ភ្នំពេញ៖ គណៈកម្មាធិការអន្តរក្រសួងដឹកនាំដោយឯកឧត្ដម ជា សុផារ៉ា ឧបនាយករដ្ឋមន្រ្ដី រដ្ឋមន្រ្ដី ក្រសួង ដែនដី នគរូបណីយកម្ម និងសំណង់ កំពុងរៀបចំកិច្ចព្រមព្រៀងថ្មីសម្រាប់អាកាសយានដ្ឋាន​អន្តរជាតិភ្នំពេញ និងខេត្តព្រះសីហនុ ខណៈប្រលានយន្តហោះអន្តរជាតិភ្នំពេញថ្មី សាងសង់រួចរាល់​បាន ៥០ ភាគរយ។

នេះបើតាមឯកឧត្ដម ជា អូន រដ្ឋលេខាធិការប្រចាំការ និងអ្នកនាំពាក្យអាកាសចរស៊ីវិល ថ្លែងប្រាប់ BTV នាថ្ងៃទី០៣ ខែមករានេះ។

ឯកឧត្ដម ជា អូន បានថ្លែងថា ការរៀបចំកិច្ចព្រមព្រៀងថ្មីសម្រាប់អាកាសយានដ្ឋានអន្តរជាតិភ្នំពេញ និងខេត្តព្រះសីហនុ ដោយសារប្រលានយន្តហោះបច្ចុប្បន្ន មានទំហំតូចចង្អៀត មិនអាចពង្រីកបាន ដូច្នេះទើបរាជរដ្ឋាភិបាលដោយទទួលបានការវិនិយោគពីក្រុមហ៊ុនខ្មែរនៅក្នុងស្រុកទើបមានការរៀបចំកិច្ចព្រមព្រៀងថ្មី។

ឯកឧត្ដមថ្លែងថា៖«ការរៀបចំកិច្ចព្រមព្រៀងនេះ ​គឺតាមគោលការណ៍ឈ្នះឈ្នះរបស់សម្ដេចតេជោ នាយករដ្ឋមន្រ្ដី ដើម្បីឱ្យប្រទេសកម្ពុជាយើងអាចទទួលជើងហោះហើរ​មកពីប្រទេសឆ្ងាយៗ​បាន​រឹតតែច្រើន​ថែមទៀត ​ពីព្រោះប្រលានយន្តហោះថ្មី យន្តហោះកម្រិតណាក៏យើងអាច​ទទួល​បានដែរ»។

ទាក់ទងនឹងការរៀបចំសេចក្ដីព្រមព្រៀងថ្មីនេះ កាលពីថ្ងៃទី២ ខែមករា ឯកឧត្តម ជា សុផារ៉ា ឧបនាយក​រដ្ឋមន្ត្រី រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ និងជាប្រធាន​គណៈកម្មាធិការ​អន្តរក្រសួងរៀបចំកិច្ចព្រមព្រៀងនេះ បានដឹកនាំកិច្ចប្រជុំគណៈកម្មាធិការ​អន្តរក្រសួង​ដើម្បីពិនិត្យផ្លូវច្បាប់​លើកិច្ចព្រមព្រៀងដែលកំពុងអនុវត្ត​ដើម្បីរៀបចំកិច្ចព្រមព្រៀង​ថ្មី​សម្រាប់អាកាសយានដ្ឋានអន្តរជាតិភ្នំពេញ ​និងខេត្តព្រះសីហនុ។

យោងតាមរបាយការណ៍កិច្ចប្រជុំគណៈកម្មាធិការអន្តរក្រសួង ​កិច្ចប្រជុំកាលពីថ្ងៃទី២ ​ខែមករានេះ គឺដើម្បីពិនិត្យផ្លូវច្បាប់លើកិច្ចព្រមព្រៀងដែល​កំពុងអនុវត្ត ដើម្បីរៀបចំកិច្ចព្រមព្រៀងថ្មី​សម្រាប់​អាកាសយានដ្ឋាន​អន្តរជាតិភ្នំពេញ​ និងខេត្តព្រះសីហនុ៕ អត្ថបទ៖ វ៉ន ដារ៉ា