ឧត្តរមានជ័យ៖ ដើម្បីរឹតចំណងមិត្តភាពកម្ពុជា-ថៃ តាមខេត្តជាប់បន្ទាត់ព្រំដែន ឱ្យកាន់តែមានភាព​ស្និតស្នាល​បន្ថែមទៀត នាព្រឹកថ្ងៃទី០៣ខែមករាឆ្នាំ២០២៣នេះ ​រដ្ឋបាលខេត្ដរមានជ័យ បានរៀបចំ​ពិធីសូត្រមន្តរាប់បាត្រឆ្លងឆ្នាំថ្មី២០២៣ កម្ពុជា-ថៃ ។

ពិធីនេះ ធ្វើឡើងក្រោមអធិបតីភាពឯកឧត្តម ប៉ែន កុសល្យ អភិបាលខេត្តឧត្តរមានជ័យ នៃព្រះរាជាណាចក្រកម្ពុជា និងឯកឧត្តម សាំរួយ កេតគុន អភិបាលខេត្តស៊ីសាកេត នៃព្រះរាជាណាចក្រថៃ នៅច្រកទ្វារព្រំដែនអន្តរជាតិជាំ-សាងាំ ក្នុងស្រុកអន្លង់វែង ខេត្តឧត្តរមានជ័យ ដោយមានសមាសភាពទាំងភាគីកម្ពុជា ថៃ ចូលរួមជាង៦០០នាក់ផងដែរ។

ក្នុងពិធីនោះឯកឧត្ដម ប៉ែន កុសល្យ បានលើកឡើងថា ​ពិធីនេះ​រៀបចំឡើង គឺ​ដើម្បី​កិច្ច​សហប្រតិបត្តិការ​ល្អ​ ធ្វើឱ្យ​ខេត្តព្រំដែនរក្សាទាំង២ បាននូវសុខសន្តិភាព ​សុវត្ថិភាព សន្តិសុខ​សណ្តាប់ធ្នាប់​ល្អ ជូនប្រជាពលរដ្ឋដែល ​កំពុងរស់នៅ ​ជាប់បន្ទាត់ព្រំដែននៃប្រទេសទាំងពីរផងដែរ។

ឯកឧត្តម បន្តថា ​អ្វីៗអស់ទាំងនេះ​គឺបាន​មក​ពី​ការ​ខិតខំប្រឹងប្រែង​របស់ថ្នាក់ដឹកនាំនៃ ​ប្រទេស​ទាំងពីរ​ព្រមជាមួយ​នឹងអាជ្ញាធរ មូលដ្ឋាន ខេត្តជាប់ព្រំដែនឧត្តរមានជ័យ ​ស៊ីសាកេត​ សហការគ្នាបានល្អ ទើប​ធ្វើឱ្យមានការទំនាក់ទំនង ​នេះកាន់តែមានការរីកចម្រើនជាបន្តបន្ទាប់ ​ស្ទើរគ្រប់វិស័យ ​រហូតដល់ បច្ចុប្បន្ននេះ។

យ៉ាងណាម៉ិញខេត្តយើងទាំងពីរ ​ក៏បានខិតខំយកចិត្តទុកដាក់រិះរករាល់វិធីសាស្រ្តល្អៗ​បន្ថែមទៀត ដើម្បី​យក​មក​សហការគ្នា ​ឱ្យបានកាន់តែប្រសើរជាងនេះផងដែរ ​ពិសេសនោះការទប់ស្កាត់​រាល់​បទល្មើស​ឆ្លងដែននានា។

ជាមួយគ្នានោះឯកឧត្តម សាំរួយ កេតគុន អភិបាលខេត្តស៊ីសាកេត បានថ្លែងអំណ​អរគុណ ដល់​អាជ្ញាធរខេត្តឧត្តរមានជ័យ ​ដែល​តែងតែ​សហការ​គ្នា​បាន​យ៉ាង​ល្អ​ជាប់​ជាប្រចាំ​ ជាក់​ស្ដែង​នៅ​ថ្ងៃនេះយើង ​បាន​ប្រារព្ធ​ពិធីរួមគ្នា ​សម្រេច​បាន​ជោគជ័យ ​សម្រាប់​ប្រជាពលរដ្ឋ ​ដែលរស់​នៅ​ខេត្តជាប់បន្ទាត់ ព្រំដែននៃប្រទេសទាំងពីរ ៕អត្ថបទ៖ សារិទ្ធ