ភ្នំពេញ ៖ ឯកឧត្តម សេង សុមុន្នី រដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា ប្រាប់BTV នាថ្ងៃនេះថាការកើតថ្មី ទាំងសាសនា ឬក៏ជីវិត របស់ប្រជាជនកម្ពុជាក្រោយថ្ងៃរំដោះ ៧ មករា ១៩៧៩ បានផ្តល់ឱកាសឲ្យជឿឡើងវិញនៅថ្ងៃទី២១-២២ ខែមករា ឆ្នាំ១៩៧៩ បានបំបួសព្រះសង្ឃ ចំនួន៧អង្គ និងវត្តអារាម ដំបូងដែលត្រូវរៀបចំឡើងវិញ គឺមានតែវត្តឧណ្ណាលោម មួយប៉ុណ្ណោះ។

​ឯកឧត្តម សេង សុមុន្នី បានបន្តថា ធនធានព្រះសង្ឃ ក្រោយថ្ងៃរំដោះ៧ មករា ១៩៧៩ គឺមានតែ៧អង្គ មកដល់ពេល​នេះវត្តមាន​របស់​ព្រះសង្ឃ មានចំនួនជាង៧ម៉ឺនអង្គ និងវត្ត មានចំនួន៥១០៤វត្ត។ ដូច្នេះបើយើងប្រៀបធៀបពីចំនួនព្រះសង្ឃ និងចំនួនវត្តអារាម នាពេល​បច្ចុប្បន្ន គឺខុសគ្នាឆ្ងាយខ្លាំងណាស់ ដែលចាប់ផ្តើមកកើតដំបូង។ ម្យ៉ាងវិញទៀត ទាក់ទងនឹងប្រតិបត្តិធម៌វិន័យ យើងបាត់បង់ក្នុង​របប​ប្រល័យ​ពូជសាសន៍ ប៉ុល ពត គឺគម្ពី ក្បួនច្បាប់ ការប្រតិបត្តិ គឺមានតែអ្នកចាស់ទុំ ធ្លាប់បួសពីអតីត មកបួសរៀនឡើងវិញ ដើម្បីខិតខំរៀបចំសាសនា ដោយប្រតិបត្តិឯកសារឡើងវិញ ជាបន្តបន្ទាប់ និងធ្វើការបំបួសបន្តវេន។ ដោយឡែកបើគិតមកដល់សព្វថ្ងៃនេះ ថ្នាក់ដឹកនាំព្រះសង្ឃ ក៏ដូចជារាជរដ្ឋាភិបាល ដែលលោកខិតខំកសាងធនធានបុព្វជិតទាំងអស់ និងរហូតមកដល់ពេលនេះ អ្នកបួសក្នុងព្រះពុទ្ធសាសនា មានបណ្ឌិត ជិត១០០អង្គ។

​ជាចុងក្រោយឯកឧត្តម សេង សុមុន្នី បញ្ជាក់ទៀតថា ដើម្បីរួមចំណែក និងត្រូវបណ្តុះស្មារតីប្រជាពលរដ្ឋ យុវជន យុវតីទាំង​អស់ឲ្យ​យល់អំពីតម្លៃ នៃសន្តិភាព និងថែរក្សាសន្តិភាពរួមជាមួយគ្នា តាមរយៈទ្រឹស្តីព្រះពុទ្ធសាសនា ដែលជាសាសនារបស់រដ្ឋ ដែលជា​ទ្រឹស្តីប្រកបដោយស្មារតីសន្តិភាព និងការទទួលខុសត្រូវ ទៅលើស្មារតីសន្តិភាព និងជាក់លាក់ ដែលយើងបានតម្កល់ទុកក្នុងរដ្ឋធម្មនុញ្ញ រួចទៅហើយ នៅព្រះពុទ្ធសាសនានេះ។ ដូច្នេះនៅពេលនេះ យើងគិតថា មានអ្នកមានបុណ្យមួយ ដឹកនាំប្រទេស គឺ​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ទន្ទឹមនឹងនោះនាពេលក្រោយនឹងមានឥស្សរជន ដែលជាអ្នកមានគុណធម៌ មានបុណ្យ មកបន្តវេន ដូចនេះយើងគ្រប់គ្នា ត្រូវចូលរួមថែរក្សាបន្តវេន។ ហើយគោលការណ៍ទាំងអស់នេះ គឺសុំឲ្យយុវជនគ្រប់គ្នា យល់ឲ្យច្បាស់ថា ការខិតខំរបស់រាជរដ្ឋាភិបាល មិនមែនប្រយោជន៍បុគ្គលណាមួយនោះទេ គឺដើម្បីប្រយោជន៍របស់ប្រជាជនទូទាំងប្រទេស ហើយក៏ដើម្បីថែរក្សាជាតិមាតុភូមិឲ្យមានកិត្តិយស កិត្តិសព្ទ កេរ្តិ៍ឈ្មោះលើឆាកអន្តរជាតិ ដែលជាតម្លៃដ៏ខ្ពង់ខ្ពស់ជាទីបំផុត ដែលមិនអាចកាត់ថ្លៃបាននោះទេ៕ អត្ថបទ ៖ រដ្ឋា