ភ្នំពេញ៖ ដូចការគ្រោងទុក ការប្រកួតកីឡាបាល់ទាត់ពានរង្វាន់ Soccer League លើកទី៦ ឆ្នាំ២០២៣ ត្រូវប្រកាសបើកជាផ្លូវការ ល្ងាចថ្ងៃទី៧ ខែមករា ឆ្នាំ២០២៣ ក្រោមអធិបតីភាព ឯកឧត្តម បណ្ឌិត ថោង ខុន ប្រធានគណៈកម្មាធិការជាតិអូឡាំពិកម្ពុជា និងជាអនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតស៊ីហ្គេម អាស៊ានប៉ារ៉ាហ្គេម ២០២៣ (CAMSOC-CAMAPGOC) ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា សិស្សានុសិស្ស យុវជន និងយុវនារី និងអ្នកគាំទ្របាល់ទាត់ជាច្រើនរូបនៅកីឡដ្ឋានក្លិបអាជីព ភ្នំពេញក្រោន RSN។ ពិធីបើកនេះធ្វើឡើងស្របពេលព្រះរាជាណាចក្រកម្ពុជា ប្រារព្ធខួបទី៤៤ឆ្នាំ នៃទិវាជ័យជម្នះលើរបបប្រល័យពូជសាសន៍។

ការប្រកួតប្រកួតបាល់ទាត់ពានរង្វាន់ Soccer League ត្រូវបានគេមើលឃើញថាជាការផ្តល់ឱកាសដល់យុវជនកម្ពុជា ក្នុងការជួបជុំ រឹតចំណងមិត្តភាព សាមគ្គីភាព និងបង្កើនកិច្ចសហប្រតិបត្តិការរវាងគ្នា និងគ្នា តាមរយៈវិស័យកីឡា បន្ទាប់ពីភាពស្រាក់ស្រាន្តនៃជំងឺកូវីដ-១៩ នៅកម្ពុជា។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា សកម្មភាពយុវជនក្នុងការលេងកីឡានេះ នឹងរួមចំណែកបន្ថែមទៀត ក្នុងការគាំទ្រ និងអភិវឌ្ឍវិស័យកីឡានៅកម្ពុជាដោយឈរលើស្មារតីកីឡារស់ក្នុងសន្តិភាព និងប្រជាជនម្នាក់លេងកីឡាយ៉ាងតិចមួយមុខ។

យោងតាមរបាយការណ៍គណៈកម្មការរៀបចំការប្រកួតបានបង្ហាញថាឆ្នាំនេះមានក្រុមកើនឡើងរហូតដល់៧៤ក្រុម ខណៈការប្រកួតលើកដំបូងបង្អស់ឆ្នាំ២០១២ មានតែជាង២០ក្រុមប៉ុណ្ណោះ។

ខណៈនោះឯកឧត្តម ប្រធាន ស ស យ ក បានបន្ថែមថា ការប្រកួត Soccer League ទទួលបានការគាំទ្រខ្លាំង ទាំងគុណភាព និងបរិមាណ ដែលមានការកើនឡើងជាលំដាប់ពីមួយឆ្នាំទៅមួយឆ្នាំ រហូតដល់ទៅ៧៤ក្រុមឆ្នាំ២០២៣នេះ ហើយអ្វីដែលពិសេសគឺការបើកឱកាសឱ្យក្រុមបាល់ទាត់នារីចូលរួមប្រកួតជាលើកដំបូង តាមរយៈនេះ នឹងចូលរួមជាមួយរាជរដ្ឋាភិបាល ដើម្បីបំផុសស្មារតី ជម្រុញ និងគាំទ្របាល់ទាត់នារីកាន់តែមានសន្ទុះទៅមុខ។

ឯកឧត្តម ថោង ខុន ក្នុងនាមគណៈកម្មាធិការជាតិ CAMSOC-CAMAPGOC បានវាយតម្លៃខ្ពស់ និងកោតសរសើរ ដល់សហភាពសហព័ន្ធយុវជនកម្ពុជាដែលបានរួមចំណែកដ៏សំខាន់ក្នុងការជំរុញវិស័យកីឡានៅកម្ពុជា តាមរយៈការរៀបចំនូវសកម្មភាពប្រកួតកីឡាជាច្រើន។ ឯកឧត្តម បន្តថាក្នុងនោះការប្រកួត Soccer League មិនត្រឹមតែជាការប្រកួតកីឡាបាល់ទាត់ទេ ថែមទាំងជាព្រឹត្តិការណ៍ដ៏មានតម្លៃ ក្នុងការកសាងសុខុដុមរមនាសង្គម ពង្រឹងសាមគ្គីភាព មិត្តភាពផងដែរ។

ឯកឧត្តម ប្រធានអូឡាំពិកកម្ពុជា ក៏បានអំពាវនាវឱ្យបន្តចូលរួមក្នុងយុទ្ធនាការផ្សព្វផ្សាយដើម្បីរួមចំណែកដល់យុទ្ធនាការជាតិស្តីពី “ប្រជាជនម្នាក់ ត្រូវលេងកីឡាមួយមុខយ៉ាងតិចប្រចាំជីវិត, ២០២៣ ជាឆ្នាំទស្សនាកម្ពុជា, រួមគ្នាដើម្បីកម្ពុជាស្អាត និងបដិសណ្ឋារកិច្ចល្អ, នាំគ្នាកាត់បន្ថយគ្រោះថ្នាក់ចរាចរណ៍ និងឥទ្ធិពលគ្រឿងញៀន និងកីឡារស់ ក្នុងសន្តិភាព”។

សូមជម្រាបជូនថា ការប្រកួតនេះដំណើរការពីថ្ងៃទី០៧ ខែមករា ដល់ថ្ងៃទី១១ ខែកុម្ភៈ ឆ្នាំ២០២៣ ហើយសម្រាប់ក្រុមចំណាត់ថ្នាក់លេខ១ទទួលបានប្រាក់រង្វាន់២៥លានរៀល លេខ២ ១០លានរៀល និងលេខ៣ ៥លានរៀល សម្រាប់បាល់ទាត់បុរស ចំនែកបាល់ទាត់នារី លេខ១ ប្រាក់រង្វាន់១០លានរៀល លេខ២ ៥លានរៀល និងលេខ៣ ៣លានរៀល ព្រមទាំងមានរង្វាន់ជូនដល់ក្រុមលេងដោយត្រឹមត្រូវ (Fair Play) អាជ្ញាកណ្តាលល្អ កីឡាករទាត់ចូលទីច្រើនជាងគេ អ្នកចាំទីល្អជាងគេ និងគ្រូបង្វឹកល្អជាងគេផងដែរ៕