ភ្នំពេញ ​៖ លោកប្រធានសមាគមស្បែកជើងកម្ពុជា បាននិយាយថា គិតក្នុងរយៈពេល ៤៤ឆ្នាំ​កន្លង​មក ពោលនៅក្រោយថ្ងៃជំនះ ៧មករា វិស័យឧស្សាហកម្មកាត់ដេរនៅកម្ពុជា ត្រូវបានរស់រាន​ឡើងវិញ ​ដោយចាប់ផ្តើមពីបាតដៃទទេ រហូតមានការអភិវឌ្ឍន៍ជាបន្តបន្ទាប់ ថែមទាំង​បង្កើត​ការងារ​រាប់សែន លាននាក់ជូនដល់ប្រជាពលរដ្ឋ។

​ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី ឧកញ៉ា លី ឃុនថៃ ប្រធានសមាគម​ស្បែក​ជើង​កម្ពុជា បានមានប្រសាសន៍ថា បើប្រៀបធៀប​រយៈពេល ៤៤ឆ្នាំមុន និងពេលបច្ចុប្បន្ននេះ គឺមានភាព​ខុសគ្នាឆ្ងាយណាស់ ដែលអាចនិយាយបានថា ខុសគ្នាដូចមេឃនិងដី ដោយសារជំនាន់ឆ្នាំ១៩៧៩ បែកចេញរបបប៉ុល ពត ពលរដ្ឋម្នាក់ៗសល់តែឈុតសម្លៀកបំពាក់ពណ៌ខ្មៅជាប់និងខ្លួនប៉ុណ្ណោះ។ លោកឧកញ៉ា បានរៀបរាប់បន្ត អ្វីដែលជាចងចាំ​មិនភ្លេច​ក្នុងសម័យដ៏អាក្រក់នោះ គឺការហូបចុក​មិនគ្រប់គ្រាន់ គ្មានសិទ្ធិសេរីភាពក្នុងដើរទៅណាមកណា និងគ្មានសិទ្ធិសូម្បីបញ្ចេញមតិជាដើម។

​ឧកញ៉ា លី ឃុនថៃ បានបញ្ជាក់ថា សព្វថ្ងៃនេះសមាជិកសមាគមស្បែកជើងកម្ពុជាសរុបចំនួន ១២០នាក់ បានផ្តល់​ឱកាសការងារ​ដល់កម្មករនិយោជិតសរុបចំនួនប្រមាណ ១៤ម៉ឺននាក់។ នៅក្នុងឱកាសនេះ លោកបានអះអាងថា ទាំងពេលបច្ចុប្បន្ន និងអនាគតទៅមុខ រូបលោក​នៅតែ​គាំទ្រ ពេញចិត្ត១០០ភាគរយ ទៅលើការដឹកនាំ​ដ៏ឆ្នើមប្រកប​ដោយគតិបណ្ឌិត​របស់​គណបក្សប្រជាជនកម្ពុជា ដើម្បីដឹកនាំប្រទេសជាតិឲ្យកាន់តែរីកចម្រើនទៅមុខឥតឈប់ឈរ ទាំងនៅក្នុងស្រុក និងលើឆាកអន្តរជាតិ។

ជុំវិញការលើកឡើងខាងលើនេះ ក្រុមកម្មការនីកាត់ដេរ ក្នុងរាជធានីភ្នំពេញ នៅព្រឹកថ្ងៃទី៧ មករា ឆ្នាំ២០២៣នេះ បាននិយាយថា ជាកាពិតណាស់ ឆ្លងកាត់បទពិសោធន៍ដ៏ជូរចត់ ព្រៃផ្សៃបំផុតក្នុង​សម័យ ប៉ុល ពតកន្លងទៅនេះ ផ្តើមចេញពីជ័យជម្នះ ៧មករា ធ្វើឲ្យក្រុមគ្រួសារទាំងមូល​បាន​រស់​នៅជួបជុំគ្នាប្រកបដោយភាពសម្បូរសប្បាយរីករាយ ជាពិសេស ការងារដែលទទួលបានសព្វថ្ងៃនេះ ក៏ដោយសារប្រទេសមានសុខសន្តិភាព។

​យោងតាមរបាយការណ៍របស់បេឡាជាតិសន្តិសុខសង្គម នៃក្រសួងការងារ និងបណ្តុះបណ្តាល​វិជ្ជាជីវៈ បានឲ្យដឹងថា គិតក្នុងឆ្នាំ២០២២​នេះ បច្ចុប្បន្នភាពសហគ្រាស គ្រឹះស្ថាន វិស័យកាត់ដេរ និងផលិតស្បែកជើង មានចំនួនប្រមាណជិត ១ ២០០រោងចក្រ បានបង្កើតការងារ​ដល់កម្មករនិយោជិតសរុបចំនួនជាង ៨៣ម៉ឺននាក់៕ ដោយ ៖ បូរ៉ាវី