ឧត្តរមានជ័យ៖ ក្នុងឱកាសអបអរសាទរ ទិវាគម្រប់ខួបលើកទី៤៤ នៃជ័យជម្នះ​ជា​ប្រវត្តិសាស្ត្រ​របស់​ប្រជាជនកម្ពុជាលើរបបប្រល័យ ពូជសាសន៍ ប៉ុល ពត នាថ្ងៃ៧មករា ឆ្នាំ១៩៧៩ ឯកឧត្តមកិត្តិសង្គហបណ្ឌិត គន់ គីម ថ្លែងថា ការសង្គ្រោះជាតិខ្មែរ​ឲ្យរស់រាន​មានជីវិត​ឡើងវិញទាន់ពេលវេលា រួចផុតពីទារុណកម្ម និង​ការ​កាប់​សម្លាប់​ដ៏សាហាវយង់ឃ្នងបំផុត ដែលពុំធ្លាប់មាន​នៅក្នុងប្រវត្តិសាស្ត្រ​របស់កម្ពុជា បាន​នាំ​ឱ្យ​កម្ពុជា​អភិវឌ្ឍន៍ឈានទៅមុខឥតឈប់ឈរ។

ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី និង​ជាប្រធាន​ក្រុមការងារ​ថ្នាក់ជាតិ​ចុះមូលដ្ឋាន​ខេត្តឧត្តរមានជ័យ បាន​ដឹកនាំ​រៀបចំពិធីអបអរសាទរខួបអនុស្សាវរីយ៍លើកទី៤៤ នៃទិវាជ័យជម្នះ​៧មករា​ (០៧មករា ១៩៧៩-០៧មករា ២០២៣) ដែល​មាន​ការ​ចូលរួម​ពី​បណ្តា​មន្រ្តី​រាជការ​ខេត្ត​ឧត្តរមានជ័យ មកពីអង្គភាព-ស្ថាប័នរដ្ឋ សរុបប្រមាណ៣០០នាក់ ដោយពិធីនេះ​ធ្វើឡើង​នៅ​សាលា​ខេត្ត​ឧត្តរមានជ័យ។

ឯកឧត្តមទេសរដ្ឋមន្ត្រី មានប្រសាសន៍ថា ការប្រារព្ធខួបអនុស្សាវរីយ៍នេះឡើង ក្នុងស្មារតី​ចងចាំ​ជានិច្ច​នូវគុណូបការៈ​ដ៏ថ្លៃថ្លា​បំផុត​របស់វីរយុទ្ធជន យុទ្ធនារីនៃរណសិរ្សសាមគ្គីសង្គ្រោះជាតិកម្ពុជា អ្នកស្នេហាជាតិទាំងឡាយ និងវីរយុទ្ធជននៃកងទ័ពស័គ ចិត្តវៀតណាម ដែលបានបូជាសាច់ស្រស់ ឈាមស្រស់ រហូតពលិកម្មអាយុជីវិតក្នុងការប្រយុទ្ធ ដើម្បីផ្ដួលរំលំរបបប្រល័យពូជសាសន៍ រំដោះ​ប្រជាជនកម្ពុជាឲ្យរួចផុតពីរណ្តៅមរណៈនៃរបបដ៏យង់ឃ្នងនេះ។

ឯកឧត្តមទេសរដ្ឋមន្ត្រី ថ្លែងថា ៤៤ឆ្នាំកន្លងទៅនេះ គឺជា៤៤ឆ្នាំ នៃសាមគ្គីភាព ជា៤៤ឆ្នាំ​នៃការ​តស៊ូ​អនុវត្ត​គ្រប់កិច្ចការប្រកប​ដោយវីរភាព និងជា៤៤ឆ្នាំនៃជ័យជម្នះរបស់ប្រជាជនកម្ពុជា ហើយ​ការ​តស៊ូ​ពុះពារនេះ បានកែប្រែមាតុភូមិពី ទឹកដីមរណៈ មកជាទឹក​ដីលូត​លាស់ដ៏​ស្រស់បំព្រង​ប្រកប​ដោយ​មោទនភាព​បំផុត​ ដែលបានបង្កើនជំនឿ និង ពង្រឹងការតាំងចិត្តរបស់យើង ដើម្បីសម្រេច​នូវ​សមិទ្ធផល​ថ្មីៗទៀតក្នុងការអភិវឌ្ឍសង្គម-សេដ្ឋកិច្ច និងការ កសាងអនាគត​ដ៏រុងរឿង​សម្រាប់​កូនចៅ​យើងគ្រប់ជំនាន់តទៅមុខទៀត ដោយគ្មានការកើតមានជាថ្មីនូវសង្គ្រាម៧មករា បានផ្តល់​កំណើត​ទីពីរ​ដល់ប្រជាជនកម្ពុជា បើគ្មានជ័យជម្នះ៧មករា គឺគ្មានកម្ពុជានៅថ្ងៃនេះទេ។

