ភ្នំពេញ៖ វិស័យឯកជន ចាត់ទុកគម្រោងបញ្ជរតែមួយជាតិរបស់រាជរដ្ឋាភិបាល បានចូលរួមចំណែកដល់វិស័យឯកជន លើការពន្លឿន និងសម្រួលការពាណិជ្ជកម្ម ជាពិសេសការកាត់បន្ថយនូវខ្ទង់ចំណាយ កាត់បន្ថយថ្លៃដើមឲ្យធ្លាក់ទាប នឹងបានផ្តល់នូវទំនុកចិត្តដល់ប្រតិបត្តិការអាជីវកម្មក្នុងវិស័យឯកជន។

​លោកឧកញ៉ា គួច ផេង អនុប្រធានសភាពាណិជ្ជកម្មកម្ពុជា លើកឡើងលើកឡើងនៅក្នុងកិច្ចប្រជុំលើកទី៣ នៃ​គណៈ​កម្មា​ធិការ​ដឹកនាំគម្រោងបញ្ជរតែមួយជាតិ នៅថ្ងៃទី៣ ខែមករា ឆ្នាំ២០២៣ នេះថា ការអនុវត្តបញ្ជារ​តែមួយ​ជាតិ​របស់​រាជរដ្ឋាភិបាល ពិតជាមានសារៈសំខាន់បំផុត មិនត្រឹមតែវិស័យឯកជនទេ គឺទាំងការគ្រប់គ្រង​អភិបាលកិច្ចវិស័យ​សាធារណៈ ជាក់ស្តែងការអនុវត្តគម្រោងក្នុងដំណាក់កាលទី១ និងទី២ កន្លងមកនេះ គឺបានជួយ​សម្រួល​ដល់​ប្រតិបត្តិនៃវិស័យឯកជនជាច្រើន ពាក់ព័ន្ធការរៀបចំឯកសារ និងការស្នើសុំនាំចេញ-ចូល, គឺជួយ​សម្រួលការងារ​នេះ​បាន​លឿនជាងមុន ជាពិសេសការកាត់បន្ថយនូវខ្ទង់ចំណាយមួយចំនួន និងការកាត់បន្ថយថ្លៃដើមឲ្យធ្លាក់ទាបជាដើម, ដូច្នេះ ការអនុវត្តបញ្ជរតែមួយជាតិ ដោយបានផ្តល់នូវទំនុកចិត្ត និងបានកំពុងចូលរួមលើក​កម្ពស់ដល់​ប្រតិបត្តិការ​ក្នុង​វិស័យឯកជន​។

​ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង​ជា​ប្រធាន​គណៈ​កម្មាធិការដឹកនាំគម្រោងបញ្ជរតែមួយជាតិ លើកឡើងថា ជុំវិញការអនុវត្តគម្រោងបញ្ជរតែមួយជាតិ មានវិសាល​ភាព​គ្រប់គ្រងបានយ៉ាងល្អ ក្នុងនោះ ក្រៅពីការជួយសម្រួលដល់វិស័យឯកជន បញ្ជរនេះ​បានជួយ​លើកកម្ពស់​ប្រសិទ្ធ​ភាព និងសក្តិសិទ្ធភាព នៃការសម្រួលផ្នែកពាណិជ្ជកម្ម ដោយរាប់បញ្ជូលទាំងការបញ្ចេញទំនិញពីគយ និងរដ្ឋាករ​កម្ពុជា ដែលការងារទាំងអស់នេះ គឺជាប្រសិទ្ធភាពនៃការគ្រប់គ្រង រួមជាមួយការប្រមូលចំណូលផងដែរ ជាពិសេស​ជាង​នេះទៀត ការអនុវត្តប្រព័ន្ធនេះ គឺជាការពង្រឹងនូវអភិបាលកិច្ច ការបង្កើននូវតម្លាភាពការងារ ការកាត់​បន្ថយ​នូវ​លិខិត​ស្នាមផ្សេងៗ និងកាត់បន្ថយនូវពេលវេលា និងប្រាក់កាសជាដើម។

សូមបញ្ជាក់ថា៖ គម្រោងបញ្ជារតែមួយជាតិដំណាក់កាលទី៣ ត្រូវបានពន្យារពេលវេលាមកអនុវត្តក្នុងឆ្នាំ ២០២២ ដោយ​សារការរីករាលដាលជំងឺកូវីដ១៩ ដោយបានប្រកាសដាក់ឲ្យប្រើប្រាស់នៅដើមឆ្នាំ ២០២៣ នេះ ដោយ​គម្រោងនេះ សម្រេចធ្វើវិភាជថវិការបស់រាជរដ្ឋាភិបាល ក្នុងនោះ មានក្រសួង-ស្ថាប័នចំនួន ១០ ត្រូវអនុវត្តបន្តរួមមាន៖ ក្រសួង​មហាផ្ទៃ, ក្រសួងការពារជាតិ, ក្រសួងសេដ្ឋកិច្ច និងហិរញ្ញវត្ថុ (គឺគណៈកម្មការគ្រប់​ត្រងល្បែង​ពាណិជ្ជកម្ម​កម្ពុជា), អគ្គនាយកដ្ឋានសហប្រតិបត្តិការអន្តរជាតិ និងគ្រប់គ្រងបំណុល, ក្រសួងរ៉ែ និងថាមពល, ក្រសួងវប្បធម៌ និង​វិ​ចិត្រសិល្បៈ, ក្រសួងប្រៃសណីយ៍ និងទូរគមនាគមន៍, ក្រសួងបរិស្ថាន, ធនាគារជាតិនៃកម្ពុជា, និងក្រសួងកសិកម្ម រុក្ខាប្រមាញ់ និងនេសាទ (អគ្គនាយកដ្ឋានផ្សេងបន្ថែម)៕ អត្ថបទ៖ សុន រ៉ាឌី