ភ្នំពេញ៖ ឯកឧត្តម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការ គណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា​ (គ.ជ.នា/ក.អ.ក-CRDB/CDC) ​អមដំណើរដោយសហការី រួមជាមួយនឹងលោក នោ ហ្យន់ជូន (RHO Hyunjun) ប្រធានតំណាង​ទីភ្នាក់ងារសហប្រតិបត្តិការអន្តរជាតិកូរ៉េ ​(កយកា-KOICA) ប្រចាំនៅកម្ពុជា នៅថ្ងៃទី០៤ ​ខែមករា ឆ្នាំ២០២៣ បានធ្វើទស្សនកិច្ចអគារជំងឺត្រចៀកច្រមុះបំពង់ក​ មិត្តភាពកម្ពុជា-កូរ៉េ ក្នុងមន្ទីរពេទ្យព្រះអង្គឌួង (PADH) ​ជាអគារថ្មីដែលផ្តល់ជំនួយដោយ កយកា-KOICA។

ឯកឧត្តមសាស្ត្រាចារ្យ លូ លីឃាង នាយកមន្ទីរពេទ្យព្រះអង្គឌួង និងជាទីប្រឹក្សាក្រសួងសុខាភិបាល បានលើកឡើងថា​ គោលបំណងនៃការធ្វើទស្សនកិច្ចនេះគឺ ដើម្បីមើល​សមិទ្ធផល​នានា ដូចជា​ដំណើរការនៃប្រតិបត្តិការរបស់ ​អគារជំងឺត្រចៀក ច្រមុះ បំពង់ក មិត្តភាពកម្ពុជា-កូរ៉េ និងពិនិត្យ​មើលអគារថ្មី សម្ភារៈបរិក្ខារពេទ្យ ​និងសម្ភារៈការិយាល័យ ដោយសារ គ.ជ.នា/ក.អ.ក-CRDB/CDC ជា “សេវាច្រកចេញ​ចូលតែមួយ” និង “ការិយាល័យកណ្តាល” របស់រាជរដ្ឋាភិបាល ដែល​សម្របសម្រួល​ជាមួយដៃគូអភិវឌ្ឍន៍ ​និងអង្គការក្រៅរដ្ឋាភិបាលដែលផ្តល់ជំនួយអភិវឌ្ឍន៍។ គ.ជ.នា-CRDB ​ក៏មានតួនាទីជាចំណុចបង្គោលក្នុងការទំនាក់ទំនងជាមួយស្ថាប័នរដ្ឋាភិបាល ដើម្បី​គ្រប់គ្រង​កិច្ចសហប្រតិបត្តិការអភិវឌ្ឍន៍ និងភាពជាដៃគូនៅក្នុងប្រទេសកម្ពុជា។

អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ ត្រូវបានសាងសង់​ដោយ កយកា-KOICA ក្រោម​ជំនួយឥតសំណងរបស់កូរ៉េ ​ដែលមានតម្លៃសរុបក្នុងគម្រាងទាំងមូល ​៨លានដុល្លារអាមេរិក ដោយ​មានរយៈពេលអនុវត្តពីឆ្នាំ២០១៨​ ដល់ឆ្នាំ២០២២។

អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ គឺជាអគារថ្មីមានកម្ពស់ប្រាំជាន់ បំពាក់ដោយ​ឧបករណ៍​ទំនើបសម្រាប់ការធ្វើរោគ​វិនិច្ឆ័យ ​ការព្យាបាល ​និងការវះកាត់ ត្រូវបានសាងសង់​នៅក្នុង​បរិវេណមន្ទីរពេទ្យព្រះអង្គឌួង​ ដើម្បីជួយកែលម្អសេវាវេជ្ជសាស្រ្តនៅក្នុងមន្ទីរពេទ្យនេះ។

លោក នោ ហ្យន់ជូន (RHO Hyunjun) បាន​មានប្រសាសន៍​ថា ក្រៅពីការធ្វើឱ្យប្រសើរឡើង​នូវ​ហេដ្ឋា​រចនាសម្ព័ន្ធរូបវន្ត ​សមត្ថភាពរបស់វេជ្ជបណ្ឌិតឯកទេស ​និង​បុគ្គលិក​ក៏មានភាពជឿនលឿន តាម​រយៈការផ្តល់កម្មវិធី​បណ្តុះបណ្តាលទៅលើការ​អនុវត្តន៍សេវាជាក់ស្តែង និងការផ្ទេរចំណេះដឹង​កម្រិត​ខ្ពស់ និងការចែករំលែកបទពិសោធន៍​ជាមួយវេជ្ជបណ្ឌិតកូរ៉េផងដែរ។

អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ ត្រូវបានសាងសង់ ​បន្ទាប់ពីការសាងសង់អគារ ចក្ខុរោគ មិត្តភាពកម្ពុជា-កូរ៉េ ក្នុងបរិវេណមន្ទីរពេទ្យព្រះអង្គឌួង។

ក្នុងឱកាសនោះ ឯកឧត្តមរដ្ឋមន្ត្រី ឈៀង យ៉ាណារ៉ា​ បានថ្លែងថា អគារជំងឺត្រចៀកច្រមុះបំពង់ក មិត្តភាពកម្ពុជា-កូរ៉េ គឺជាអគារមន្ទីរពេទ្យដ៏ល្អបំផុតនៃមន្ទីរពេទ្យជាតិក្នុងប្រទេសកម្ពុជា ដែលមាន​ទីតាំង​នៅចំកណ្តាលទីក្រុង ​នឹងចំកណ្តាលបេះដូងនៃរាជធានីភ្នំពេញ។

ឯកឧត្តមរដ្ឋមន្ត្រីប្រតិភូ ​ក៏បានវាយតម្លៃខ្ពស់ចំពោះ​សមិទ្ធផល​ដែល ​កយកា-KOICA សម្រេចបាន និង​បានថ្លែងអំណរគុណចំពោះ ​កយកា-KOICA និងប្រជាជន ​និងរដ្ឋាភិបាល​ នៃសាធារណរដ្ឋកូរ៉េ ដែល​បាន​គាំទ្រ​យ៉ាង​ខ្ជាប់ខ្ជួន​ដល់ការ​អភិវឌ្ឍន៍​សេដ្ឋកិច្ច-សង្គម​របស់កម្ពុជា ​តាមរយៈការអនុវត្ត​គម្រោង ​និងកម្មវិធីនានាជាច្រើននៅក្នុងប្រទេសកម្ពុជា៕អត្ថបទ រដ្ឋា