​ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នាព្រឹកថ្ងៃទី៣ មករា ឆ្នាំ២០២៣នេះ បាន​ទទួល​ជួប​ឯកឧត្ត​មបណ្ឌិត កៅ គឹមហួន អគ្គលេខាធិការអាស៊ានសម្រាប់អាណត្តិឆ្នាំ២០២៣-២០២៧ ដើម្បីសំដែងការគួរសម ពិភាក្សាការងារ និងជម្រាបលាទៅបំពេញភារកិច្ចថ្មីនៅរដ្ឋធានីហ្សាការតា នៃប្រទេសឥណ្ឌូនេស៊ី។

​នៅក្នុងជំនួបនេះ ឯកឧត្តមរដ្ឋមន្រ្តី ប៉ាន សូរស័ក្តិ បានសម្តែងនូវការអបអរសាទរ ជូនចំពោះឯកឧត្តមបណ្ឌិត ដែល​ត្រូវ​បាន​សម្តេចនាយករដ្ឋមន្ត្រី ផ្តល់នូវទំនុកចិត្តខ្ពស់សម្រាប់ដំណែងជាអគ្គលេខាធិការអាស៊ាន ប្រកបដោយកិត្តិយស ក្នុង​នាម​កម្ពុជា និងប្រជាជនកម្ពុជាទាំងមូល។

ឯកឧត្តមរដ្ឋមន្រ្តី សង្ឃឹមយ៉ាងមុតមាំថា នៅក្នុងអាណត្តិ ៥ឆ្នាំ នៃការដឹកនាំ​របស់​ឯកឧត្តម​បណ្ឌិត​អគ្គលេខា​ធិការ​អាស៊ា​ន ​នឹងសម្រេចបាននូវសមិទ្ធផលថ្មីៗសំខាន់ៗបន្ថែមទៀត សម្រាប់សសរស្តម្ភទាំង៣ ដើម្បី​ឈានឆ្ពោះ​ទៅរក​ការកសាង​សហគមន៍អាស៊ាន ដែលប្រកបដោយបរិយាប័ន្ន ភាពធន់រឹងមាំ និងចីរភាព ជា​ពិសេស​ក្នុង​ការកសាង​នូវសហគមន៍​សេដ្ឋកិច្ច​អាស៊ាន ដែលបច្ចុប្បន្នយើងទាំងអស់គ្នាកំពុងតែប្រឈមមុខនឹងវិបត្តិជំងឺរាតត្បាតកូវីដ-១៩ និង​ការ​ប្រកួត​ប្រជែង​ភូមិសាស្ត្រនយោបាយសាកល។

ជាការឆ្លើយតប ឯកឧត្តម កៅ គឹមហួន បានសម្តែងការអរគុណជូនចំពោះឯកឧត្តមរដ្ឋមន្រ្តី និងសហការីក្រសួង​ពាណិជ្ជ​ក​ម្ម ចំពោះការទទួលស្វាគមន៍យ៉ាងកក់ក្ដៅ និងបានពិភាក្សាការងារប្រកបដោយអត្ថន័យ និងខ្លឹមសារសំខាន់ៗ ជាពិសេសការផ្ដល់អនុសាសន៍ល្អសម្រាប់ការកសាងសហគមន៍សេដ្ឋកិច្ចអាស៊ាន។ បន្ថែមពីនេះទៀត ឯកឧត្តម បាន​សំដែង​នូវការអបអរសាទជូនចំពោះ ឯកឧត្តមរដ្ឋមន្រ្តី ចំពោះការទទួល​បានជោគជ័យ​លើការដឹកនាំ​កិច្ចប្រជុំ​រដ្ឋមន្រ្តី​សេដ្ឋ​កិច្ច​អាស៊ាន និងកិច្ចប្រជុំពាក់ព័ន្ធក្រោមភាពជាប្រធានអាស៊ានរបស់កម្ពុជានាឆ្នាំ២០២២កន្លងទៅ៕ អត្ថបទ៖ ឈិត បូរ៉ាវី