ស្វាយរៀង: ថ្ងៃទី០៧ ខែមករា ឆ្នាំ២០២៣ ក្នុងនាមលោកទំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង ឯកឧត្តមទេសរដ្ឋមន្រ្តី លី ធុជ ប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត ខេត្តស្វាយរៀង បានអញ្ជើញអបអរសាទរខួបអនុស្សាវរីយ៍លើកទី៤៤ នៃជ័យជម្នះ ៧មករា (៧មករា ១៩៧៩-៧មករា ២០២៣) នៅបរិវេណសាលាក្រុងបាវិត ខេត្តស្វាយរៀង។ ពិធីនេះ មានការចូលរួមពីសមាជិកក្រុមការងារ រដ្ឋបាលក្រុងបាវិត មន្រីរាជការជុំវិញក្រុង កងកម្លាំងប្រដាប់អាវុធ ក្រុមប្រឹក្សាសង្កាត់ មេភូមិ លោកគ្រូ-អ្នកគ្រូ និងប្រជាពលរដ្ឋក្រុងបាវិត។

ក្នុងឱកាសនោះ ឯកឧត្តមទេសរដ្ឋមន្រ្តី លី ធុជ បានសម្តែងនូវការដឹងគុណ និងកត្តញ្ញូតាធម៌ដ៏ជ្រាលជ្រៅជូនចំពោះសម្តេចអគ្គមហាសេនាបតីតេជោ ហ៊ុន សែន ក៏ដូចជាថ្នាក់ដឹកនាំគណបក្សប្រជាជនកម្ពុជាទាំងអស់ ដែលបានពលៈសាច់ស្រស់ ឈាមស្រស់ និងយកជីវិតធ្វើដើមទុន ក្នុងការរំដោះប្រទេសជាតិ ចេញពីរបបប្រល័យពូជសាសន៍ដ៏សែនឃោឃៅ ព្រមទាំងបានផ្តល់នូវកំណើតទី២ ជូនដល់ប្រជាជនកម្ពុជាកម្ពុជាទាំងមូល។

ឯកឧត្តមទេសរដ្ឋមន្រ្តី បានបន្តទៀតថា ជ័យជម្នះ ៧មករា គឹជាមហាជោគជ័យដ៏ឧត្តុង្គឧត្តមរបស់គណបក្សប្រជាជនកម្ពុជា និងក៏ជាដំណើរចាប់ផ្តើមបង្កើតឲ្យមាននយោបាយឈ្នះ ឈ្នះ នាំមកនូវសុខសន្តិភាពពេញលេញទូទាំងប្រទេសកម្ពុជា ជាពិសេសការចាប់ផ្តើមអភិវឌ្ឍន៍ប្រទេសកម្ពុជា ពីចំណុចសូន្យរហូតដល់មានការអភិវឌ្ឍលើគ្រប់វិស័យដូចសព្វថ្ងៃ ក៏ដូចជាបានធ្វើឲ្យកម្ពុជាឈរស្មើមុខស្មើមាត់ជាមួយបណ្តាប្រទេសជុំវិញពិភពលោក។ 

ឯកឧត្តមទេសរដ្ឋមន្រ្តី បានរំលឹកបន្ថែមទៀតថា យើងទាំងអស់គ្នាជាប្រជាពលរដ្ឋខ្មែរ ត្រូវតែចងចាំនិងដឹងគុណជាប់ជានិច្ចនូវគុណតម្លៃ ៧មករា និងគុណតម្លៃសន្តិភាព ដែលថ្នាក់ដឹកនាំគណបក្សប្រជាជនកម្ពុជា បានខិតខំស្វែងរកយ៉ាងលំបាក ដើម្បីភាពសុខដុមរមនារបស់ប្រជាជនកម្ពុជាទូទាំងប្រទេស។ យើងទាំងអស់គ្នាត្រូវប្រឆាំងដាច់ខាតចំពោះពួកអមិត្តទាំងឡាយណា ដែលតែងតែមានបំណងចង់បំផ្លាញនូវសុខសន្តិភាព និងផ្តួលរំលំរដ្ឋាភិបាលស្របច្បាប់ ដែលកើតចេញពីប្រជាជន និងដើម្បីប្រជាជន។

ឯកឧត្តមទេសរដ្ឋមន្រ្តី បានបញ្ជាក់បន្ថែមថា ក្នុងនាមជាអ្នកបន្តវេន ត្រូវមានទំនួលខុសត្រូវខ្ពស់ក្នុងការប្តេជ្ញា ថែរក្សាសមិទ្ធផលសម្រេចបានឲ្យបានគង់វង្សជាដរាប និងប្តេជ្ញារួមគ្នាការពារដាច់ខាតថែរក្សាសន្តិភាព សន្តិសុខ និងស្ថិរភាពនយោបាយ រួមគ្នាពង្រឹងឯកភាពជាតិ សាមគ្គីភាពផ្ទៃក្នុងរឹងមាំ បង្កើនការរីកចម្រើនប្រកបដោយចីរភាព ដើម្បីធានាបាននូវអនាគតកម្ពុជា និងប្រជាជនកម្ពុជា ក៏ដូចជាអ្នកជំនាន់ក្រោយៗ ក្នុងការបន្តរស់នៅប្រកបដោយសុខដុមរមនា។