​ប៉ា​គី​ស្ថាន៖ ក្រសួងការពារជាតិ​បាន​និយាយ​កាលពី​ថ្ងៃ​អង្គា​រថា រដ្ឋាភិបាល​ប៉ា​គី​ស្ថាន​បាន​បញ្ជា​ឲ្យ​ផ្សារ​ទំនើប និង​ផ្សារ​ទាំងអស់ត្រូវ​បិទ​នៅត្រឹម​ម៉ោង ​៨:៣០​នាទី​យប់ ក្នុងចំណោម​វិធានការ​ផ្សេងទៀតក្នុង​ផែនការ​សន្សំសំចៃ​ថាមពល​ថ្មី ខណៈ​ប្រទេស​នេះជួប​វិបត្តិ​សេដ្ឋកិច្ច​។

​ទុនបំរុង​បរទេស​របស់​ប្រទេស​ប៉ា​គី​ស្ថាន​ ស្ទើរតែ​អាច​ប្រើប្រាស់​ត្រឹមតែ​តម្លៃ​នាំចូល​ក្នុង​រយៈពេល​មួយខែ ដែល​ភាគច្រើន​គិត​ទៅលើ​ការទិញ​ថាមពល​ពី​បរទេស ដោយ​មូលនិធិ​ដែល​រំពឹងទុក​ក្រោម​កម្មវិធី​មូលនិធិ​រូបិយវត្ថុ​អន្តរជាតិ (IMF) ត្រូវបាន​ពន្យារពេល​។ ​លោក Khawaja Asif បាន​ប្រាប់​ក្រុម​អ្នកសារព័ត៌មាន​ថា វិធានការ​ត្រូវបាន​អនុម័ត​ដោយ​ខុទ្ទកាល័យក្នុង​ការបិទ​ផ្សារ​ទាំងអស់ រួមទាំងភោជនីយដ្ឋានផងដែរ ក្នុង​គោលដៅ​ជួយ​ស្រោចស្រង់​ប្រទេស​ដែល​ជាប់គាំង​សាច់ប្រាក់​ប្រមាណ ៦២​ពាន់​លាន​រ៉ូ​ពីស្មើនឹង ​២៧៣​លាន​ដុល្លា​អាមេរិក​។

​លោក​ថា វិធានការ​បន្ថែម​ភ្លាមៗ រួមទាំង​ការបិទ​សាល​រៀបចំ​ពិធី​អាពាហ៍ពិពាហ៍ត្រឹម​ម៉ោង ១០​យប់​ជាប្រចាំ​។ ប៉ុន្តែ​ក្រុម​ពាណិជ្ជករ​បាន​ច្រានចោល​ចំណាត់ការ​នេះ ដោយ​និយាយ​ថា អាជីវកម្ម​របស់​ពួកគេ​នឹង​ត្រូវ​រលាយ​មិន​ខាន ហើយ​ហាង​លក់ទំនិញ​នានា​ដែល​បើក​លក់​ក្នុង​ទីក្រុង Islamabad ត្រូវ​បើក​រហូតដល់​ម៉ោង ១០កន្លះ​យប់​។ ​នៅក្នុង​ទីក្រុង Lahore របស់​ខេត្ត Punjab និងទីក្រុង Karachi នៃ​រដ្ឋធានី​របស់​ខេត្ត Sindh ត្រូវ​បើក​រហូតដល់​យប់​ជ្រៅ​។​ លោក Asif ក៏បាន​និយាយ​ផងដែរ​ថា លោក​នាយករដ្ឋមន្ត្រី Shehbaz Sharif បាន​បញ្ជា​ឲ្យ​អគារ​រដ្ឋាភិបាល​ទាំងអស់​កាត់បន្ថយ​ការប្រើប្រាស់​អគ្គិសនី​ឲ្យ​បាន ​៣០%៕

អត្ថបទ៖ សុខមាន