អាមេរិក៖ ការតវ៉ាបានធ្វើឡើងកាលពីយប់ថ្ងៃអង្គារនៅទីក្រុង Columbus រដ្ឋ Ohio សហរដ្ឋអាមេរិក បន្ទាប់ពីមន្ត្រីនគរបាលម្នាក់បានបាញ់សម្លាប់ក្មេងស្រីជំទង់ម្នាក់។ ហ្វូងមនុស្សបានប្រមូលផ្តុំគ្នាកាលពីយប់ថ្ងៃអង្គារ នៅកន្លែងកើតហេតុក្នុងតំបន់ Legion Lane ដែលនគរបាលបានបិទមិនអោយធ្វើចរាចរណ៍ដោយផ្នែក។
អ្នកផ្សេងទៀតបានប្រមូលផ្តុំគ្នានៅទីស្នាក់ការកណ្ដាល របស់នគរបាលក្នុងទីក្រុងនេះដើម្បីតវ៉ាមួយសប្តាហ៍ បន្ទាប់ពីមន្ត្រីនគរបាលបានបាញ់ម្សៅម្រេច ទៅលើមនុស្សមួយក្រុមដែលព្យាយាមចូលក្នុងទីស្នាក់ការកណ្ដាលនគរបាល ព្រោះករណីនគរបាលបាញ់សម្លាប់បុរសម្នាក់ ដែលមានកាំភ្លើងនៅក្នុងបន្ទប់សង្គ្រោះបន្ទាន់នៅមន្ទីរពេទ្យ។ ក្រុមអ្នកតវ៉ារាប់រយនាក់បានរុញរបាំងនគរបាលឆ្លងកាត់ទីស្នាក់ការកណ្តាល ហើយបានទៅជួបមន្ត្រីនៅពេលដែលមន្ត្រីទីក្រុងកំពុងបង្ហាញឃ្លីបវីដេអូ បំពាក់ភ្ជាប់ខ្លួននៅខាងក្នុងនោះ។ នគរបាលបានបង្ហាញរូបភាពវីដេអូបំពាក់លើដងខ្លួន កាលពីយប់ថ្ងៃអង្គារនៅឯសន្និសីទកាសែតមួយ នៃហេតុការណ៍នគរបាលបានបាញ់សម្លាប់ក្មេងស្រីនោះ ដែលជាជនជាតិស្បែកខ្មៅ ខណៈដែលនាងទំនងជាព្យាយាមចាក់មនុស្ស ២នាក់ដោយប្រើកាំបិតផ្ទះបាយ។
នគរបាលនិយាយថា ច្បាប់រដ្ឋអនុញ្ញាតឱ្យនគរបាលប្រើកម្លាំងប្រកបដោយដ៏គ្រោះថ្នាក់ ដើម្បីការពារខ្លួន ឬអ្នកដទៃ។ ក្រុមមន្ត្រីបាននិយាយថា នគរបាលបានឆ្លើយតបទៅនឹងការប៉ុនប៉ងចាក់ នៅពេលនគរបាលបានបាញ់សម្លាប់ក្មេងស្រីនោះ នៅម៉ោងប្រហែល ៤ និង ៤៥នាទីល្ងាច។ នគរបាលបាននិយាយថា ក្មេងស្រីនោះត្រូវបានបញ្ជូនទៅមន្ទីរពេទ្យ ដែលត្រូវបានប្រកាសថាស្លាប់ហើយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
