​បាល់ទាត់៖ ​បន្ទាប់ពី​ក្លិប​ធំ​ទាំង ៦ របស់​អង់គ្លេស​រួមមាន Manchester City, Manchester United, Liverpool, Chelsea, Arsenal និង Tottenhan Hotspur បាន​ប្រកាស​ដក​ខ្លួន​ពី​ការប្រកួត European Super League បួន​ក្លិប​ទៀត​ក៏បាន​សំរេចចិត្ត​ដក​ខ្លួន​ដែរ​បន្សល់ទុក​តែ Real Madrid និង Barcelona ដែល​នៅតែ​រក្សា​ភាព​ស្ងៀមស្ងាត់​។

​​ក្លិប​អេ​ស្ប៉ា​ញ Atletico Madrid ដើរ​មុនគេ​បន្ទាប់ពី​ក្លិប​ទាំង ៦ របស់​អង់គ្លេស​ក្នុង​ការ​ដក​ខ្លួន​នេះ មុន​ពេល​ដែល Inter Milan បាន​ចេញ​សេចក្ដីថ្លែងការណ៍​របស់​ខ្លួន​ថា FC Internazionale Milano មិន​មាន​ពាក់ព័ន្ធ​នឹង​គម្រោង European Super League ទៀត​ឡើយ​។ មិនយូរប៉ុន្មាន​ក្នុង​ថ្ងៃ​ពុធ​ដដែល​ក្លិប​យក្ស​អ៊ីតាលី​ពីរ​ទៀត Juventus និង AC Milan ក៏​បាន​ចេញ​សេចក្ដីថ្លែងការណ៍​រៀងៗ​ខ្លួន​ពី​ការ​ដក​ខ្លួន​។ ​មក​ដល់ពេលនេះ​នៅសល់តែ Real Madrid និង Barcelona ប៉ុណ្ណោះ​នៅ​ស្ងៀមស្ងាត់​នៅឡើយ ដោយ​ក្នុង​នោះ Real Madrid ដែល​មាន​ប្រធាន​ក្លិប​លោក Florentino Perez ជា​អ្នក​ផ្ដួចផ្ដើម​ដំបូង​។

​​លោក Perez បាន​ផ្តល់​កិច្ច​សម្ភាសន៍​ក្នុង​ទូរទស្សន៍​អេ​ស្ប៉ា​ញ​មួយ​ថា​ ការប្រកួត​បង្កើត​អោយ​មាន​ពាន European Super League នេះ​ឡើង​គឺ​ដើម្បី​ស្រោចស្រង់​ហិរញ្ញវត្ថុ​របស់​ក្លិប ​ដែល​ដុនដាប​ខ្លាំង​អំឡុង​ពេល​វិបត្តិ Covid-19 នេះ​។ ​តែ​គំនិត​នេះ​ត្រូវ​ទទួលរង​ការរិះគន់​គ្រប់​មជ្ឈដ្ឋាន ជាពិសេស​អ្នកគាំទ្រ​ភាគច្រើន​បាន​សំដែង​ការ​មិន​ពេញចិត្ត​ និង​ឈាន​ដល់​ការ​ធ្វើ​បាតុកម្ម​នៅ​អង់គ្លេស​៕

​អត្ថបទ​៖​នាង សុភា​វុ​ធ