កីឡាជាតិ៖ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានបើកកិច្ចប្រជុំពិសេសមួយ ដោយបានលើកយកនូវចំណុចអវិជ្ជមានទាំងអស់មកពិនិត្យ និងវាយតម្លៃ ដើម្បីទុកជាមេរៀនឆ្ពោះទៅរៀបចំការប្រកួតកីឡាស៊ីហ្គេមឆ្នាំ២០២៣ ឲ្យកាន់តែប្រសើរ។
នេះបើតាមប្រសាសន៍របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC ក្រោយបញ្ចប់កិច្ចប្រជុំដែលដឹកនាំដោយឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងអនុប្រធានអចិន្ដ្រៃយ៍ CAMSOC និងមានការចូលរួមពីគ្រប់ភាគីពាក់ព័ន្ធ នៅទីស្នាក់ការគណៈកម្មាធិការជាតិអូឡាំពិកកម្ពុជាកាលពីល្ងាចថ្ងៃទី០៣ ខែមករា ឆ្នាំ២០២៣។ ឯកឧត្តម វ៉ាត់ ចំរើន បានគូសបញ្ជាក់ថា កិច្ចប្រជុំនេះផ្ដោតសំខាន់តែលើចំណុចអវិជ្ជមាន ខណៈចំណុចវិជ្ជមានគឺមានច្រើនហើយ។ យ៉ាងណាក្ដីឯកឧត្តមបណ្ឌិត ថោង ខុន បានជំរុញឲ្យយកចិត្តទុកដាក់លើចំណុចអវិជ្ជមានគ្រប់ទិដ្ឋភាព ដើម្បីទុកជាមេរៀន និងជាបទពិសោធន៍ក្នុងការដោះស្រាយ សម្រាប់ឆ្ពោះទៅរៀបចំការប្រកួតកីឡាស៊ីហ្គេមលើកទី៣២ ឲ្យទទួលបានជោគជ័យ។
គួរដឹងថា កីឡាជាតិលើកទី៣ និងកីឡាជាតិជនពិការលើកទី១ ត្រូវបានរៀបចំតាមទម្រង់ស៊ីហ្គេម និងអាស៊ានប៉ារ៉ាហ្គេមកាលពីថ្ងៃទី១៩ ដល់ថ្ងៃទី៣០ ខែវិច្ឆិកា ឆ្នាំ២០២២ កន្លងទៅ។ ព្រឹត្តិការណ៍នេះត្រូវបានចាត់ទុកជាការតេស្ដសាកល្បងលើកចុងក្រោយ សម្រាប់កម្ពុជាត្រៀមធ្វើម្ចាស់ផ្ទះព្រឹត្តិការណ៍ជាប្រវត្តិសាស្ដ្រស៊ីហ្គេមលើកទី៣២ ពីថ្ងៃទី០៥ ដល់ថ្ងៃទី១៧ ខែឧសភាខាងមុខ និងការប្រកួតកីឡាអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
