ព្រៃវែង៖ មានថ្ងៃជ័យជម្នះ ៧មករា ទើបនាំឱ្យកម្ពុជាមានការីកចម្រើនដូចពេលបច្ចុប្បន្ន​ នេះ​ជា​សច្ចភាព​ប្រវត្តិសាស្ត្រដែលមិនអាចប្រកែកបាន អ្នកមិនទទួលស្គាល់ថ្ងៃជ័យជម្នះ ៧មករា គឺមាន​តែ​អ្នក​ដែល​គាំទ្រ​របបខ្មែរក្រហមប៉ុណ្ណោះ។

នេះជាការថ្លែងរបស់ឯកឧត្តម កិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា និង​ជា​សមាជិក​អចិន្រ្តៃយ៍ នៃគណៈគណៈកម្មាធិការកណ្តាលគណបក្សប្រជាជនកម្ពុជា ខណៈ​អញ្ជើញ​អបអរ​សាទរ​ខួបលើកទី៤៤ឆ្នាំ នៃថ្ងៃជ័យជម្នះ ៧មករា នាព្រឹកថ្ងៃទី៨ ខែមករា នៅស្រុកពាមរក៍ ខេត្តព្រៃវែង។ ពិធីនេះក៏មានការចូលរួមពី ឯកឧត្តម អ៊ុ ប៊ុនឡេង អនុប្រធាន​គណៈអចិន្ត្រៃយ៍​គណបក្ស​ប្រជាជន​កម្ពុជាខេត្តព្រៃវែង ឯកឧត្តម លោកជំទាវ ជាអ្នកតំណាង​រាស្រ្ត​មណ្ឌល​ខេត្ត​ព្រៃវែង ព្រមទាំងប្រជាពលរដ្ឋសរុបជាង ៣០០នាក់ ។

ឯកឧត្តម បានមានប្រសាសន៍បន្តថា បច្ចុប្បន្ននេះ ប្រជាពលរដ្ឋ​កំពុង​រស់​នៅ​យ៉ាង​សុខ​ដុម​រមនា​ក្រោម​ម្លប់​សុខសន្តិភាព ហើយបន្តប្រឹងប្រែងក្នុងការកសាងសង្គមជាតិ និងជីវភាព​ប្រកប​ដោយ​ក្តី​សង្ឃឹម និង​ជ័យ​ជម្នះ៧ មករា បានបិទបញ្ចប់នូវទំព័រសករាជដ៏ខ្មៅ នាំមកនូវសករាជ​ថ្មី​នៃ​ការ​រស់​រៀន ការអភិវឌ្ឍ និងផ្តល់កំណើតទី២ដល់របស់ប្រជាពលរដ្ឋ​។ ក្រោម​ការ​ដឹក​នាំ​របស់​សម្តេច​អគ្គ​មហា​សេនា​បតីតេជោ ហ៊ុនសែន នាយករដ្ឋមន្ត្រីកម្ពុជា មានយុទ្ធសាស្រ្តត្រឹមត្រូវជាក់លាក់ បាន​ចាក់​វ៉ាក់​សាំងការពារជំងឺកូវីដ-១៩ ជូនប្រជាពលរដ្ឋស្ទើរទូទាំងប្រទេស ទើបរហូត​មក​ដល់​សព្វ​ថ្ងៃ​កម្ពុជា​បាន​បើកប្រទេសឡើងវិញ ហើយកំពុងកសាងសេដ្ឋកិច្ច និងសង្គមឡើងវិញ។ ទន្ទឹមនឹងនេះ​      រាជរដ្ឋាភិបាល បានជួយឧបត្ថម្ភសាច់ប្រាក់ជូនដល់ជនងាយរងគ្រោះ ស្រ្តី និងកុមាផងដែរ។ ម្យ៉ាង​វិញ​ទៀត ថ្មីៗនេះរាជរដ្ឋាភិបាលកម្ពុជា និងរដ្ឋសភា បានទទួលជោគជ័យក្នុងកិច្ចប្រជុំអាស៊ាន និង​អន្តរ​សភា​អស៊ាននាពេលកន្លងទៅទទួល បានការកោតសរសើរពីប្រទេសអាស៊ាន និង​សហគមន៍​អន្តរជាតិ​។

ឯកឧត្តមកិត្តិបណ្ឌិត ជាម យៀប ក៏បានថ្លៃង​អំណរ​គុណ​ផង​ដែរ​ដល់​សមាជិក​សមាជិកា​គណបក្ស​ប្រ​ជាជនកម្ពុជាទាំង ៦​ស្រុក ក្នុងខេត្តព្រៃវែង ដែល​បាន​ចូល​រួម​យ៉ាង​សកម្ម​ក្នុង​ការ​ផ្សព្វ​ផ្សាយ​គោល​នយោបាយ​គណបក្ស​ប្រជាជន​កម្ពុជា​ជូន​ដល់​ប្រជាពលរដ្ឋ​ទទួល​បាន​ការ​បោះឆ្នោត​គាំ​ទ្រ​ពី​ប្រជាពលរដ្ឋ​នៅ​ក្នុងការបោះឆ្នោតឃុំ សង្កាត់នាពេលកន្លងទៅ និង​សូមឲ្យសមាជិក​គណបក្ស​ប្រជាជន​កម្ពុជា​ទាំងអស់ បោះឆ្នោតបន្តគាំទ្រក្នុងការបោះឆ្នោតជ្រើសរើសតំណាងរាស្ត្រ​អាណត្តិ​ទី៧ នាពេលខាងមុខឲ្យទទួលបានជោគជ័យ ៕