ភ្នំពេញ៖ ក្រសួងអប់រំយុវជន និងកីឡា ក្នុងឆ្នាំសិក្សា២០២២-២០២៣ នេះបានផ្ដល់អាហារូបករណ៍ដោយឥតបង់ថ្លៃ ចំនួន ៩២១០ កន្លែងដល់សិស្ស។ ការផ្ដល់អាហារូបករណ៍នេះ បានបែងចែកចេញជា ៤អាទិភាព ក្នុងនោះ មានសិស្សទូទៅ សិស្ស​អាទិភាពនារី សិស្សអាទិភាពក្រីក្រ និងសិស្សអាទិភាពតំបន់ដាច់ស្រយាល។ នេះបើតាមលោក គង់ ភូមីកា ប្រធាននាយកដ្ឋានឧត្តមសិក្សា នៃក្រសួងអប់រំ យុវជន និងកីឡា បានមានប្រាប់ទូរទស្សន៍ BTV ក្នុងកិច្ចសម្ភាសន៍ នាព្រឹកថ្ងៃទី៥ ខែមករា ឆ្នាំ២០២៣នេះ។

វិស័យអប់រំនៅក្នុងប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេច​តេជោ ហ៊ុន សែន នាយករដ្ឋមន្រ្ដីនៃកម្ពុជា ​បានដាក់ចេញនូវយុទ្ធសាស្រ្ដចតុកោណ និងគោល​នយោបាយ​សំខាន់ៗ ដើម្បីលើកកម្ពស់ធនធានមនុស្ស និងបានចាត់ទុកការលើកកម្ពស់ធនធាន​មនុស្ស​គឺជាអាទិភាពចំបងជាងគេ។

តាមរយៈរយៈយុទ្ធសាស្រ្ដ និងគោលនយោបាយទាំងនេះ ក្រសួងអប់រំយុវជន និងកីឡា បានធ្វើ​កំណែ​ទម្រង់វិស័យអប់រំរបស់ប្រទេសកម្ពុជាជាជំហានៗ ​ដើម្បីពង្រឹងសមត្ថភាពគ្រូបង្រៀន និង​សិស្សានុសិស្សអាចប្រកួតប្រជែងជាមួយយវុជនតាមបណ្ដាប្រទេសក្នុងតំបន់ ​និងពិភពលោកបាន។

លោក គង់ ភូមីកា ថ្លែងថា៖«សម្រាប់ឆ្នាំសិក្សា ២០២២-២០២៣ នេះ ក្រសួងអប់រំ បានធ្វើការជ្រើស​រើសបេក្ជនចំនួន ៩៤១០ នាក់ ឱ្យទទួលបានអាហារូបករណ៍ចូលរៀនថ្នាក់បរិញ្ញាបត្រ​ដោយ​មិនបង់ថ្លៃសិក្សា ១០០ ភាគរយ។ ការផ្ដល់អាហារូបករណ៍នេះ យើងបានបែងចែកជា ៤ អាទិភាព​សំខាន់ៗ គឺសិស្សទូទៅ សិស្សអាទិភាពនារី ​សិស្សអាទិភាពក្រីក្រ និងសិស្សអាទិភាព​តំបន់​ដាច់ស្រយាល»។

ការយកចិត្តទុកដាក់របស់រាជរដ្ឋាភិបាលបែបនេះ ​ក្រសួងអប់រំយុវជន ​និងកីឡា ក្នុងឆ្នាំ ២០២២-២០២៣ នេះ ​បានផ្ដល់អាហារូបករណ៍ជាង ៩ ​ពាន់កន្លែងដល់សិស្សក្រោយពីទទួល​បាន​អាហារូបករណ៍​ដោយ​ឥតបង់ថ្លៃពីគ្រឹះស្ថានសិក្សារបស់រដ្ឋ ​និងឯកជនប្រមាណ ៣៩ គ្រឹស្ថានសិក្សា៕អត្ថបទ៖ វ៉ន ដារ៉ា