូវីដ-១៩ ដូសជំរុញ ទី៦ ​ដើម្បីបង្កើនអង់ទីគ័រក្នុង​សារ​ពាង្គកាយ​ទប់ទល់​នឹង​ការវាយលុកពីជំងឺនេះ ។

អាជ្ញាធរនៅសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ​នៅថ្ងៃទី០៣ ខែមករានេះ បានប្រាប់ BTVឲ្យដឹងថា ​ការចាក់វ៉ាក់សាំងកូវីដ-១៩ ដូសជំរុញទី៦ ​ពិតជាមានសារសំខាន់ណាស់ អាច​ជួយបង្ការ ខ្លួនពីហានិភ័យនៃជំងឺកូវីដ-១៩ ​និងរស់នៅធម្មតា ​មិនសូវភ័យខ្លាចពីជំងឺកូវីដ ហើយ​បន្ទាប់ពីចាក់ដូសជំ រុញទី៦រួច សុខភាពធម្មតា ​ដូចគ្នាទៅនឹងការចាក់វ៉ាក់សាំងមុនៗផងដែរ។

ពួកគេ ​បានសំដែងការអរគុណដល់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ដែលសម្រេច ឱ្យមន្រ្តីរាជការ អាជ្ញាធរ ​និងប្រជាពលរដ្ឋទូទៅ ​ទទួលវ៉ាក់សាំងដូសជំរុញជាបន្តបន្ទាប់ ដោយ​ឥតគិតថ្លៃ។

កន្លងទៅថ្មីនេះ គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩​ ក្នុងក្របខណ្ឌទូទាំង​ប្រទេស​បានចេញសេចក្តីជូនដំណឹង ​ស្តីពីដំណើរការចាក់វ៉ាក់សាំងបង្ការជំងឺកូវីដ-១៩ ​ដូសជំរុញទី៤ ដល់ កុមារ អាយុពី៣ឆ្នាំ ដល់ក្រោម៥ឆ្នាំ, ​ចាក់ដូសជំរុញទី៥ ​ដល់កុមារ​ អាយុពី៥ឆ្នាំ ដល់​ក្រោម១២ឆ្នាំ និងដូស ​ជំរុញទី៦ដល់មន្រ្តីជួរមុខ អាជ្ញាធរ ​និងប្រជាពលរដ្ឋទូទៅ​ តាមការស្ម័គ្រចិត្ត។

ការចាក់វ៉ាក់សាំងដូសជំរុញទាំងនេះ ​នឹងចាប់ផ្តើមនៅថ្ងៃទី០៩ ​ខែមករា ​នេះតទៅ ​សម្រាប់មន្រ្តីរាជ ការ ​និងកូនចៅមន្រ្តីរាជការស៊ីវិល នៅថ្នាក់ជាតិ។ ដោយឡែកការចាក់វ៉ាក់សាំងដូសជំរុញក្នុងក្របខណ្ឌ ​រាជធានី-ខេត្ត នឹងត្រូវផ្សព្វផ្សាយសេចក្តីជូន​ដំណឹង​ដោយ​ដែន​សមត្ថកិច្ចរបស់ខេត្តរៀងៗខ្លួន ៕ អត្ថបទ៖ ទូច សោភ័ណ