ភ្នំពេញ៖ កុមារ យុវវ័យ និងប្រជាពលរដ្ឋ រស់នៅក្នុងមូលដ្ឋានរាជធានីភ្នំពេញ បានបន្ត​មក​ទទួល​ការ​ចាក់​វ៉ាក់សាំងបង្ការជំងឺកូវីដ-១៩ ដូសជំរុញ និងដូសទី៥ និងទី៦ នៅក្នុងមន្ទីរ​ពេទ្យ​បង្អែក​រាជ​ធានី​ភ្នំពេញ។

បើតាមលោកវេជ្ជបណ្ឌិត នេត សុវិរៈ ប្រធានមនី្ទរពេទ្យបង្អែករាជធានីភ្នំពេញ ប្រាប់BTV ព័ត៌មាន​នាព្រឹក​ថ្ងៃទី៥ ខែមករា ឆ្នាំ២០២៣នេះថា មនី្ទរពេទ្យ មានក្រុមការងារចាក់វ៉ាក់សាំង និង​ក្រុម​ឆ្លើយ​តប​បន្ទាន់លើការផ្ទុះរីករាលដាលជំងឺកូវីដ-១៩ និងជំងឺឆ្លងផ្សេងៗ ទាន់ពេលវេលា ដោយ​គ្មាន​ការ​ខ្លាចរអាល និងចូលរួមទាំងអស់គ្នា ទាំងថ្នាក់ដឹកនាំមនី្ទរពេទ្យ និងបុគ្គលិកមនី្ទរពេទ្យ គឺ​ស្ម័គ្រ​ស្មោះប្រយុទ្ធប្រឆាំង នឹងជំងឺឆ្លងប្រភេទថ្មីនេះ។ ក៏សូមអំពាវនាវ​ដល់​បង​ប្អូន​ប្រជាពលរដ្ឋ​ដែល​មាន​បញ្ហាសុខភាព ដូចជាជំងឺទូទៅ និងការចាក់វ៉ាក់សាំង សូមអញ្ជើញ​មក​ទទួល​សេវា​ក្នុង​មន្ទីរ​ពេទ្យ​បង្អែករាជធានីភ្នំពេញ ដោយក្រុមគ្រូពេទ្យទាំងអស់រីករាយរងចាំ បំរើសេវាជូន​ប្រជាពលរដ្ឋ​ទាំង​អស់ ដោយគ្មានការរើងអើងនោះទេ។

ចំណែកកុមារ យុវវ័យ និងប្រជាពលរដ្ឋ មកទទួលវ៉ាក់សាំង ដូសជំរុញទី៥ និងដូសជំរុញទី៦ បាន​លើក​ឡើង​ស្រដៀងគ្នាថា ចាប់តាំងពីប្រទេសកម្ពុជា ចាប់ផ្តើមមានករណីឆ្លងជំងឺកូវីដ-១៩ និង​ប្រកាស​បើក​យុទ្ធនាការចាក់វ៉ាក់សាំង គឺពួកគាត់បានស្ទុះស្ទា មកចាក់វ៉ាក់សាំងបង្ការជំងឺកូវីដ-១៩ ភ្លាម​ៗ អត់មានទុក ឬក៏រងចាំយូរនោះទេ គឺមកចាក់វ៉ាក់សាំង ដើម្បីការពារសុខភាពខ្លួនឯងផង និង​ដើម្បី​ការពារសុខភាពអ្នកនៅជុំវិញយើងផងដែរ។

បើតាមឯកឧត្តម វេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បាន​ឲ្យ​ដឹង​ដែរ​ថា ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ គិតត្រឹមល្ងាចម្ស៉ិលម៉ិញថ្ងៃទី៤ ខែមករា ឆ្នាំ​២០២៣ អាយុចាប់ពី១៨ឆ្នាំឡើង បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៤ បាន​ចំនួន​ ១,១៧៩,៧៨៤នាក់ ស្មើនឹង៨៣.៥១%, ដូសជំរុញទី៥ បានចំនួន២១១,៦៣៣នាក់ ស្មើ​នឹង​១៤.៩៨% និងដូសទី៦ បានចំនួន៥៧៤នាក់ ស្មើនឹង០.០៤% នៃក្រុម​គោល​ដៅ​១,៤១២,៧៦៩​នាក់៕ អត្ថបទ៖ រដ្ឋា