ត្បូងឃ្មុំ៖ ឯកឧត្ដម ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានអញ្ជើញ​ជួប​សំណេះសំណាលជាមួយ បុគ្គលិកអប់រំ​ និងលោកគ្រូ អ្នកគ្រូ ​នៃគ្រឹះស្ថានសិក្សារដ្ឋ និងឯកជន នៅក្នុងខេត្តត្បូងឃ្មុំ ។

ក្នុងពិធីសំណេះសំណាល កាលពីម្សិលមិញ ឯកឧត្តមឧបនាយករដ្ឋមន្ត្រី ជា ​សុផារ៉ា បាននាំមកនូវ ការ​ផ្ដាំផ្ញើ​សាកសួរសុខទុក្ខប្រកបដោយក្តីនឹករលឹក ​និងក្តីស្រឡាញ់យ៉ាង​ជ្រាលជ្រៅបំផុត ​ពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា​ ជូនដល់បុគ្គលិកអប់រំ នាយកនាយករង និង​លោកគ្រូ អ្នកគ្រូទាំងអស់ នៅក្នុងខេត្តត្បូងឃ្មុំ។

ឯកឧត្ដម បានរំលឹកថា សម្ដេចតេជោ ហ៊ុន សែន បានដាក់ទិសដៅក្នុងការអភិវឌ្ឍធនធានមនុស្ស គឺជាអាទិភាព ជាកិច្ចការដ៏សំខាន់បំផុត ​និងមានសក្តានុពលសម្រាប់សង្គមជាតិ ​និងប្រជាជន ដូច្នេះហើយ​ ទើបក្រោយថ្ងៃរំដោះ៧មករា ឆ្នាំ១៩៧៩ រហូតមកដល់បច្ចុប្បន្ននេះ ​រាជរដ្ឋាភិបាល បាន​ខិតខំ​កសាងហេដ្ឋា រចនាសម្ព័ន្ធក្នុងវិស័យអប់រំ ដូចជាការកសាងសាលារៀនគ្រប់កម្រិត និងយកចិត្ត​ទុកដាក់ទៅលើជីវភាពគ្រូ បង្រៀន ​ពីព្រោះពួកគេមានគុណបំណាច់ដ៏ធំធេង ក្នុងការបណ្ដុះធនធាន​មនុស្ស។

ឯកឧត្តម បានបញ្ជាក់បន្ថែមថា ​ដោយសារមានថ្ងៃរំដោះ ​៧មករា ឆ្នាំ១៩៧៩ ទើបមានអ្វីៗគ្រប់ យ៉ាង​ដូចសព្វថ្ងៃនេះ ក្នុងនោះមានការអភិវឌ្ឍន៍លើគ្រប់វិស័យ​ រួមទាំងវិស័យអប់រំផងដែរ ​ស្របពេលដែល កម្ពុជា​កំពុងស្ថិតនៅក្រោមម្លប់សុខសន្តិភាព ​ដែលសម្ដេចតេជោ ​បានរកមកដោយលំបាក ដូច្នេះ​ត្រូវរួមគ្នា ​ថែរក្សាឱ្យបានគង់វង្ស ​និងចូលរួមបោះឆ្នោតគាំទ្រដល់សម្ដេចតេជោ​ ហ៊ុន សែន ជា​នាយករដ្ឋមន្ត្រី ដើម្បីឲ្យប្រទេសជាតិមានការអភិវឌ្ឍរីកចម្រើន ​និងភាពសុខដុមរមនាទៅមុខទៀត បន្តដល់​កូនចៅជំនាន់ក្រោយ ៕អត្ថបទ៖ ជឹង សេងឡុង