ភ្នំពេញ៖ ជនបរទេសមួយចំនួនដែលបាននឹងកំពុងរស់នៅកម្ពុជា តាំងពីកំឡុងឆ្នាំ ២០០០ មកទល់ពេលបច្ចុប្បន្ន ​បានកោតសរសើរពីការរីកចម្រើននៅកម្ពុជា។ ពួកគេមើលឃើញថា កម្ពុជាកំឡុងពេលពួកគាត់មករស់នៅដំបូង ​និងពេលបច្ចុប្បន្ន​ គឺមានភាពផ្លាស់ប្ដូរ ​៣៨០ដឺក្រេ ដោយសព្វថ្ងៃកម្ពុជាមានគ្រប់យ៉ាងទាំងអស់។

កម្ពុជាបានបញ្ចប់របបប្រល័យពូជសាសន៍ខ្មែរក្រហម កាលពីថ្ងៃទី ៧មករា ឆ្នាំ ១៩៧៩។ កម្ពុជាបាន​បញ្ចប់សង្រ្គាមស៊ីវិលទាំងស្រុងនៅកំឡុងខែ ​ធ្នូ ឆ្នាំ ​១៩៩៨។​នេះជាប្រវត្តសាស្ត្រដែល​បានចែង​កត់ត្រាទុក។ ការបញ្ចប់របបប្រល័យពូជសាសន៍​ ក៏ដូចជាការបញ្ចប់សង្រ្គាមស៊ីវិល បាននាំ​មកវិញ​នូវសន្តិភាព និងការរីកចំរើនជាបន្តបន្ទាប់រហូតដល់សព្វថ្ងៃ។

ក្រៅពីពលរដ្ឋខ្មែរ សម្រាប់ជនបរទេសដែលបានមករស់នៅកម្ពុជារយៈពេលជាង​ ២០ឆ្នាំមកនេះ ក៏បានកត់សម្គាល់និងកោតសសើរ ចំពោះការផ្លាស់ប្ដូររីកចម្រើនរបស់កម្ពុជា។ ​

លោក Angelo មកពីប្រទេសអ៊ីតាលី ដែលបានស្នាក់នៅកម្ពុជាប្រមាណ ២៣ឆ្នាំមកនេះ មើលឃើញថា​កម្ពុជា មានការផ្លាស់ប្ដូរ ​៣៨០ដឺក្រេនៅពេលសព្វថ្ងៃ។ លោកបញ្ជាក់ថា កាលគ្រា​ដែលលោកមកដល់កម្ពុជាដំបូង ​គឺកម្ពុជា​ជា​ប្រទេស​ឯកា​ពីប្រភព​ខាងក្រៅ ​ហើយតំបន់ខ្លះក៏គ្មានផ្លូវ និង​អគ្គិសនីទៀតផង។ លោកជឿជាក់ថា​ កម្ពុជាទៅថ្ងៃអនាគត ​គឺនឹងកាន់តែប្រសើរ។

លើកឡើងដូចគ្នាផងដែរ ​សម្រាប់លោក Philippe មកពី Belgium ដែលបានធ្វើដំណើរចូលកម្ពុជា ក្នុងឆ្នាំ ១៩៩៩ ​និងបានស្នាក់នៅកម្ពុជាតាំងពីឆ្នាំ ២០០៣ ​និងមានគ្រួសារជាជនជាតិខ្មែរ លោក​ក៏មើល​ឃើញពីការរីកចំរើនជាខ្លាំងផងដែរ។

លោករម្លឹកអតីតកាលថា ​សម្រាប់រាជធានីភ្នំពេញ​មានការអភិវឌ្ឍ​តិចតួចប៉ុណ្ណោះ ​ខណៈបច្ចុប្បន្ន​រាជធានីភ្នំពេញរីកលូតលាស់យ៉ាងឆាប់រហ័ស ​ដែលអាចនិយាយបានថាផ្លាស់ប្ដូរពីសូន្យ ​ទៅ ១០០។

ការរីកចម្រើនរបស់កម្ពុជា​នាពេលបច្ចុប្បន្នគឺទទួលបានពី កិច្ចប្រឹងប្រែងរបស់រាជរដ្ឋាភិបាល ដោយ​ចាប់ផ្ដើមពីបាទដដៃទទេ ក្រោយ​ផ្ដួល​រំលំរបបប្រល័យពូជសាសន៍​ខ្មែរក្រហម ​៧មករា ឆ្នាំ ១៩៧៩។ គ្រានោះគឺកម្ពុជា ​ត្រូវកសាងប្រទេសជាតិឡើងវិញផង ​ត្រូវព្យាយាមទប់ស្កាត់ការវិលត្រឡប់​មក​វិញរបស់ខ្មែរក្រហមផង ​ខណៈដែលសង្រ្គាមស៊ីវិលនៅបន្តអូសបន្លាយជាច្រើនឆ្នាំ។ សង្រ្គាមស៊ីវិលនៅកម្ពុជា ​ក៏ឈានដល់ការបិទបញ្ចប់នៅកំឡុងខែ ​ធ្នូ ឆ្នាំ ១៩៩៨ ក្រោមការ​អនុវត្ត​ជោគជ័យ​ នៃនយោបាយឈ្នះ ឈ្នះ ​ដោយសម្ដេច​ តេជោ ហ៊ុន សែន នាយករដ្ឋមន្រ្តីនៃ​ប្រទេស​កម្ពុជា៕ អត្ថបទ៖គឹមហុក