បាល់ទាត់៖ នៅថ្ងៃទី២១ ខែមេសានេះ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) និងគណៈកម្មាធិការជាតិអូឡាំពិកកម្ពុជា (NOCC) បានបើកកិច្ចប្រជុំតាម Online មួយដើម្បីជំរុញការធ្វើស្វ័យហ្វឹកហាត់ របស់ក្រុមជម្រើសជាតិគ្រប់ប្រភេទកីឡាក្នុងដំណាក់កាលបិទខ្ទប់ ក៏ដូចជាការរីករាលដាលខ្លាំងនៃជំងឺកូវីដ-១៩ ដើម្បីត្រៀមការប្រកួតកីឡាស៊ីហ្គេមលើកទី៣១ នៅវៀតណាមនាចុងឆ្នាំ២០២១។
កិច្ចប្រជុំនេះដឹកនាំដោយឯកឧត្តម វ៉ាត់ ចំរើន អគ្គលេខាធិការ CAMSOC និងជាអគ្គលេខាធិការ NOCC ដោយមានការកោះអញ្ជើញចូលរួមពីសំណាក់សហព័ន្ធកីឡាជាតិ និងគ្រូបង្វឹកក្រុមជម្រើសជាតិគ្រប់ប្រភេទកីឡា ក្នុងនោះក៏មានការចូលរួមពីឯកឧត្តម អ៊ុក សិទ្ធជាតិ អគ្គនាយកនៃអគ្គដ្ឋានកីឡដ្ឋាន និងលោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា ដើម្បីជជែកលើប្រធានបទដ៏សំខាន់នេះផងដែរ។ ឯកឧត្តម វ៉ាត់ ចំរើន បានមានប្រសាសន៍ថា កិច្ចប្រជុំនេះផ្ដោតលើប្រធានបទ ៣សំខាន់ ទី១-រំឮកឡើងវិញនូវផែនការស៊ីហ្គេម ទី២-ផែនការប្រកួតកីឡាអូឡាំពិកនៅប្រទេសជប៉ុន និងទី៣-ការធ្វើស្វ័យហ្វឹកហាត់ ឬការហ្វឹកហាត់តាម Online ដែលគ្រប់សហព័ន្ធកីឡាជាតិត្រូវអនុវត្តដោយយកចិត្តទុកដាក់បំផុត បន្ទាប់ពីទទួលបានការឧបត្ថម្ភពីក្រសួងអប់រំ យុវជន និងកីឡា ដើម្បីសម្រួចសមត្ថភាពកីឡាករ-កីឡាការិនីត្រៀមស៊ីហ្គេម និងកីឡាអូឡាំពិកផងដែរ។ ឆ្លៀតឱកាសនៃកិច្ចប្រជុំនោះ ឯកឧត្តម វ៉ាត់ ចំរើន ក៏បានពាំនាំនូវពាក្យពេចន៍ផ្ដាំផ្ញើរបស់ឯកឧត្ដមរដ្ឋមន្ដ្រី ថោង ខុន អនុប្រធានអចិន្ត្រៃយ៍នៃគណៈកម្មាធិការជាតិ CAMSOC និងជាប្រធាន NOCC ដោយអំពាវនាវឲ្យកីឡាករ-កីឡាការិនីទាំងអស់ត្រូវបង្កើនស្មារតីប្រុងប្រយ័ត្ន ការពារ និងអនុវត្តវិធានការក្រសួងសុខាភិបាលឲ្យបានដាច់ខាត អំឡុងពេលហ្វឹកហាត់តាមផ្ទះរៀងៗខ្លួន ដើម្បីការពារជំងឺកូវីដ-១៩ និងការពង្រឹងសមត្ថភាពត្រៀមការប្រកួតអន្តរជាតិនានាក្នុងឆ្នាំ២០២១។
គួរបញ្ជាក់ថា ចំពោះការប្រកួតកីឡាស៊ីហ្គេមលើកទី៣១ នៅទីក្រុងហាណូយគឺគ្រោងចាប់ផ្ដើមប្រកួតពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ដោយម្ចាស់ផ្ទះវៀតណាមបានសម្រេចដាក់កីឡា ៤០ប្រភេទឲ្យធ្វើការប្រកួតប្រជែង ក្នុងនោះកម្ពុជាបានត្រៀមបញ្ជូនអត្តពលិក ៣២ប្រភេទកីឡាទៅចូលរួមប្រកួតផងដែរ។ រីឯការប្រកួតកីឡាំអូឡាំពិកនៅប្រទេសជប៉ុនវិញ កម្ពុជាត្រៀមបញ្ជូនអត្តពលិក ៤ប្រភេទចូលរួម ក្នុងនោះកីឡាអត្តពលកម្ម និងហែលទឹកបានទទួលសិទ្ធចូលរួមដោយស្វ័យប្រវត្តិ ខណៈកីឡាគុនដាវ និងតេក្វាន់ដូត្រូវឆ្លងកាត់ការប្រកួតជម្រុះជាមុនសិន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
