ភ្នំពេញ៖ ក្រសួងពាណិជ្ជកម្ម​ស្វាគមន៍ និងគាំទ្រចំពោះ​ក្រុមហ៊ុន Walmart ដែល​មាន​បំណង​ពង្រីក​អាជីវកម្ម​របស់​ខ្លួន ​និង​ធ្វើ​កិច្ចសហប្រតិបត្តិការ​ពង្រឹង​ភាព​ជា​ដៃគូ ​ក្នុង​សកម្មភាពធុរកិច្ច ​វិនិយោគ ក្នុង​ប្រទេសកម្ពុជា​ ដើម្បីបង្កើតការងារជូនប្រជាជនកម្ពុជា ​ជាពិសេសស្រ្តី ​ជំរុញ​កំណើនសេដ្ឋកិច្ច និងកាត់បន្ថយភាពក្រីក្រ។

នេះ​បើ​តាម ឯកឧត្តម​ ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម ​បាន​បញ្ជាក់​ទៅ​កាន់​លោកស្រី Anbinh Phan តំណាងក្រុមហ៊ុន Walmart ថ្លែងក្នុង​​ជំនួបនាព្រឹកថ្ងៃទី៥ ខែមករា ឆ្នាំ២០២៣នេះ នៅទីស្ដីការក្រសួងពាណិជ្ជកម្ម។

ឯកឧត្តមរដ្ឋមន្រ្តី ប៉ាន សូរស័ក្ដិ ស្វាគមន៍ចំពោះ​ លោកស្រី Anbinh Phan និងសហការី ដែល​បាន​ស្នើ​សុំ​ការ​សហការ​ពីក្រសួងពាណិជ្ជកម្ម​នៅក្នុងការពង្រីកធុរកិច្ចរបស់ខ្លួននៅក្នុងប្រទេសកម្ពុជា និង​បាន​វាយតម្លៃខ្ពស់នូវការបញ្ជាទិញរបស់ក្រុមហ៊ុន Walmart នូវផលិតផល​សម្លៀកបំពាក់ និងសម្ភារៈ​ធ្វើ​ដំណើរ​ពីកម្ពុជា។

ឯកឧត្តមរដ្ឋមន្រ្តី គាំទ្រពេញទំហឹង ចំពោះគោលបំណងរបស់ក្រុមហ៊ុន Walmart ក្នុងការ​ទិញ​ទំនិញ​ពី​កម្ពុជា​បន្ថែមទៀត ដូចជាផលិតផល​គ្រឿងសង្ហារឹម អេឡិចត្រូនិក និងជាពិសេស​ផលិតផល​កសិកម្ម​សំខាន់ៗពីកម្ពុជា ដែលបំពេញបានតាមស្តង់ដារអន្តរជាតិ។

ឯកឧត្ដមថ្លែងថា៖«ការជំរុញទិញផលិតផលបន្ថែមពីកម្ពុជា គឺសំដៅរួមចំណែកក្នុងការបង្កើតការងារ កាត់បន្ថយភាពក្រីក្រ និង​អភិវឌ្ឍន៍​សេដ្ឋកិច្ចកម្ពុជា។ ក្រសួងពាណិជ្ជកម្ម នឹងបន្ត​កិច្ចសហការ​ជាមួយក្រុមហ៊ុន Walmart វិស័យឯកជន និងក្រសួង-ស្ថាប័ន ពាក់ព័ន្ធនានា ដើម្បីជំរុញការនាំចេញផលិតផលកសិកម្មពីកម្ពុជា ទៅកាន់ទីផ្សារសហរដ្ឋអាម៉េរិក ឱ្យកាន់តែរីកចម្រើនបន្ថែមទៀត»។

លោកស្រី Anbinh Phan បានកោតសរសើរ និងវាយតម្លៃខ្ពស់ចំពោះសមត្ថភាពក្នុងការគ្រប់គ្រងស្ថានភាពនៃជំងឺកូវីដ-១៩ ដ៏មាន​ប្រសិទ្ធភាព​របស់រាជរដ្ឋាភិបាលកម្ពុជា និងបានអបអរសាទរជូនក្រសួងពាណិជ្ជកម្ម ក្នុងការសម្រេចបាន​នូវកិច្ចព្រមព្រៀង​ពាណិជ្ជកម្ម​សេរីថ្មីៗ ដូចជា RCEP កម្ពុជា-ចិន កម្ពុជា-កូរ៉េ ជាដើម។

លោកស្រីថ្លែងថា៖«ក្រុមហ៊ុន Walmart មានបំណងពង្រីកអាជីវកម្មរបស់ខ្លួន និងធ្វើកិច្ចសហប្រតិបត្តិការពង្រឹងភាពជាដៃគូ ក្នុងសកម្មភាពធុរកិច្ច វិនិយោគ ក្នុងប្រទេសកម្ពុជា ដើម្បីបង្កើតការងារជូនប្រជាជនកម្ពុជា ជាពិសេសស្រ្តី ជំរុញកំណើនសេដ្ឋកិច្ច និងកាត់បន្ថយភាពក្រីក្រ។ ក្រុមហ៊ុន Walmart នៅតែជាដៃគូពាណិជ្ជកម្មដ៏ល្អ ជាមួយអ្នកផលិតនៅកម្ពុជា លើវិស័យសម្លៀកបំពាក់ វាយនភ័ណ្ឌ និងកសិកម្ម»៕ ដោយ ៖ វ៉ន ដារ៉ា