កណ្ដាល៖ បេក្ខជនប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២១-២០២២ ដែលជាប់និទ្ទេស A នៅ​ស្រុក​លើកដែក ចំនួន ៥នាក់ ទទួលបានរង្វាន់ម៉ូតូ Honda SCOPY-2023 ពីឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកអគ្គនាយកមជ្ឈមណ្ឌលសកម្មភាពកំចាត់មីននៅកម្ពុជា និង​ជា​ប្រធានក្រុមការងាររាជរដ្ឋា ភិបាលចុះមូលដ្ឋានស្រុកលើកដែក ខេត្តកណ្តាល។

ថ្លែងនៅក្នុងឱកាសផ្តល់ជូនរង្វាន់នាព្រឹកថ្ងៃទី៦ ខែមករា ឆ្នាំ២០២៣នេះ ស្ថិត​នៅ​ក្នុង​សាលា​ស្រុក​លើក​ដែក ឯកឧត្តម ហេង រតនា បានសម្តែងនូវការអបអរសាទរ ចំពោះក្មួយៗទាំងអស់ ដែល​បាន​​ខិត​ខំ​ប្រឹង​ប្រែង​រៀន​សូត្រ​រហូត​ទទួល​បាន​ជោគជ័យ​ជូន​ដល់​គ្រួសារ និង​សង្គម​ជាតិ​ហើយ​ក៏​បាន​ផ្តាំ​ផ្ញើ​ដល់ក្មួយៗ ដែលពុំបានប្រឡងជាប់ ត្រូវសិក្សារៀនសូត្រឲ្យបានខ្លាំងក្លាបន្ថែមទៀត ដើម្បី​ទទួល​បានជោគជ័យនៅឆ្នាំក្រោយព្រោះក្មួយៗទាំងអស់ គឺជាទំពាំងស្នងឫស្សី សម្រាប់​ប្រទេស​ជាតិ និងជាធនធានមនុស្ស ដ៏សំខាន់ នាថ្ងៃខាងមុខ។

ឯកឧត្តមបានបន្តថា ក្មួយៗមិនត្រឹមតែរៀនឲ្យបានតែជាប់ប៉ុណ្ណោះទេ ត្រូវរៀនឲ្យចេះ សម្រាប់​ខ្លួន​ឯង ហើយក្មួយៗអាចមានឱកាសសិក្សា និងប្រឡងជាប់នៅពេលនេះ ក៏ដោយសារប្រទេសយើង មាន​សន្តិភាព ដូចនេះយើងទាំងអស់គ្នា សូមអរគុណ សន្តិភាព និងបន្ត​ថែ​រក្សា​នូវ​សុខ​សន្តិភាព​នេះ​ឲ្យ​បានគង់វង្ស។

យ៉ាងណាក៏ដោយ ឯកឧត្តម ហេង រតនា បានសម្តែងនូវសេចក្តីសោមនស្សរីករាយ និងមាន​មោទនភាព​យ៉ាង​អនេក ចំពោះការខិតខំប្រឹងប្រែង របស់សិស្សានុសិស្ស លោកគ្រូអ្នកគ្រូ និងមាតា​បិតា​សិស្ស ដែលបានរួមគ្នាសម្រេចបាន នូវភាពជោគជ័យដ៏ ត្រចះត្រចង់នេះ ដែលទាំង​នេះ​កើត​ចេញ​ពី​ការ​ខិតខំប្រឹងប្រែង រៀនសូត្ររបស់ពួកគេ សេចក្តីប៉ងប្រាថ្នាជាក់លាក់ លើការសិក្សា រួម​ជា​មួយ​ការ​លើកទឹកចិត្តផ្សេងៗទៀត ដែលនាំដល់ការទទួលបាននូវលទ្ធផលវិជ្ជាមាន សម្រាប់​សិស្សា​នុសិស្ស​ទាំង​អស់នេះ។

ក្រៅពីផ្តល់​រង្វាន់ម៉ូតូជូនដល់សិស្សជាប់និទ្ទេសAម្នាក់មួយគ្រឿង ឯកឧត្តម ហេង រតនា ក៏បានផ្តល់ រង្វាន់ និងអំណោយដល់សិស្សានុសិស្សជាប់និទ្ទេសផ្សេង និងប្រឡងធ្លាក់រួមទាំងជូនដល់លោកគ្រូ អ្នក​គ្រូ​ផងដែរ ដើម្បីជាការលើកទឹកចិត្តដល់ពួកគេ៕ អត្ថបទ៖ បាន ចក់