ភ្នំពេញ៖ នាព្រឹកថ្ងៃទី៤ ខែមករា ឆ្នាំ២០២៣នេះ នៅអគារទីស្នាក់ការកណ្តាលលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បាន​ទទួល​អំណោយ​អាវរងាចំនួន​១ពាន់អាវពីក្រុមហ៊ុន យូ អាយ ស៊ី អឹភែរឹល ក្នុងគោលបំណងចូលរួមចំណែក ដល់​សកម្មភាព​មនុស្សធម៌​របស់កាកបាទក្រហមកម្ពុជា។

ក្នុងឱកាសនោះ លោកជំទាវ ម៉ែន នារីសោភ័គ អគ្គលេខាធិការរងទី១​ កាកបាទក្រហមកម្ពុជា បាន​ពាំនាំ​នូវ​ការ​ផ្តាំផ្ញើ​សួរសុខទុក្ខ ​និងថ្លែង​អំណរគុណ​យ៉ាងជ្រាលជ្រៅ ​ពី​សំណាក់​សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី ហ៊ុនសែន ​ប្រធាន​ចំពោះ​ទឹក​ចិត្តរបស់​ក្រុមហ៊ុន យូ អាយ ស៊ី អឹភែរឹល ដែល​បាន​បរិច្ចាគ​អាវរងាចំនួន១ពាន់អាវ​ ជូន​ដល់កាកបាទក្រហមកម្ពុជា សម្រាប់ប្រតិបត្តិការ​មនុស្សធម៌​នៅក្នុងឱកាសរដូវរងានេះ។

លោកជំទាវ បាន​ឱ្យដឹងថា អាវរងា ដែលបានផ្ដល់ជូននៅពេលនេះ ​គឺពិតជាមានតម្លៃ និងឆ្លើយតប​បាន​ទាន់ពេលវេលាក្នុងកាលៈទេសៈ ដែលប្រទេសកម្ពុជា​ទទួលរងនូវការធ្លាក់​ចុះ​សីតុណ្ហភាពត្រជាក់។ ដូច្នេះអំណោយទាំងអស់នេះគឺពិតជាទាន់ពេលវេលា ក្នុងការជួយ​ប្រជាពលរដ្ឋ ដែលកំពុងប្រឈមទៅនឹងអាកាសធាតុត្រជាក់ពិសេសចាស់ជរា។

លោកជំទាវ បានសន្យាថា នឹងនាំយកអាវរងាទាំងអស់នេះ​ ជូនទៅដល់ប្រជាពលរដ្ឋ ដែល​មានការខ្វះខាត ជាពិសេសនៅប៉ែកខាងខេត្ត មណ្ឌលគិរី និងរតនគិរី ដែលជាតំបន់​ដែលមាន​អាកាសធាតុចុះត្រជាក់ខ្លាំងក្នុងពេលឆាប់ខាងមុខនេះ។

លោកជំទាវ បន្ដថា ជារៀងរាល់ឆ្នាំរៀងមក សកម្មភាពមនុស្សធម៌របស់ កាកបាទក្រហមកម្ពុជា ដំណើរការបាន ​គឺដោយសារការចូលរួម​បរិច្ចាគ ពីសប្បុរសជនមកពីគ្រប់ទិសទី ជាពិសេស​ក្នុងឱកាសទិវា៨ឧសភា​ ដែលកាកបាទក្រហមកម្ពុជាថ្នាក់កណ្តាល​ និងគ្រប់សាខា​ទាំងអស់ តែងតែ​ធ្វើការកៀងគររកជំនួយពីសប្បុសជននានា​ សម្រាប់ទុកជួយទៅដល់ប្រជាពលរដ្ឋ ដែលត្រូវការ​ជំនួយជាចាំបាច់ ជាពិសេជួយទៅដល់ អង្កការកុមារកំព្រារ មន្ទីរពេទ្យ​គន្ធបុប្ផា ជាដើម។ល។

លោកជំទាវ បញ្ជាក់ថា នៅរយៈពេលប៉ុន្មានឆ្នាំចុងក្រោយនេះឃើញថា ​កាកបាទក្រហមកម្ពុជា ថ្នាក់កណ្តាលបានធូរច្រើន​ ក្នុងការចែករំលែកជំនួយ​ទៅដល់សាខា។ ព្រោះថា​បច្ចុប្បន្ន​សាខាភាគ​ច្រើនគឺមានសមត្ថភាព​ អាចជួយខ្លួនឯងបានច្រើន ​ដោយមិនចាំបាច់ពឹងថ្នាក់កណ្តាល ក្នុងជួយទៅ​ដល់ប្រជាពលរដ្ឋក្នុងសហគមន៍​ ដែលត្រូវការជំនួយគ្រោះបន្ទាន់។

ឆ្លៀតក្នុងឱកាសនោះដែរលោកជំទាវ អគ្គលេខាធិការរងទី១ បានបញ្ជាក់ថា​ការ​ប្រារព្ធ​​ទិវា៨ឧសភាឆ្នាំនេះ ​មិនបានប្រារព្ធ​ពិធីធំនៅទីស្នាក់ការកណ្តាលទេ។ ដោយឆ្នាំនេះ កាកបាទក្រហមកម្ពុជា ​ជាប់ទទួលធ្វើជាម្ចាស់ផ្ទះ ក្នុងកិច្ចប្រជុំកាកបាទក្រហម អាស៊ាន ២០២៣ និង​កម្មវិធីជាច្រើនទៀតដូចកីឡាស៊ីហ្គែមជាដើម។ ​តែការ​ទទួលជំនួយបរិច្ចាគ​ពីសប្បុសជននានា ដែល​បំណងចូលរួម​ គឺនៅទទួលដដែល ​ធ្វើដូចឆ្នាំ២០២១ ​និង២០២២​កន្លងមកនេះ។

សូមបញ្ជាក់ថាក្រុមហ៊ុន យូ អាយ ស៊ី អឹភែរឹល​ បានចូលរួម​បរិច្ចាគ​អំណោយ​មនុស្សធម៌ជូន កាកបាទ​ក្រហមកម្ពុជា បានចំនួន៣លើកមកហើយ ​ទី១នៅឆ្នាំ២០១៨ ​ទី២ឆ្នាំ២០២០ និងទី៣នៅថ្ងៃទី៤ ខែមករា ឆ្នាំ២០២៣នេះ៕អត្ថបទ៖ សំ ងីម