គុនដាវ៖ សហព័ន្ធកីឡាគុនដាវកម្ពុជា បានព្យាយាមប្រើគ្រប់វិធីសាស្ត្រដើម្បីពង្រឹងការហ្វឹកហាត់ របស់ក្រុមជម្រើសជាតិកម្ពុជា អំឡុងពេលរីករាលដាលខ្លាំងនៃជំងឺកូវីដ-១៩ ពិសេសក្នុងដំណាក់កាលបិទខ្ទប់ ដើម្បីសម្រួចសមត្ថភាពត្រៀមការប្រកួតកីឡាស៊ីហ្គេមលើកទី៣១ នៅប្រទេសវៀតណាមនាចុងឆ្នាំ២០២១ នេះ។
លោក សុខ អាង អគ្គលេខាធិការសហព័ន្ធបានឲ្យដឹងថា បច្ចុប្បន្នក្រុមជម្រើសជាតិដែលផ្ដល់ដោយក្រសួងអប់រំ យុវជន និងកីឡា គឺមានកីឡាករ ៧នាក់ និងកីឡាការិនី ៣នាក់ រួមទាំងគ្រូបង្វឹក ៤រូប។ លើសពីនេះ សហព័ន្ធក៏បានរៀបចំក្រុមបំរុងចំនួន ៨នាក់ផងដែរដើម្បីហ្វឹកហាត់ត្រៀមការប្រកួតអន្តរជាតិនានាក្នុងឆ្នាំ២០២១ ពិសេសការប្រកួតកីឡាស៊ីហ្គេមតែម្ដង។ ប៉ុន្តែក្នុងដំណាក់កាលរីករាលដាលខ្លាំងនៃជំងឺកូវីដ-១៩ សហព័ន្ធបានផ្ដោតសំខាន់ការហ្វឹកហាត់ដាច់ឆ្ងាយពីគ្នា ពោលគឺហាត់នៅផ្ទះរៀងៗខ្លួន។ ដើម្បីត្រៀមស៊ីហ្គេម សហព័ន្ធបានបែងចែកប្រភេទកីឡាគុនដាវជា ៣ក្រុម ហើយក្នុងមួយក្រុមមានគ្រូបង្វឹក ២នាក់មើលការខុសត្រូវ ក្នុងនោះដាវតូចគឺមានគ្រូ សាន សុខសីហា និងលោក ឆាយ ចាន្ធីថារី, ដាវកាប់ មានគ្រូបរទេសលោក ប្រុយ ណូ កេមពី និងលោកស្រី ម៉ោ ម៉ានុត និងដាវធំ មានលោក ខុត សៀង និងរូបលោកផ្ទាល់។
ចំពោះការហ្វឹកហាត់ទៀតសោតគឺហាត់ទាំងព្រឹក ទាំងល្ងាច។ លើសពីនេះ សហព័ន្ធក៏ព្យាយាមបង្កើនពេលវេលាហ្វឹកហាត់ឲ្យបានច្រើន ដើម្បីពង្រឹងគុណភាពហ្វឹកហាត់ឲ្យកាន់តែប្រសើរទៅតាមបច្ចេកទេស និងវិញ្ញាសានីមួយៗរហូតឈានការហាត់ ១ស្មើ រវាងគ្រូ និងសិស្សទៀតផង។ ប៉ុន្តែក្នុងស្ថានភាពបច្ចុប្បន្ន បានធ្វើឲ្យការហ្វឹកហាត់ជួបការលំបាក ដ្បិតសិស្សគុននៅខណ្ឌឆ្ងាយៗពីគ្នា ដែលតម្រូវឲ្យសហព័ន្ធរៀបចំគំរូរួមមួយ សម្រាប់កីឡាករ-កីឡាការិនីហ្វឹកហាត់ដោយខ្លួនឯង ក្នុងដំណាក់កាលបិទខ្ទប់។ យ៉ាងណាមិញ សម្រាប់ការហ្វឹកហាត់ក្នុងដំណាក់រីករាលដាលខ្លាំងនៃជំងឺកូវីដ-១៩ នេះ សហព័ន្ធបានរៀបចំវិធានការការពារយ៉ាងម៉ឺងម៉ាត់ ដោយគោរពតាមវិធានរបស់ក្រសួងសុខាភិបាល និងគោលការណ៍របស់សហព័ន្ធកីឡាគុនដាវអន្ដរជាតិ ហើយសហព័ន្ធបានក្រើនរំឮកឲ្យកីឡាករ-កីឡាការិនីបង្កើនស្មារតីប្រុងប្រយ័ត្នជានិច្ច ដើម្បីការពារជំងឺដ៏កាចសាហាវនេះផង និងដើម្បីពង្រឹងសមត្ថភាពត្រៀមការប្រកួតកីឡាស៊ីហ្គេម នៅប្រទេសវៀតណាមផងដែរ។ នេះបើតាមការបញ្ជាក់បន្ថែមរបស់លោក សុខ អាង។
គួរបញ្ជាក់ថា ការប្រកួតកីឡាស៊ីហ្គេមលើកទី៣១ នៅទីក្រុងហាណូយ គឺគ្រោងចាប់ផ្ដើមប្រកួតពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ ដោយម្ចាស់ផ្ទះវៀតណាមបានសម្រេចដាក់កីឡា ៤០ប្រភេទឲ្យធ្វើការប្រកួតប្រជែង ខណៈកម្ពុជាបានត្រៀមបញ្ជូនអត្តពលិក ៣២ប្រភេទកីឡាទៅចូលរួម ក្នុងនោះក៏មានប្រភេទកីឡាគុនដាវដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
