ភ្នំពេញ៖ ក្រុមអគ្គសម្ព័ន្ធសហភាពសហជីពកម្ពុជា (CGCU) បានសម្តែងការគាំទ្រដល់សម្តេចតេជោ ហ៊ុន សែន សម្រាប់​អាណត្តិ​បន្តបន្ទាប់ និងបង្ហាញការគាំទ្រដល់ឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី​បន្ត​វេន​សម្រាប់​ប្រទេស​កម្ពុជា ជាពិសេសក្រោមការដឹកនាំរបស់គណបក្សប្រជាជនកម្ពុជា។​

នេះជាការលើកឡើងរបស់ក្រុមសហជីព នៅក្នុងពិធីអបអរសាទរខួបអនុស្សាវរីយ៍លើកទី៤៤ ទិវាជ័យជំនះ ៧មករា នៅព្រឹកថ្ងៃទី៤ មករា ឆ្នាំ២០២៣នេះ នៅរាជធានីភ្នំពេញ។

លោក សំ សឿន ប្រធានសហភាពពលកម្មជាតិកម្ពុជា និងជាប្រធានក្រុមប្រឹក្សាជាតិសហជីព បានមានប្រសាសន៍ ថា ដោយសារគុណរំដោះ ៧មករា ក្រោយការដឹកនាំដ៏ឈ្លាសវៃរបស់សម្តេចតេជោ និងគណបក្សប្រជាជន ធ្វើឲ្យ​ប្រទេស​កម្ពុជា មានសិទ្ធិសេរីភាព មានការរស់នៅ មានការហូបចុកបានធម្មតា ដូចប្រជាជនប្រទេសដទៃ ហើយ​ជាពិសេស គឺ​សហ​ជីព​បានរស់ឡើងវិញក្រោមម្លប់សន្តិភាព និងការអភិវឌ្ឍន៍ក្រោមការដឹកនាំ​របស់នាយក​រដ្ឋមន្រ្តី​បច្ចុប្បន្ន។

ស្របគ្នាខាងលើនេះ លោកស្រី ទេព គឹមវណ្ណារី ប្រធានអគ្គសម្ព័ន្ធសហភាពសហជីពកម្ពុជា បានឲ្យ ប៊ីធីវី ដឹងដែរថា មូលហេតុ​ដែល​នៅតែគាំទ្រ និងជឿជាក់លើគណបក្សប្រជាជនកម្ពុជា ដោយសារភាពដឹកនាំប្រទេស បានឆ្លង​កាត់ដំណាក់​កាល​ដ៏សែនលំបាកនានា ដោយសម្រេចបានជោគជ័យដ៏ត្រចះត្រចង់ជូនជាតិ និងប្រជាជន។

ឯកឧត្តមបណ្ឌិត អ៊ិត សំហេង ប្រធានគណៈចលនាសហជីព នៃគណៈចលនាមហាជនគណៈកម្មាធិការកណ្តាល ក្នុង​ឱកាស​អញ្ញើញចូលរួមជាគណៈអធិបតីក្នុងពិធីខាងលើ បានមានប្រសាសន៍ថា កាពិត បើគ្មានថ្ងៃ៧មករា ក៏យើង​គ្មានគ្រប់យ៉ាងដូចសព្វថ្ងៃនេះដែរ ប៉ុន្តែ ដោយសារការដឹកនាំដ៏ឈ្លាសវៃដ៏ត្រឹមត្រូវរបស់សម្តេចតេជោ ជាមួយនឹង​ការផ្សារភ្ជាប់រួមសុខរួមទុក្ខ និងធ្វើអ្វីៗគ្រប់បែបយ៉ាងដើម្បីប្រជាជននៅគ្រប់កាលៈទេសៈ ទើបធ្វើឲ្យសម្រេចបានសមិទ្ធិផល​ធំៗ​ជាប្រវត្តិសាស្ត្រជូនជាតិ និងប្រជាជន៕ អត្ថបទ៖ បូរ៉ាវី