​ប៉ា​គី​ស្ថាន៖ ផ្សារ​នៅក្នុង​ទីក្រុង​ធំៗ​របស់​ប្រទេស​ប៉ា​គី​ស្ថាន ​កាលពី​ថ្ងៃ​ពុធ​បាន​បដិសេធ​ការណែនាំ​របស់​រដ្ឋាភិបាល​ថ្មី​ ដើម្បី​បិទ​មុន​កាលកំណត់​ក្រោម​ការជំរុញ​ឲ្យ​សន្សំ​សំចៃ​ថាមពល នៅក្នុង​ការ​ប៉ះទង្គិច​ដល់​ផែនការ​របស់​ប្រទេស​ដែល​បាន​ជាប់​គាំង​សាច់ប្រាក់​ ក្នុង​ការ​កាត់បន្ថយ​ការ​នាំចូល​ថាមពល​ស្រប​ពេល​មាន​វិបត្តិ​សេដ្ឋកិច្ច​។​

​សេចក្ដីណែនាំ​កាលពី​ថ្ងៃ​អង្គារ​បាន​បញ្ជា​ឲ្យ​ផ្សារ​ទំនើប និង​ភោជនីយដ្ឋាន​ទាំងអស់​បិទទ្វារ​នៅ​ត្រឹម​ម៉ោង ៨.៣០យប់ដើម្បី​សន្សំសំចៃ​ប្រេង ដែល​ការ​នាំចូល​របស់ខ្លួន​បានធ្វើ​ឲ្យ​ធន​បំរុង​បរទេស​របស់​ប៉ា​គី​ស្ថាន ​ធ្លាក់ចុះ​ក្នុង​កម្រិត​មួយដែល​អាច​ធានា​លើ​តម្លៃ​នាំចូលសម្រាប់​រយៈពេល​តែមួយ​ខែ​។​ ​ក្រុម​អ្នកសារព័ត៌មាន Reuters នៅក្នុង​ទីក្រុង​ធំៗ​បំផុត​របស់​ប្រទេស​នេះ​ដូចជាទីក្រុង Lahore, ទីក្រុង​Karachi និង​ទីក្រុង ​Peshawar បាន​មើលឃើញ​ផ្សារ និង​ផ្សារ​ទំនើបស្ទើរតែ​ទាំងអស់​នៅតែ​បន្ត​បើកទ្វារ​ហួស​ពី​ម៉ោង​ដែល​បានកំណត់​កាលពី​ថ្ងៃ​អង្គារ​។

​លោក Mohammad Ishaq ប្រធានសភា​ពាណិជ្ជកម្ម និង​ឧស្សាហកម្ម Sarhad ដែលជា​សមាគម​ពាណិជ្ជករ​នៅ​ទីក្រុង Peshawar ភាគ​ពាយ័ព្យ​ប្រទេសបាន​ប្រាប់​សារព័ត៌មាន Reuters ថា យើង​បដិសេធ​ទាំងស្រុង​នូវ​ផែនការ​នេះដោយ​បន្ថែមថា​ អាជីវកម្ម​ដែល​ប្រឈម​នឹង​បញ្ហា​សន្តិសុខ និង​កង្វះ​ថាមពលនឹង​ប្រឆាំង​ទៅនឹង​ការប៉ុនប៉ង​ ដើម្បី​បង្ខំ​ឲ្យ​យើង​អនុវត្តន៍​តាម​។ ​ម្ចាស់​ហាង​លក់​សម្ភារៈ​កុមារ​នៅ​ទីក្រុង Lahore ភាគ​ខាងកើត លោក Muhammad Raza បាន​និយាយ​ថា គោលនយោបាយ​នេះនឹង​សម្លាប់​ខ្ញុំ​ និង​មុខរបរ​របស់ខ្ញុំ ព្រោះថា​ ម៉ោងជាង ​៨​យប់គឺជា​ពេលវេលា​ដែល​ឪពុកម្ដាយ​នាំ​កូនៗ​ពួកគេ​មក​ហាង​ខ្ញុំ៕

អត្ថបទ៖ សុខមាន