ភ្នំពេញ៖ ឯកឧត្តមឧបនាយករដ្ឋ ជា សុផារ៉ា រដ្ឋមន្ត្រីក្រសួងរៀបចំដែនដី ​នគររូបនីយកម្ម​ និង​សំណាង់ បានអញ្ជើញជាអធិបតីភាពក្នុងពិធី​បញ្ចុះ​បឋមសីលាបើកការដ្ឋាន​សាងសង់​ព្រះពុទ្ធបដិមា កម្ពស់១០៨ម៉ែត្រ ​នៅលើខ្នងភ្នំបូកគោ ​នៃឧទ្យានជាតិព្រះមុនីវង្សបូកគោ ​នៅថ្ងៃទី ៤ ខែមករា នេះ ។

ព្រះពុទ្ធប្បដិមា ដែលធ្វើពិធីដំណើរការកសាងនៅពេលនេះ ​ស្ថិតក្នុងចំណោមព្រះពុទ្ធបដិមា ដែល ខ្ពស់នៅលើពិភពលោកផងដែរ។ ព្រះបដិមា ​មានទម្រង់ជាព្រះពុទ្ធមារវិជ័យ ​ឬផ្ចាញ់មារ នៃរចនាប័ទ្មបាយ័ន ​ដែលជារចនាប័ទ្មកំពូលនៃព្រះពុទ្ធសាសនា ​ក្នុងរជ្ជកាលព្រះបាទជ័យវ័រ្មនទី៧ នាសតវត្សរ៍ទី១៣ ដោយ ​សាងសង់ពីបេតុងអាម៉េ មានពណ៌មាស ​បែរព្រះភក្ត្រទៅទិសខាងកើត មានកម្ពស់១០៨ ម៉ែត្រ ពីនីវ៉ូសូន្យ នៃខឿនផ្ទាល់ដី ដល់កំពូលព្រះមោលី ដែលតំណាងឱ្យមង្គល​ទាំង១០៨ របស់ព្រះអង្គ ទ្រង់គង់ភ្នែននៅលើ​ បល្ល័ង្កផ្កាឈូក​ រាងរង្វង់​ (តំណាងឱ្យវាលវដ្តសង្ខារ ដែលក្បាច់រចនារបស់បល្ល័ង្កនេះ ​យកតាមលំនាំ នៃផ្នែក​មួយរបស់សសរពេជ្រ ​ប្រាសាទដំរីក្រាប នៃ​រចនាប័ទ្មគូលែន ក្នុងរជ្ជកាលព្រះបាទជ័យវរ្ម័នទី២ នាសតវត្សរ៍ទី៩ ។

ឯកឧត្តម ជា សុផារ៉ា ​បានមានប្រសាសន៍ថា ​ឧទ្យានជាតិព្រះមុនីវង្សបូកគោ​ គឺជាកន្លែងសម្រាក លម្ហែកម្រិតខ្ពស់សម្រាប់ រាជវង្សខ្មែរ ​និងអភិជននៅឥណ្ឌូចិន ​តាំងពីដើមសតវត្សរ៍ទី២០មកម្ល៉េះ។ ហើយ នៅឆ្នាំ២០១៩ រាជរដ្ឋាភិបាល ​បានអនុម័ត្តប្លង់គោលប្រើប្រាស់ដី គម្រោងអភិវឌ្ឍន៍​ក្រុងបូកគោ​ សំដៅធានាការគ្រប់គ្រង ​អភិបាលកិច្ចទីក្រុង​ ទីប្រជុំជនបូកគោ ឲ្យមានប្រសិទ្ធភាពខ្ពស់ តាមរយៈការធ្វើសមាហរន្តកម្មការអភិវឌ្ឍ ​ការអភិរក្សប្រកបដោយគុណភាព តុល្យភាព សមធម៌ និងស្ថិរភាព។

ឯកឧត្តម បានបញ្ជាក់ថា ​ក្រោយពេលសាងសង់ព្រះបដិមារួច ​តំបន់នេះ ​នឹងក្លាយជាមជ្ឈមណ្ឌល ទេសចរណ៍​ព្រះពុទ្ធសាសដ៏ធំមួយ​ សម្រាប់កម្ពុជា ​និងសម្រាប់ពិភពលោក ។

ភ្ញៀវទេសចរ​ បានបង្ហាញចំណាប់អារម្មណ៍របស់ខ្លួនថា​ ការសាងសង់ព្រះពុទ្ធបដិមាខ្ពស់ជាងគេ នៅ​កម្ពុជានេះ នឹងទាក់ទាញខ្លាំងណាស់ ​សម្រាប់មនុស្សទូទៅ ហើយនឹងមានប្រយោជន៍​សម្រាប់​ប្រទេសជាតិ និងសាសនា ។ គម្រោងសាងសង់ព្រះពុទ្ធប្បដិមានេះ នឹងប្រើប្រាស់រយៈពេល៤ឆ្នាំ ក្នុងកញ្ចប់ថវិកាជាង៣៣លានដុល្លារ ៕សម្រួល៖ យន់ វ៉ាន់