ស្របពេលមានរលកនៃការឆ្លងវីរុស COVID-19 នៅទូទាំងប្រទេស ប្រទេសចិនកាលពីថ្ងៃសៅរ៍ (៧ មករា) គឺជាថ្ងៃដំបូងនៃពេលវេលា "ជុន យុន"“chun yun” ដែលជារយៈពេល ៤០ ថ្ងៃនៃការធ្វើដំណើរបុណ្យចូលឆ្នាំថ្មី... ជាលើកដំបូងចាប់តាំងពីឆ្នាំ ២០២០ ដោយគ្មានការរឹតបន្តឹងការធ្វើដំណើរក្នុងស្រុក។

យោងតាមក្រសួងដឹកជញ្ជូនរបស់ប្រទេសចិន អ្នកដំណើរជាងពីរពាន់លាននាក់ត្រូវបានគេរំពឹងថានឹងធ្វើដំណើរក្នុងរយៈពេល ៤០ថ្ងៃខាងមុខ។ ​

បុណ្យ​ចូល​ឆ្នាំ​ថ្មី​ប្រពៃណីចិន នឹងចាប់​ផ្ដើម​ជា​ផ្លូវ​ការ​ចាប់​ពី​ថ្ងៃ​ទី ២១ ខែ​មករា ខាងមុខនេះទៅ។

មានការព្រួយបារម្ភពីការឆ្លងរាលដាលថា ការធ្វើចំណាកស្រុកដ៏ធំរបស់កម្មករនៅក្នុងទីក្រុងនានាទៅកាន់ស្រុកកំណើតរបស់ពួកគេនឹងបង្កឲ្យមានការកើនឡើងនៃការឆ្លងនៅក្នុងទីក្រុងតូចៗ និងតំបន់ជនបទដែលមិនសូវមានឧបករណ៍សម្រាប់ព្យាបាលអ្នកជំងឺ។ 

អ្នក​ក្រុង​ប៉េកាំង​ ម្នាក់​បាន​និយាយ​ថា រូបគាត់​ព្រួយ​បារម្ភ ប៉ុន្តែ​ទោះជាយ៉ាងណាក៏នឹង​ត្រូវតែធ្វើ​ដំណើរ​ដែរ។ខ្ញុំមិនទាន់បានឆ្លង COVID-19 នៅឡើយទេ ដូច្នេះប្រសិនបើសាច់ញាត្តិមិនមានវិជ្ជមានទេ ខ្ញុំខ្លាចថាខ្ញុំនឹងនាំវីរុសទៅ ចម្លងពួកគេ។ វានឹងប៉ះពាល់ដល់សុខភាពរបស់ពួកគេ។ ប៉ុន្តែ​ពួកគេ​បាន​ជាសះស្បើយ​ពី​ជំងឺ COVID-19 ​ ​មួយ​រយៈ​ហើយ ដូច្នេះ​ខ្ញុំ​គ្រោង​ទៅ​លេង​ពួកគេ ហើយ​ចំណាយ​ពេល​ចូលឆ្នាំ​ជាមួយ​ពួកគេ។ យាយ តារបស់​ខ្ញុំ​ក៏​ធ្លាប់​ប្រាប់​ខ្ញុំ​ច្រើន​ដង​ដែរ​ថា​នឹក​ខ្ញុំ​ខ្លាំង​ណាស់។  ​​

ក្រុមអាជ្ញាធរនិយាយថា ពួកគេកំពុងជំរុញសេវាព្យាបាលនៅតាមមូលដ្ឋាន ដោយការបើកគ្លីនិកគ្រុនក្តៅនៅតាមជនបទបន្ថែមទៀត និងរៀបចំផែនការសម្រាប់អ្នកជំងឺដែលមានហានិភ័យខ្ពស់។

ប្រទេសចិនបានរាយការណ៍ពីការស្លាប់ដោយសារ COVID ថ្មីចំនួនបីនាក់កាលពីថ្ងៃសុក្រ ប៉ុន្តែក្រុមអ្នកជំនាញសុខភាពអន្តរជាតិជឿថា និយមន័យតូចចង្អៀតរបស់ទីក្រុងប៉េកាំងនៃការស្លាប់ដោយសារ វីរុស COVID មិនឆ្លុះបញ្ចាំងពីចំនួនអ្នកស្លាប់ពិតប្រាកដទេ... ហើយអ្នកខ្លះព្យាករណ៍ថាមនុស្សជាងមួយលាននាក់អាចស្លាប់នៅឆ្នាំនេះ៕ អត្ថបទ៖ ក្រូច សុខមាន