បាល់ទាត់៖ សហព័ន្ធកីឡាបាល់ទាត់កម្ពុជាបានប្រកាសថា លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា អស់តួនាទីជាមួយក្រុមជម្រើសជាតិកម្ពុជា ឬក្រុមធំហើយ ក្រោយចំណាយពេលជិត ៤ឆ្នាំកន្លះ តែលោកនៅសល់ភារកិច្ចជាមួយក្រុមជម្រើសជាតិ U22 កម្ពុជា ដែលត្រូវដឹកនាំក្នុងការប្រកួតកីឡាស៊ីហ្គេមឆ្នាំ២០២៣ នៅកម្ពុជា។
ការប្រកាសនេះ ស្របពេលលោក Keisuke Honda ថ្លែងសារលាគ្នាជាមួយកូនក្រុម បន្ទាប់ពីលោកដឹកនាំក្រុមជម្រើសជាតិកម្ពុជាប្រកួតជាមួយក្រុមជម្រើសជាតិថៃ ក្នុងពានរង្វាន់បាល់ទាត់ជើងឯកអាស៊ីអាគ្នេយ៍ឆ្នាំ២០២២ កាលពីថ្មីៗ ដែលជាការដឹកនាំក្រុមធំលើកចុងក្រោយរបស់លោកក្នុងនាមអ្នកចាត់ការទូទៅ ក្រោយចំណាយពេលជិត ៤ឆ្នាំកន្លះ គិតចាប់ពីខែសីហា ឆ្នាំ២០១៨ ដល់ខែមករា ឆ្នាំ២០២៣។ យ៉ាងណាក្ដីអតីតកីឡាករជម្រើសជាតិជប៉ុនរូបនេះ នៅសល់ភារកិច្ចដ៏សំខាន់ចុងក្រោយមួយទៀត ក្នុងនាមគ្រូបង្វឹកក្រុមជម្រើសជាតិអាយុក្រោម ២២ឆ្នាំកម្ពុជា ដែលត្រូវធ្វើការប្រមូលផ្ដុំហ្វឹកហាត់នាខែកុម្ភៈខាងមុខ សម្រាប់ត្រៀមការប្រកួតកីឡាស៊ីហ្គេមលើកទី៣២ នាខែឧសភា ឆ្នាំ២០២៣ នៅកម្ពុជា។ នេះបើតាមការបញ្ជាក់លើទំព័រហ្វេសប៊ុកផ្លូវការ របស់សហព័ន្ធកីឡាបាល់ទាត់កម្ពុជាកាលពីម្សិលមិញ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