ឯកឧត្តមទេសរដ្ឋមន្រ្តី គន់ គីម បញ្ជាក់ថា ខួបនៃទិវាជ័យជម្នះ ៧មករា នៅឆ្នាំនេះ ប្រារព្ធ​ឡើង​ក្នុង​សភាពការណ៍ដែល​ព្រះរាជាណាចក្រកម្ពុជា បានសម្រេចសមិទ្ធផលធំៗថ្មីទៀតលើគ្រប់វិស័យ បន្ទាប់​ពី​បានងើបឡើងវិញយ៉ាងឆាប់​រហ័ស​ពីវិបត្តិ​ជំងឺកូវីដ-១៩ ហើយកំពុងបន្ត​ឈានទៅ​មុខប្រកប​ដោយភាពជឿជាក់លើមាគ៌ាសន្តិភាព ប្រជាធិបតេយ្យ និងអភិវឌ្ឍន៍ ជាមួយ នឹងការលេច​ត្រដែត​ឡើង​នូវកិត្យានុភាពរបស់កម្ពុជាលើឆាកអន្តរជាតិ។

ឯកឧត្តមទេសរដ្ឋមន្ត្រី គន់ គីម គូសបញ្ជាក់ថា ឆ្លងកាត់រយៈពេល ៤៤ឆ្នាំមកនេះ បានបង្ហាញ​ច្បាស់​ថា ​ផ្តើមពីជ័យជម្នះ ៧មករា ប្រទេសកម្ពុជា បាននិងកំពុង​ឈានទៅមុខ​ឥតឈប់ឈរតាម​ទិសដៅ​ដ៏ត្រឹមត្រូវ ដែលឆ្លើយតប​ទៅនឹងបំណង​ប្រាថ្នាដ៏ពិសិដ្ឋ​របស់ប្រជាជន។

ឯកឧត្តមទេសរដ្ឋមន្រ្តី គន់ គីម បន្តថា កម្ពុជាបានប្រែក្លាយពីវាលពិឃាតនៃរបបប្រល័យពូជសាសន៍, ពីសមរភូមិនៃសង្គ្រាមដ៏រ៉ាំរ៉ៃ, ពី ការបែកបាក់ជាតិ និងការបែងចែកទឹកដី និងពីទឹកដីមួយ​ដែលខឿន​សេដ្ឋកិច្ចជាតិត្រូវបំផ្លាញខ្ទេចខ្ទី ទៅជាទឹក ដីដែលមានសន្តិភាព សាមគ្គីភាព ប្រជាធិបតេយ្យ ការគោរពសិទ្ធិមនុស្ស នីតិរដ្ឋ និងការអភិវឌ្ឍលើគ្រប់វិស័យ ធ្វើឲ្យប្រជាជន​គ្រប់រូបបាន​រស់នៅ​យ៉ាងសុខដុមរមនា ក្រោមដំបូលរដ្ឋធម្មនុញ្ញតែមួយ និងម្លប់ដ៏ត្រជាក់ន អង្គព្រះមហាក្សត្រ​ជាទី​គោរពសក្ការៈដ៏ខ្ពង់ខ្ពស់បំផុត។

លើសពីនេះ ឯកឧត្តមទេសរដ្ឋមន្ត្រី បន្ថែមថា ភាពពិតជាក់ស្ដែងទាំងនេះ បានបញ្ជាក់ច្បាស់អំពី ការផ្លាស់ប្តូរដ៏ធំធេងជា​ប្រវត្តិសាស្ត្រ​របស់កម្ពុជា ដែលកើតពីការដឹក​នាំដ៏ត្រឹមត្រូវ​របស់រាជរដ្ឋាភិបាល​ចេញពី គណបក្សប្រជាជនកម្ពុជា, ពីការខិតខំរបស់គ្រប់ក្រសួង ស្ថាប័នរដ្ឋ និងអាជ្ញាធរគ្រប់​លំដាប់ថ្នាក់, ពីការចូលរួម របស់ប្រជាជនគ្រប់ស្រទាប់វណ្ណៈ គ្រប់ជនជាតិ គ្រប់ជំនឿសាសនា ដោយលើកទឹកចិត្តស្នេហាជាតិដ៏ជ្រាលជ, ពីការចូលរួមនៃវិស័យឯកជន និងសង្គមស៊ីវិល ព្រមទាំងការគាំទ្រ និងជួយឧបត្ថម្ភ​ដ៏ស្មោះសរពីសំណាក់ បណ្តាប្រទេសជាមិត្តជិតឆ្ងាយ និងសហគមន៍អន្តរជាតិ៕ ដោយ ៖ ឧត្ដម