កណ្ដាល៖ យុវជន បានបង្ហាញការចូលរួមអបអរសាទរខួប៤៤ឆ្នាំ នៃថ្ងៃជ័យជម្នះ ៧ មករា និងបានប្ដេជ្ញាថែរក្សា គុណតម្លៃ ថ្ងៃ៧មករា ដែលផ្ដល់នូវជីវិតទី២ជូនដល់ប្រជាពលរដ្ឋខ្មែរ ឲ្យបានរស់រានមានជីវិត និងជាមូលដ្ឋាន នៃការធ្វើឱ្យប្រទេសជាតិមានសុខសន្តិភាព និងការអភិវឌ្ឍរហូតមកដល់ពេលបច្ចុប្បន្ន ។

យុវជន នៅក្នុងខេត្តកណ្ដាល បាននិយាយថា ពួកគេបានយល់ដឹងច្រើននូវប្រវត្តិរបបខ្មែរក្រហម តាមរយៈការប្រាប់​ពីមនុស្សចាស់ៗកើតទាន់ជំនាន់នោះ ​និងការសិក្សា ​ដែលរបបនោះ បាន​ធ្វើ​ឲ្យពលរដ្ឋ ​ខ្មែរជាច្រើនលាននាក់ រងទុក្ខវេទនាហួសបរិយាយ និងបានកាប់សម្លាប់ជាតិសាសន៍​ឯង​អស់ជាងបីលាន នាក់យ៉ាងសាហាវព្រៃផ្សៃ ។

ពួកគេបានបញ្ជាក់ថា ទោះជាមិនបានកើតទាន់ជំនាន់នោះក៏ដោយ ប៉ុន្តែតាមរយៈតឹកតាងជាច្រើន ដែលបានបង្ហាញ ​និងសាក្សីដែលនៅរស់ គឺពួកគេមិនចង់ជួបនូវរបបបែបនោះទេ ហើយអរគុណ​យ៉ាងក្រៃ លែងចំពោះគុណបំណាច់ នៃថ្ងៃ៧មករា ដែលបានជួយសង្គ្រោះប្រជាជនខ្មែរឱ្យគេចផុត​ពីរបបនោះ ។

ចំណែកប្រជាពលរដ្ឋចាស់ៗ ដែលបានកើតទាន់សម័យខ្មែរក្រហម បានរំលឹកថា ​ជំនាន់ប៉ុល ពត បាន​ធ្វើឲ្យពលរដ្ឋបាត់បង់​អស់សិទ្ធិសេរីភាពរបស់ខ្លួន ​ព្រាត់ប្រាសសាច់ញាតិ ដែល​ការ​ឈឺចាប់កាលពី​ សម័យនោះ ​ពិបាកនឹងពិពណ៌នាណាស់ ព្រោះទិដ្ឋភាព នៃទុក្ខវេនាមានច្រើនខ្លាំង​ណាស់​ ។

ថ្ងៃ៧មករា ឆ្នាំ១៩៧៩ គឺជាថ្ងៃរំដោះប្រជាពលរដ្ឋ ចេញពីរបបខ្មែរក្រហម ជាថ្ងៃបង្កើតជីវិតទី២ ជូនប្រជាពលរដ្ឋខ្មែរជាច្រើនលាននាក់ តាមរយៈការបូជានូវសាច់ស្រស់ ឈាមស្រស់ និងការតស៊ូរបស់យុទ្ធ ជន នៃរណសិរ្សសង្គ្រោះជាតិកម្ពុជា ៕អត្ថបទ៖ បាន សុខរិទ្ធិ