ឧត្ដរមានជ័យ៖ ពលរដ្ឋ ដែលកំពុងរស់នៅក្នុងអតីតតំបន់សង្គ្រាម បានសម្តែងនូវការដឹងគុណ​ចំពោះ​ថ្ងៃ៧មករា ដែលបាននាំមកនូវសុខសន្តិភាពជូនប្រទេសជាតិ ​និង​ការអភិវឌ្ឍរីកចម្រើន មក​ដល់សព្វថ្ងៃនេះ ។

ប្រជាពលរដ្ឋនៅក្នុងខេត្តឧត្តរមានជ័យ ដែលជាខេត្តជាប់ព្រំដែនថៃ ​និងជាខេត្តអតីតសមរភូមិមួយ បាននិយាយថា ពួកគេ មិនដែលបំភ្លេចទេ ថ្ងៃ៧ មករា ១៩៧៩ ដែលបានជួយរំដោះប្រទេសជាតិ និង ប្រជាពលរដ្ឋកម្ពុជា ​ឱ្យរួចផុតពីភាពវេទនា ​និងការកាប់សម្លាប់ និងបាននាំប្រទេសជាតិ​មកដល់​បច្ចុប្បន្នភាពនេះ ។

ប្រជាពលរដ្ឋ បានឱ្យដឹងថា បច្ចុប្បន្ន ខេត្តជាយដែនមួយនេះ ​ទទួលបានការអភិវឌ្ឍរីកចម្រើនលើ គ្រប់វិស័យ ​ដូចបណ្ដាខេត្តនានានៅក្នុងប្រទេសកម្ពុជាដែរ ​ជីវភាពប្រជាពលរដ្ឋ មាន​ការវិវត្ត​ធូរធារ​ខុសឆ្ងាយពីមុន ​ហេដ្ឋារចនាសម្ព័ន្ធគមនាគមតភ្ជាប់ ​ដែលអាចធ្វើដំណើរទៅ​មកបានស្រួល មាន​សំណង់អគារធំៗ សាលារៀន ​មន្ទីរពេទ្យ ភ្លើង​អគ្គិសនី​ព្រោងព្រាត ​ពីទីរួមខេត្តដល់តំបន់ជនបទ ។ ភាពរីកចម្រើន សម្បូរ សប្បាយទាំងនេះ ​បានកើតឡើងពីកត្តាសុខសន្តិភាព ៕អត្ថបទ៖ ឃិន សារិទ្ធ