ភ្នំពេញ៖ ក្រោយប្រទេសកម្ពុជាបានជាប់ចំណាត់ថ្នាក់ល្អជាងគេនៅទូទាំងពិភពលោកលើការចាក់វ៉ាក់សាំងប្រឆាំងកូវីដ-១៩ ដល់ប្រជាពលរដ្ឋ និងគ្រប់គ្រងស្ថានការណ៍កូវីដ-១៩ ប្រកបដោយជោគជ័យក្រោមការដឹកនាំដោយសម្ដេចតេជោ នាយករដ្ឋមន្រ្ដី ក្នុងឆ្នាំ២០២៣នេះ រដ្ឋលេខាធិការដ្ឋានអាកាសចរស៊ីវិលរំពឹងថា អត្រាទេសចរបរទេសចូលមកកម្ពុជា តាមរយៈជើងហោះហើនឹងមានការកើនឡើងដូចឆ្នាំ២០១៩។
ឯកឧត្ដម ជា អូន រដ្ឋលេខាធិការប្រចាំការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលមានប្រសាសន៍ប្រាប់ BTV នាថ្ងៃទី៤ ខែមករា ឆ្នាំ២០២៣នេះថា ប្រទេសកម្ពុជាក្រោមការដឹកនាំប្រកបដោយកិត្តិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្រ្ដី នៃកម្ពុជា ដោយបានអនុវត្តយុទ្ធសាស្រ្ដផ្ការីកចាក់វ៉ាក់សាំងដល់ប្រជាពលរដ្ឋនៅទូទាំងប្រទេស ហើយត្រូវបានពិភពលោកទទួលស្គាល់ថាជាប្រទេសជោគជ័យជាងគេក្នុងការចាក់វ៉ាក់សាំង។ កត្តានេះធ្វើឱ្យប្រទេសកម្ពុជា ឈានទៅដកការរឹតត្បិតចំពោះភ្ញៀវទេសចរបរទេសដែលចូលមកកាន់ប្រទេសកម្ពុជាតាមរយៈជើងហោះហើរហើយអាចធ្វើឱ្យចំនួនទេសចរបរទេស ក្នុងឆ្នាំ២០២៣នេះ កើនឡើងដូចឆ្នាំ២០១៩ រហូតដល់ជាង ១០លាននាក់។
ឯកឧត្ដមថ្លែងថា «យើងរំពឹងថា ចំនួនភ្ញៀវទេសចរបរទេស ពិសេសទេសចរមកពីបណ្ដាប្រទេសជិតខាងយើង ក្នុងឆ្នាំ២០២៣នេះ នឹងមានការកើនឡើងវិញដូចឆ្នាំ២០១៩ គរហូតដល់ចំនួន ១១ លាននាក់»។
បើតាមឯកឧត្ដម ជា អូន នាអំឡុងពេលការរាតត្បាតនៃជំងឺកូវីដ១៩ ប្រទេសនានានៅទូទាំងពិភពលោក បានបិទចរាចរណ៍ជើងហោះហើររបស់ខ្លួន ប៉ុន្ដែប្រទេសកម្ពុជា ក្រោមការដឹកនាំប្រកបដោយកិត្តិបណ្ឌិតរបស់សម្ដេចតេជោ ហ៊ុន សែន បានកែប្រែជើងហោះហើររបស់កម្ពុជាពីការដឹកភ្ញៀវទេសចរបរទេស មកធ្វើការដឹកទំនិញជំនួសវិញ ដែលធ្វើឱ្យប្រទេសកម្ពុជានៅតែមានជើងហោះហើរជានិច្ច៕ អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
